IND vs ZIM: ಚೊಚ್ಚಲ ಟಿ20 ಶತಕದೊಂದಿಗೆ ದಾಖಲೆ ಬರೆದ ಅಭಿಷೇಕ್ ಶರ್ಮಾ; ಜಿಂಬಾಬ್ವೆಗೆ ಬೃಹತ್ ಗುರಿ ನೀಡಿದ ಭಾರತ

23 ವರ್ಷದ ಸ್ಫೋಟಕ ಬ್ಯಾಟರ್ ಅಭಿಷೇಕ್ ಶರ್ಮಾ ಅವರು ಭಾನುವಾರ, ಜುಲೈ 7ರಂದು ಜಿಂಬಾಬ್ವೆ ವಿರುದ್ಧ ತನ್ನ ಚೊಚ್ಚಲ ಟಿ20 ಶತಕದೊಂದಿಗೆ ಅಂತಾರಾಷ್ಟ್ರೀಯ ವೇದಿಕೆಯಲ್ಲಿ ಬೃಹತ್ ಆಗಮನ ಘೋಷಿಸಿದರು.

ಹರಾರೆಯ ಸ್ಪೋರ್ಟ್ಸ್ ಕ್ಲಬ್‌ನಲ್ಲಿ ನಡೆದ ಭಾರತ ಮತ್ತು ಜಿಂಬಾಬ್ವೆ ನಡುವಿನ ಐದು ಪಂದ್ಯಗಳ ಟಿ20 ಸರಣಿಯ ಎರಡನೇ ಪಂದ್ಯದಲ್ಲಿ ಆಡುವಾಗ ಅಭಿಷೇಕ್ ಶರ್ಮಾ ಕೇವಲ 46 ಎಸೆತಗಳಲ್ಲಿ ಶತಕ ಪೂರೈಸಿದರು.

ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ತಂಡ ಅಭಿಷೇಕ್ ಶರ್ಮಾ ಅವರ ಭರ್ಜರಿ ಶತಕ ಮತ್ತು ರುತುರಾಜ್ ಗಾಯಕ್ವಾಡ್ ಅವರ ಅಮೋಘ ಅರ್ಧಶತಕದ ನೆರವಿನಿಂದ ನಿಗದಿತ 20 ಓವರ್‌ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 234 ರನ್ ಕಲೆಹಾಕಿದ್ದು, ಜಿಂಬಾಬ್ವೆ ತಂಡಕ್ಕೆ 235 ರನ್‌ಗಳ ಗುರಿ ನೀಡಿದೆ.

ತನ್ನ ಚೊಚ್ಚಲ ಟಿ20 ಪಂದ್ಯದಲ್ಲಿ ನಾಲ್ಕು ಎಸೆತಗಳಲ್ಲಿ ಡಕ್‌ಗೆ ಔಟಾಗಿದ್ದ ಎಡಗೈ ಬ್ಯಾಟರ್, ಎರಡನೇ ಪಂದ್ಯದಲ್ಲಿ ಅದ್ಭುತವಾಗಿ ಪುನರಾಗಮನ ಮಾಡಿ ಶತಕ ಬಾರಿಸಲು ಸಿಕ್ಸರ್‌ಗಳ ಸುರಿಮಳೆ ಸುರಿಸಿದನು.

ಅಭಿಷೇಕ್ ಶರ್ಮಾ ತನ್ನ ಇನ್ನಿಂಗ್ಸ್ ಅನ್ನು ಡೀಪ್ ಸ್ಕ್ವೇರ್ ಲೆಗ್‌ನಲ್ಲಿ ಸಿಕ್ಸರ್‌ನೊಂದಿಗೆ ಪ್ರಾರಂಭಿಸಿದನು ಮತ್ತು ಜಿಂಬಾಬ್ವೆ ಬೌಲಿಂಗ್ ದಾಳಿಯನ್ನು ಒತ್ತಡಕ್ಕೆ ಸಿಲುಕಿಸಿದನು.

ಭಾನುವಾರದಂದು ಅಭಿಷೇಕ್ ಶರ್ಮಾ ವಿಶೇಷವಾಗಿ ಜಿಂಬಾಬ್ವೆ ಸ್ಪಿನ್ನರ್‌ಗಳನ್ನು ದಂಡಿಸುತ್ತಿದ್ದರೆ, ಮೈದಾನದಾದ್ಯಂತ ಚೆಂಡು ಮೇಲೆ ಹಾರುತ್ತಿದ್ದವು. ಮತ್ತೊಂದೆಡೆ, ರುತುರಾಜ್ ಗಾಯಕ್ವಾಡ್ ಉತ್ತಮ ಸಾಥ್ ನೀಡಿದರು.

ಆರಂಭಿಕ ಆಟಗಾರ ಅಭಿಷೇಕ್ ಶರ್ಮಾ ಟಿ20 ಕ್ರಿಕೆಟ್‌ನಲ್ಲಿ ಶತಕ ಬಾರಿಸಿದ 10ನೇ ಭಾರತೀಯ ಕ್ರಿಕೆಟಿಗ ಎನಿಸಿಕೊಂಡರು. ಅಭಿಷೇಕ್‌ಗಿಂತ ಮೊದಲು ರೋಹಿತ್ ಶರ್ಮಾ, ಸೂರ್ಯಕುಮಾರ್ ಯಾದವ್, ಕೆಎಲ್ ರಾಹುಲ್, ದೀಪಕ್ ಹೂಡಾ, ಯಶಸ್ವಿ ಜೈಸ್ವಾಲ್, ವಿರಾಟ್ ಕೊಹ್ಲಿ, ಸುರೇಶ್ ರೈನಾ ಮತ್ತು ಶುಭ್ಮನ್ ಗಿಲ್ ಈ ಸಾಧನೆ ಮಾಡಿದ್ದಾರೆ.

ಕೇವಲ 46 ಎಸೆತಗಳಲ್ಲಿ ಶತಕ ಸಿಡಿಸಿದ ಅಭಿಷೇಕ್ ಶರ್ಮಾ ಟಿ20 ಸ್ವರೂಪದಲ್ಲಿ ಭಾರತದ ಪರ ಮೂರನೇ ವೇಗದ ಶತಕವಾಗಿದೆ. ಆ ಪಟ್ಟಿಯನ್ನು ರೋಹಿತ್ ಶರ್ಮಾ ಮುನ್ನಡೆಸುತ್ತಿದ್ದು, ಅವರು ಕೇವಲ 35 ಎಸೆತಗಳಲ್ಲಿ ಭಾರತದ ಪರ ವೇಗದ ಟಿ20 ಶತಕ ಬಾರಿಸಿದ್ದಾರೆ.

ನಾಯಕ ಶುಭ್ಮನ್ ಗಿಲ್ ಕೇವಲ 2 ರನ್ ಗಳಿಸಿ ಔಟಾದ ನಂತರ ಜೊತೆಗೂಡಿದ ಅಭಿಷೇಕ್ ಶರ್ಮಾ ಮತ್ತು ರುತುರಾಜ್ ಗಾಯಕ್ವಾಡ್ ಜೋಡಿ ಎರಡನೇ ವಿಕೆಟ್‌ಗೆ 137 ರನ್‌ಗಳ ಜೊತೆಯಾಟ ನಿರ್ಮಿಸಿದರು.

ಅಭಿಷೇಕ್ ಶರ್ಮಾ 47 ಎಸೆತಗಳಲ್ಲಿ 7 ಬೌಂಡರಿ ಹಾಗೂ 8 ಸಿಕ್ಸರ್‌ಗಳ ಸಮೇತ 100 ರನ್ ಬಾರಿಸಿ ಔಟಾದರೆ, ರುತುರಾಜ್ ಗಾಯಕ್ವಾಡ್ 47 ಎಸೆತಗಳಲ್ಲಿ 11 ಬೌಂಡರಿ ಹಾಗೂ 1 ಸಿಕ್ಸರ್ ಮೂಲಕ ಅಜೇಯ 77 ರನ್ ಗಳಿಸಿದರು. ಇನ್ನು ಕೊನೆಯಲ್ಲಿ ಅಬ್ಬರಿಸಿದ ರಿಂಕು ಸಿಂಗ್ ಕೇವಲ 22 ಎಸೆತಗಳನ್ನು ಎದುರಿಸಿ 2 ಬೌಂಡರಿ ಹಾಗೂ 5 ಸಿಕ್ಸರ್‌ಗಳೊಂದಿಗೆ ಅಜೇಯ 48 ರನ್ ಬಾರಿಸಿದರು.

ಅಭಿಷೇಕ್ ಶರ್ಮಾ ತಮ್ಮ ಇನ್ನಿಂಗ್ಸ್‌ನ ಆರಂಭದಿಂದಲೂ ಆಕ್ರಮಣಕಾರಿಯಾಗಿದ್ದರು ಮತ್ತು ತಮ್ಮ ಚೊಚ್ಚಲ ಪಂದ್ಯದಲ್ಲಿ ಕಳಪೆಯಾಗಿ ಔಟಾದರೂ ತಮ್ಮ ವಿಧಾನವನ್ನು ಬದಲಾಯಿಸಲಿಲ್ಲ. 27 ರನ್‌ ಗಳಿಸಿ ಬ್ಯಾಟಿಂಗ್ ಮಾಡುತ್ತಿದ್ದಾಗ 8ನೇ ಓವರ್‌ನಲ್ಲಿ ಜೀವದಾನ ಪಡೆದ ಆರಂಭಿಕ ಬ್ಯಾಟರ್, ಇನ್ನಿಂಗ್ಸ್‌ನುದ್ದಕ್ಕೂ ಅದೃಷ್ಟಶಾಲಿಯಾಗಿದ್ದರು.

ಅಭಿಷೇಕ್ ಶರ್ಮಾ ಎರಡು ನಿರ್ದಿಷ್ಟ ಓವರ್‌ಗಳಲ್ಲಿ ವಿಶೇಷವಾಗಿ ಆಕ್ರಮಣಕಾರಿಯಾಗಿದ್ದರು. ಡಿಯೋನ್ ಮೈಯರ್ಸ್ ಬೌಲಿಂಗ್‌ನಲ್ಲಿ 28 ರನ್‌ ಬಾರಿಸಿದರೆ, ನಂತರ ವೆಲ್ಲಿಂಗ್ಟನ್ ಮಸಕಾಜ್ಡಾ ಅವರ ಓವರ್‌ನಲ್ಲಿ 21 ರನ್ ಗಳಿಸಿದರು.

ಅಭಿಷೇಕ್ ಶರ್ಮಾ ಅವರು ತಮ್ಮ ಇನ್ನಿಂಗ್ಸ್ ಸಿಕ್ಸ್‌ನೊಂದಿಗೆ ಆರಂಭಿಸಿದಂತೆಯೇ ಸಿಕ್ಸರ್ ಸಿಡಿದಿ ತಮ್ಮ ಚೊಚ್ಚಲ ಶತಕ ತಲುಪಿದರು. ಮಸಕಾಜ್ಡಾ ಎಸೆದ 14ನೇ ಓವರ್‌ನಲ್ಲಿ ತಮ್ಮ ಚೊಚ್ಚಲ ಶತಕ ಬಾರಿಸಲು ಸ್ವೀಪ್‌ನೊಂದಿಗೆ ಫೈನ್ ಲೆಗ್ ಮೂಲಕ ಸಿಕ್ಸರ್ ಬಾರಿಸಿದರು. ಮುಂದಿನ ಎಸೆತದಲ್ಲಿ ಸಿಕ್ಸರ್ ಬಾರಿಸಲು ಯತ್ನಿಸಿ ಅಭಿಷೇಕ್ ಶರ್ಮಾ ಔಟಾದರು.