ಜಿಎಸ್ಟಿ ಪ್ರಭಾವ: ಇಂಡೋ- ಆಸೀಸ್ ಪಂದ್ಯದ ಟಿಕೆಟ್ ದುಬಾರಿ

ಕೋಲ್ಕತ್ತಾ, ಆಗಸ್ಟ್ 20: ಸರಕು ಮತ್ತು ಸೇವಾ ತೆರಿಗೆ(ಜಿಎಸ್ಟಿ) ಜಾರಿಯಾದ ನಂತರ ಅನೇಕ ಕ್ಷೇತ್ರಗಳಲ್ಲಿ ಬೆಲೆ ಏರಿಕೆ ಬಿಸಿ ತಟ್ಟಿದೆ.
ಜುಲೈ 1 ರಿಂದ ಸೇವೆ ಮತ್ತು ಸರಕುಗಳ ಮೇಲೆ ಜಿಎಸ್ಟಿ ವಿಧಿಸಲಾಗಿದ್ದು, ಈಗ ಕ್ರಿಕೆಟ್ ಕ್ಷೇತ್ರಕ್ಕೂ ಬಿಸಿ ಮುಟ್ಟಿದೆ.

ಕೋಲ್ಕತ್ತಾದ ಈಡನ್ ಗಾರ್ಡನ್ ಮೈದಾನದಲ್ಲಿ ಮುಂಬರುವ ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಸರಣಿಯ ಟಿಕೆಟ್ ದರಗಳ ಮೇಲೆ ಜಿಎಸ್ಟಿ ತನ್ನ ಪ್ರಭಾವ ಬೀರಿದೆ. ಸೆಪ್ಟಂಬರ್ 21 ರಂದು ಏಕದಿನ ಕ್ರಿಕೆಟ್ ಪಂದ್ಯ ನಡೆಯಲಿದೆ.

ಈ ಪಂದ್ಯದ ಟಿಕೆಟ್ ಬೆಲೆಯನ್ನು ಶೇ. 28 ರಷ್ಟು ಏರಿಕೆ ಮಾಡಲಾಗಿದೆ. 500 ರೂ. ಬೆಲೆ ಇರುವ ಟಿಕೆಟ್ 650 ರೂ., 1000 ರೂ. ಬೆಲೆಯ ಟಿಕೆಟ್ ಗೆ 1,300 ರೂ. ಹಾಗೂ 1,500 ರೂ. ಬೆಲೆಯ ಟಿಕೆಟ್ ಗೆ 1900 ರೂ. ನೀಡಬೇಕಿದೆ.

ಬಂಗಾಳ ಕ್ರಿಕೆಟ್ ಸಂಸ್ಥೆಯ ಅಧ್ಯಕ್ಷ ಸೌರವ್ ಗಂಗೂಲಿ ಈ ಕುರಿತು ಮಾಹಿತಿ ನೀಡಿದ್ದು, ಸೆಪ್ಟಂಬರ್ 21 ರಂದು ಆಸ್ಟ್ರೇಲಿಯಾ ಎದುರಿನ ಏಕದಿನ ಪಂದ್ಯಕ್ಕೆ ಟಿಕೆಟ್ ಬೆಲೆಯಲ್ಲಿ ಏರಿಕೆಯಾಗಿಲ್ಲ. ಅವುಗಳ ಮುಖಬೆಲೆಯ ಮೇಲೆ ಶೇ. 28 ರಷ್ಟು ತೆರಿಗೆ ಹಾಕಲಾಗುವುದು ಎಂದು ತಿಳಿಸಿದ್ದಾರೆ.(ಐಎಎನ್ ಎಸ್)