'ಕಿರಿಕಿರಿ ಕೀಪರ್' ಪಂತ್‌ಗೆ ತಗಲಾಕ್ಕೊಂಡ ಟಿಮ್ ಪೈನೆ: ವೈರಲ್ ವಿಡಿಯೋ!

ತಾತ್ಕಾಲಿಕ ನಾಯಕ

7ನೇ ಕ್ರಮಾಂಕದಲ್ಲಿ ಬ್ಯಾಟ್‌ ಕೈಗೆತ್ತಿಕೊಂಡಿದ್ದ ಪೈನೆ ಕ್ರೀಸ್‌ನಲ್ಲಿದ್ದರು. ಆ ಹೊತ್ತು ಪಂತ್, 'ಮಯಾಂಕ್, ನೀವು ಯಾವತ್ತಾದ್ರೂ ತಾತ್ಕಾಲಿಕ ನಾಯಕನ ಬಗ್ಗೆ ಕೇಳಿದ್ದೀರಾ? ಪೈನೆ ಬರೀ ಮಾತು, ಮಾತನ್ನಷ್ಟೇ ಆಡಬಲ್ಲರು' ಎಂದರು. ಪಾಪ ಅತ್ತ ಪೈನೆ, 'ಶುರುವಾಯ್ತು ಇವ್ನ ಗೋಳು' ಅಂತ ಮನಸ್ಸಿನಲ್ಲೇ ಅಂದುಕೊಂಡ್ರೋ ಏನೋ. ಸುಮ್ಮನೆ ಬ್ಯಾಟಿಂಗ್ ಮಾಡುತ್ತಿದ್ರು.

ವಿಡಿಯೋ ವೈರಲ್

ಅಷ್ಟಕ್ಕೇ ನಿಲ್ಲಿಸದ ಪಂತ್ ಮತ್ತೆ, 'ನೀವು ಯಾವತ್ತಾದ್ರೂ ಟೆಂಪರರಿ ಕ್ಯಾಪ್ಟನ್ ಪದ ಕೇಳಿದ್ದೀರಾ ಮಯಾಂಕ್? ನಮ್ಮ ಮುಂದೆ ಇವತ್ತು ಹೊಸ ಅತಿಥಿಯೊಬ್ಬರಿದ್ದಾರೆ. ಅವರನ್ನು ಔಟ್ ಮಾಡಲು ನಾವೇನೂ ಮಾಡಬೇಕಾಗಿಲ್ಲ' ಎಂದೆಲ್ಲ ಕಾಲೆಳೆದರು. ಆಟದ ವೇಳೆ ಸೆರೆಯಾಗಿದ್ದ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಓಡಾಡುತ್ತಿದೆ.

ಪಂತ್‌ಗೆ ಕ್ಯಾಚಿತ್ತ ಪೈನೆ!

ಪಂತ್ ಕಾಮೆಂಟರಿ ಕಿರಿಕಿರಿ ಸಹಿಸಿಕೊಂಡೇ ಬ್ಯಾಟಿಂಗ್‌ ಮಾಡಿದ ಪೈನೆ 61.3ನೇ ಓವರ್‌ನಲ್ಲಿ ಜಡೇಜಾ ಎಸೆತದಲ್ಲಿ ಪಂತ್‌ ಕೈಗೇ ಕ್ಯಾಚಿತ್ತು ಹೊರ ನಡೆದರು. ವಿಕೆಟ್ ಒಪ್ಪಿಸುವಾಗ ಟಿಮ್ 26 ರನ್ ಗಳಿಸಿದ್ದರು. ನಾಲ್ಕನೇ ದಿನದಾಟದ ಅಂತ್ಯಕ್ಕೆ ಆಸೀಸ್ 85 ಓವರ್‌ನಲ್ಲಿ 8 ವಿಕೆಟ್ ಕಳೆದು 258 ರನ್ ಕಲೆ ಹಾಕಿತ್ತು. ಆಸೀಸ್‌ ಗೆಲ್ಲಲು ಇನ್ನೂ 141 ರನ್ ಗಳ ಅಗತ್ಯವಿತ್ತು. ಗಮ್ಮತ್ತಿನ ಸಂಗತಿಯಂದ್ರೆ ಡಿಸೆಂಬರ್ 27ರಂದು ಪೈನೆ ಕೂಡ ಪಂತ್‌ಗೆ ಹೀಗೇ ಕಾಲೆಳೆದಿದ್ರು.

ಕಿರಿಕಿರಿ ಕೀಪರ್ ಪಂತ್

ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಮೊದಲ ಟೆಸ್ಟ್ ಪಂದ್ಯದ ಕೊನೆಯ ದಿನದಾಟದ (ಡಿಸೆಂಬರ್ 10) ವೇಳೆ ಕಾಮೆಂಟರಿ ಕಿರಿಕಿರಿ ಶುರು ಮಾಡಿದ್ದು ಪಂತೆ. ಆಸ್ಟ್ರೇಲಿಯಾ ದ್ವಿತೀಯ ಇನ್ನಿಂಗ್ಸ್ ವೇಳೆ ಭಾರೀ ಜೋಶ್‌ನಲ್ಲಿದ್ದ ರಿಷಬ್ ಪಂತ್, ಕಮಿನ್ಸ್‌ ಅವರನ್ನು ಗಲಿಬಿಲಿಗೊಳಿಸಿದ್ದರು. ಅಂದ್ಹಾಗೆ ಆಸೀಸ್ ಕ್ರಿಕೆಟ್ ಇತಿಹಾಸದಲ್ಲೇ ಈಪರಿಯ 'ಕೀಪರ್ ಕಿರಿಕಿರಿ' ಹೊಸದಿರಬೇಕು ನೋಡಿ!