ಭಾರತ vs ದಕ್ಷಿಣ ಆಫ್ರಿಕಾ: ವಿಶ್ವ ದಾಖಲೆ ನಿರ್ಮಿಸಿದ ಟೀಮ್ ಇಂಡಿಯಾ!

ಸತತ 11 ಗೆಲುವಿನ ವಿಶ್ವ ದಾಖಲೆ

ದಕ್ಷಿಣ ಆಫ್ರಿಕಾ ವಿರುದ್ಧದ ದ್ವಿತೀಯ ಟೆಸ್ಟ್‌ನಲ್ಲಿನ ಗೆಲುವಿನೊಂದಿಗೆ ಭಾರತ, ತವರು ನೆಲದಲ್ಲಿ ನಡೆದ ಸರಣಿಯಲ್ಲಿ ಸತತ 11 ಬಾರಿ ಜಯ ದಾಖಲಿಸಿ ವಿಶ್ವ ದಾಖಲೆ ನಿರ್ಮಿಸಿದೆ. ವಿಶ್ವದ ಯಾವುದೇ ತಂಡ ತವರಿನಲ್ಲಿ ಸತತ 11 ಟೆಸ್ಟ್‌ ಸರಣಿಗಳನ್ನು ಗೆದ್ದಿಲ್ಲ.

ಧೋನಿ-ಕೊಹ್ಲಿ ನಾಯಕತ್ವ

ಭಾರತದಲ್ಲಿ ನಡೆದ ಟೆಸ್ಟ್‌ ಸರಣಿಗಳಲ್ಲಿ ದೇಸಿ ತಂಡ ದಾಖಲಿಸಿದ 11 ಸರಣಿ ಜಯಗಳಲ್ಲಿ 9 ವಿರಾಟ್ ಕೊಹ್ಲಿ ನಾಯಕತ್ವದಲ್ಲಿ ಲಭಿಸಿದವು. ಇನ್ನುಳಿದ 2 ಸರಣಿ ಗೆಲುವುಗಳು ಮಾಜಿ ನಾಯಕ ಎಂಎಸ್ ಧೋನಿ ನಾಯಕರಾಗಿದ್ದಾಗ ದೊರೆತವು.

ದಾಖಲೆ ನಿರ್ಮಿಸಿದ್ದ ಭಾರತ-ಆಸ್ಟ್ರೇಲಿಯಾ

ಪುಣೆ ಪಂದ್ಯಕ್ಕೂ ಮುನ್ನ ತವರಿನಲ್ಲಿ ಸತತ 10 ಸರಣಿಗಳಲ್ಲಿ ಗೆಲುವು ಸಾಧಿಸಿದ ದಾಖಲೆ ಭಾರತ ಮತ್ತು ಆಸ್ಟ್ರೇಲಿಯಾ ತಂಡಗಳ ಹೆಸರಿನಲ್ಲಿತ್ತು. ಆಸ್ಟ್ರೇಲಿಯಾವನ್ನು 1994ರ ನವೆಂಬರ್‌ನಿಂದ 2000ದ ನವೆಂಬರ್ ಅವಧಿಯಲ್ಲಿ ಮುನ್ನಡೆಸಿದ್ದ ಸ್ಟೀವ್ ವಾ ಮತ್ತು ಮಾರ್ಕ್ ಟೇಲರ್, ಜುಲೈ 2004ರಿಂದ ನವೆಂಬರ್ 2008ರ ಅವಧಿಯಲ್ಲಿ ಆಸೀಸ್ ಮುನ್ನಡೆಸಿದ್ದ ರಿಕಿ ಪಾಂಟಿಂಗ್‌ನಿಂದಾಗಿ ಆಸ್ಟ್ರೇಲಿಯಾ ತವರಿನಲ್ಲಿ ಸತತ 10 ಟೆಸ್ಟ್ ಸರಣಿಗಳಲ್ಲಿ ಗೆದ್ದ ದಾಖಲೆ ಹೊಂದಿತ್ತು.

ತೆಂಡೂಲ್ಕರ್ ಕೊನೇ ಟೆಸ್ಟ್ ಸರಣಿ

ಭಾರತದಲ್ಲಿ ನಡೆದ ಟೆಸ್ಟ್ ಸರಣಿಯನ್ನು ಟೀಮ್ ಇಂಡಿಯಾ ಕಡೇಯ ಸಾರಿ ಸೋತಿದ್ದು 2012-13ರ ಸೀಸನ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ. ಭಾರತದ ಸರಣಿ ಜಯದ ಪಯಣ ಆರಂಭವಾಗಿದ್ದು ವೆಸ್ಟ್ ಇಂಡೀಸ್ ವಿರುದ್ಧ, 2013ರ ನವೆಂಬರ್‌ನಲ್ಲಿ ಮುಂಬೈನಲ್ಲಿ ನಡೆದಿದ್ದ ಸರಣಿಯಿಂದ. ಅದು ಸಚಿನ್ ಅವರಾಡಿದ ಕೊನೇ ಟೆಸ್ಟ್ ಸರಣಿಯಾಗಿತ್ತು. ಅಂದಿನ ಕೊನೇ ಟೆಸ್ಟ್‌ನಲ್ಲಿ ಸಚಿನ್ 74 ರನ್‌ ಬಾರಿಸಿದ್ದರು.