ಭಾರತ vs ಆಸ್ಟ್ರೇಲಿಯಾ: 3ನೇ ಟೆಸ್ಟ್‌ನಲ್ಲಿ ಮುರಿಯಬಲ್ಲ ಪ್ರಮುಖ 5 ದಾಖಲೆಗಳು

ಚೇತೇಶ್ವರ್ ಪೂಜಾರ

ಟೀಮ್ ಇಂಡಿಯಾದ ಪ್ರಮುಖ ಟೆಸ್ಟ್ ಆಟಗಾರ ಚೇತೇಶ್ವರ್ ಪೂಜಾರ ಈ ಬಾರಿ ಆಸ್ಟ್ರೇಲಿಯಾ ವಿರುದ್ಧದ ಮೊದಲ ಎರಡು ಪಂದ್ಯಗಳಲ್ಲಿ ನೀರಸ ಪ್ರದರ್ಶನವನ್ನು ನೀಡಿದ್ದಾರೆ. ಆದರೆ ಪುಜಾರ ಓರ್ವ ಶಾಸ್ತ್ರೀಯ ಆಟಗಾರನಾಗಿದ್ದು ಯಾವುದೇ ಕ್ಷಣದಲ್ಲೂ ತಂಡಕ್ಕೆ ನೆರವಾಗಬಲ್ಲ ಆಟಗಾರ. ಸಿಡ್ನಿ ಟೆಸ್ಟ್‌ನಲ್ಲಿ ಪೂಜಾರ 6000 ಟೆಸ್ಟ್ ರನ್ ಗಳಿಸುವ ಅವಕಾಶವಿದೆ. ಈ ಸಾಧನೆ ಮಾಡಲು ಪೂಜಾರ 97 ರನ್ ಗಳಿಸುವ ಅವಶ್ಯಕತೆಯಿದೆ. ಸಿಡ್ನಿಯ ಪಂದ್ಯದಲ್ಲಿ ಈ ಸಾಧನೆ ಮಾಡಿದ ವೇಗವಾಗಿ ಈ ಮೈಲಿಗಲ್ಲಿ ದಾಟಿದ 6ನೇ ಕ್ರಿಕೆಟಿಗ ಎನಿಸಿಕೊಳ್ಳಲಿದ್ದಾರೆ ಪೂಜಾರ.

ನಥನ್ ಲಿಯಾನ್

ಆಸ್ಟ್ರೇಲಿಯಾ ಕ್ರಿಕೆಟ್ ತಮಡದ ಅನುಭವಿ ಸ್ಪಿನ್ನರ್ ನಥನ್ ಲಿಯನ್ ಕೂಡ ಮಹತ್ವದ ದಾಖಲೆಯೊಂದರ ಸನಿಹದಲ್ಲಿದ್ದಾರೆ. ಟೆಸ್ಟ್ ಕ್ರಿಕೆಟ್‌ನಲ್ಲಿ 400 ವಿಕೆಟ್ ಗಳಿಸಿದ ಆಟಗಾರರ ಪಟ್ಟಿಗೆ ಸೇರಲು ಲಿಯಾನ್‌ಗೆ ಕೇವಲ 6 ವಿಕೆಟ್‌ಗಳ ಅವಶ್ಯಕತೆಯಿದೆ. ಸಿಡ್ನಿ ಟೆಸ್ಟ್ ಪಂದ್ಯದ ಎರಡು ಇನ್ನಿಂಗ್ಸ್‌ಗಳಲ್ಲಿ ಈ ಆರು ಬಲಿ ಪಡೆದರೆ ಈ ಮೈಲಿಗಲ್ಲನ್ನು ಅವರು ಯಶಸ್ವಿಯಾಗಿ ಪೂರೈಸಲಿದ್ದಾರೆ.

ಅಜಿಂಕ್ಯ ರಹಾನೆ

ಆಸ್ಟ್ರೇಲಿಯಾ ತಂಡದ ವಿರುದ್ಧ ಮೂರು ಶತಕವನ್ನು ಬಾರಿಸಿದ ಸಾಧನೆಯನ್ನು ವೀರೇಂದ್ರ ಸೆಹ್ವಾಗ್ ಮಾಡಿದ್ದಾರೆ. ಈ ಸಾಧನೆಗೆ ಸಮನಾಗಿ ನಿಲ್ಲುವ ಅವಕಾಶವೀಗ ಟೀಮ್ ಇಂಡಿಯಾದ ಹಂಗಾಮಿ ನಾಯಕ ಅಜಿಂಕ್ಯ ರಹಾನೆಗೆ ಇದೆ. ರಹಾನೆ ಆಸಿಸ್ ವಿರುದ್ದ ಟೆಸ್ಟ್‌ನಲ್ಲಿ ಎರಡು ಶತಕವನ್ನು ಬಾರಿಸಿದ್ದಾರೆ. ಆ ಎರಡು ಕೂಡ ಮೆಲ್ಬರ್ನ್ ಅಂಗಳದಲ್ಲಿ ದಾಖಲಾಗಿದೆ. ಸಿಡ್ನಿ ಅಂಗಳಲ್ಲಿ ಮತ್ತೊಂದು ಶತಕ ದಾಖಲಾದರೆ ಆಸಿಸ್ ವಿರುದ್ಧ ಮೂರನೇ ಶತಕ ದಾಖಲಿಸಿದಂತಾಗುತ್ತದೆ. ಸೆಹ್ವಾಗ್ 3 ಶತಕವನ್ನು 22 ಪಂದ್ಯಗಳಲ್ಲಿ ದಾಖಲಿಸಿದರೆ ರಹಾನೆ 15 ಪಂದ್ಯಗಳಲ್ಲಿ ಎರಡು ಶತಕವನ್ನು ದಾಖಲಿಸಿದ್ದಾರೆ.

ಡೇವಿಡ್ ವಾರ್ನರ್

ಆಸ್ಟ್ರೇಲಿಯಾದ ಅಪಾಯಕಾರಿ ಆರಂಭಿಕ ಆಟಗಾರ ಡೇವಿಡ್ ವಾರ್ನರ್ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಕಣಕ್ಕಿಳಿಯುವುದು ಬಹುತೇಕ ನಿಶ್ಚಿತ. ಸಿಡ್ನಿ ಅಂಗಳ ಡೇವಿಡ್ ವಾರ್ನರ್‌ಗೆ ನೆಚ್ಚಿನ ಕ್ರೀಡಾಂಗಣವಾಗಿದ್ದು ಆಡಿರುವ 8 ಪಂದ್ಯಗಳಲ್ಲಿ 732 ರನ್ ದಾಖಲಿಸಿದ್ದಾರೆ. 66.54ರ ಸರಾಸರಿಯಲ್ಲಿ ಬ್ಯಾಟಿಂಗ್ ಮಾಡಿರುವ ವಾರ್ನರ್ 4 ಶತಕವನ್ನು ದಾಖಲಿಸಿದ್ದಾರೆ. ಮುಂದಿನ ಪಂದ್ಯದಲ್ಲಿ ಒಂದು ಶತಕವನ್ನು ದಾಖಲಿಸಿದರೆ ಡೇವಿಡ್ ಬೂನ್ ಹಾಗೂ ಗ್ರೆಗ್ ಚಾಪೆಲ್ ಹೆಸರಿನಲ್ಲಿರುವ ಒಂದೇ ಅಂಗಳದಲ್ಲಿ ಅತಿ ಹೆಚ್ಚು ಶತಕ ದಾಖಲಿಸಿದ ಸಾಧನೆಯನ್ನು ವಾರ್ನರ್ ಮೀರಿ ನಿಲ್ಲಲಿದ್ದಾರೆ.

ರೋಹಿತ್ ಶರ್ಮಾ

ಟೀಮ್ ಇಂಡಿಯಾದ ಅನುಭವಿ ಆಟಗಾರ ರೋಹಿತ್ ಶರ್ಮಾ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಕಣಕ್ಕಿಳಿಯುವ ನಿರೀಕ್ಷೆಯಿದೆ. ಈ ಪಂದ್ಯದಲ್ಲಿ ರೋಹಿತ್ ಶರ್ಮಾ ಟೆಸ್ಟ್ ಕ್ರಿಕೆಟ್‌ನಲ್ಲಿ ಅಪರೂಪದ ಮೈಲಿಗಲ್ಲೊಂದನ್ನು ಸಾಧಿಸುವ ಸಾಧ್ಯತೆಯಿದೆ. ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ 100 ಸಿಕ್ಸರ್(ಎಲ್ಲಾ ಮಾದರಿಯ ಕ್ರಿಕೆಟ್‌ನಲ್ಲಿ) ಸಿಡಿಸುವ ಅವಕಾಶ ರೋಹಿತ್ ಶರ್ಮಾ ಮುಂದಿದೆ. ಆಸಿಸ್ ವಿರುದ್ಧ ಎಲ್ಲಾ ಮಾದರಿಗಳಲ್ಲಿ 64 ಪಂದ್ಯಗಳನ್ನು ಆಡಿರುವ ಶರ್ಮಾ 99 ಸಿಕ್ಸರ್ ಸಿಡಿಸಿದ್ದಾರೆ.