ಆಸ್ಟ್ರೇಲಿಯಾ ನಿರ್ಮಿಸಿದ್ದ ಟಿ20ಐ ವಿಶ್ವದಾಖಲೆ ಮುರಿದ ಟೀಮ್ ಇಂಡಿಯಾ!

ರೋಹಿತ್ ಆಕರ್ಷಕ ಆಟ

ವಿಶ್ರಾಂತಿಯಲ್ಲಿರುವ ವಿರಾಟ್ ಕೊಹ್ಲಿ ಬದಲಾಗಿ ಭಾರತದ ನಾಯಕತ್ವ ವಹಿಸಿದ್ದ ರೋಹಿತ್ ಶರ್ಮಾ, ರಾಜ್‌ಕೋಟ್‌ನಲ್ಲಿ ಸ್ಫೋಟಕ ಅರ್ಧ ಶತಕ (85 ರನ್, 43 ಎಸೆತ) ಬಾರಿಸಿದ್ದರು. ಟಾಸ್ ಸೋತು ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟಿದ್ದ ಬಾಂಗ್ಲಾ 20 ಓವರ್‌ಗೆ 6 ವಿಕೆಟ್ ಕಳೆದು 153 ರನ್ ಬಾರಿಸಿದ್ದರೆ, ಭಾರತ 14.4 ಓವರ್‌ಗೆ 2 ವಿಕೆಟ್‌ ಕಳೆದು 154 ರನ್ ಮಾಡಿತ್ತು.

ಚೇಸಿಂಗ್‌ನಲ್ಲಿ 41ನೇ ಜಯ

ದೆಹಲಿ ಪಂದ್ಯವನ್ನು ಗೆದ್ದಿದ್ದ ಬಾಂಗ್ಲಾ, ಅದಕ್ಕೂ ಹಿಂದೆ ಅಂತಾರಾಷ್ಟ್ರೀಯ ಟಿ20ಯಲ್ಲಿ ಭಾರತದ ವಿರುದ್ಧ ಲಭಿಸಿದ್ದ ಸತತ 8 ಸೋಲುಗಳ ಕೆಟ್ಟ ದಾಖಲೆಯನ್ನು ಕೊನೆಗೊಳಿಸಿತ್ತು. ರಾಜ್‌ಕೋಟ್‌ನಲ್ಲಿ ಭಾರತ ದಾಖಲಿಸಿದ್ದು ಅಂತಾರಾಷ್ಟ್ರೀಯ ಟಿ20ಯಲ್ಲಿ ಚೇಸಿಂಗ್‌ನಲ್ಲಿ ಲಭಿಸಿದ 41ನೇ ಜಯ.

ಆಸೀಸ್ ದಾಖಲೆ ಬದಿಗೆ

ಅಂತಾರಾಷ್ಟ್ರೀಯ ಟಿ20ಯಲ್ಲಿ ಚೇಸಿಂಗ್‌ ವೇಳೆ ಹೆಚ್ಚಿನ ಪಂದ್ಯ ಗೆದ್ದ ದಾಖಲೆಯನ್ನು ಈ ಹಿಂದೆ ಭಾರತ ಮತ್ತು ಆಸ್ಟ್ರೇಲಿಯಾ ತಂಡಗಳು ಹಂಚಿಕೊಂಡಿದ್ದವು. ಎರಡೂ ತಂಡಗಳು 40 ಪಂದ್ಯಗಳನ್ನು ಚೇಸಿಂಗ್‌ನಲ್ಲಿ ಗೆದ್ದಿದ್ದವು. ಬಾಂಗ್ಲಾ ವಿರುದ್ಧದ ದ್ವಿತೀಯ ಟಿ20 ಗೆಲುವಿನೊಂದಿಗೆ ಭಾರತ ಒಟ್ಟು 41 ಟಿ20ಐ ಚೇಸಿಂಗ್‌ ಗೆಲುವುಗಳನ್ನು ದಾಖಲಿಸಿದೆ. ಹೀಗಾಗಿ ಆಸ್ಟ್ರೇಲಿಯಾ ದಾಖಲೆ ಬದಿಗೆ ಸರಿದಿದೆ.

ಚೇಸಿಂಗ್‌ನಲ್ಲಿ ಭಾರತ ಬೆಸ್ಟ್

ಟಿ20ಐ ಚೇಸಿಂಗ್‌ನಲ್ಲಿ ಅತ್ಯಧಿಕ ಪಂದ್ಯಗಳನ್ನು ಗೆದ್ದು ಭಾರತ, ಆಸ್ಟ್ರೇಲಿಯಾವನ್ನು ಹಿಂದಿಕ್ಕಿದ್ದಷ್ಟೇ ಅಲ್ಲ, ಟಿ20ಐ ಚೇಸಿಂಗ್‌ನಲ್ಲಿ ಗೆಲುವಿನ ಅತ್ಯುತ್ತಮ ಶೇಕಡಕ್ಕಾಗಿಯೂ ದಾಖಲೆ ನಿರ್ಮಿಸಿದೆ. ಭಾರತ 61 ಚೇಸಿಂಗ್ ಪಂದ್ಯಗಳಲ್ಲಿ 41 ಗೆಲುವು ಕಂಡಿದ್ದರೆ, ಆಸ್ಟ್ರೇಲಿಯಾ 69 ಪಂದ್ಯಗಳಲ್ಲಿ 40 ಜಯದ ದಾಖಲೆ ಹೊಂದಿದೆ.