ಟಿ20 ವಿಶ್ವಕಪ್: 7 ವರ್ಷಗಳ ಹಿಂದಿನ ವಿಶ್ವದಾಖಲೆ ಮುರಿದ ಶೆಫಾಲಿ ವರ್ಮಾ!

ಪಂದ್ಯದ ಸಾರಾಂಶ

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡಿದ್ದ ಆಸ್ಟ್ರೇಲಿಯಾ ವನಿತಾ ತಂಡ, ಅಲಿಸಾ ಹೀಲಿ 75 (39 ಎಸೆತ), ಬೆತ್ ಮೂನಿ 78 (54 ಎಸೆತ) ರನ್‌ನೊಂದಿಗೆ 20 ಓವರ್‌ಗೆ 4 ವಿಕೆಟ್‌ ಕಳೆದು 184 ರನ್ ಮಾಡಿತ್ತು. ಗುರಿ ಬೆನ್ನತ್ತಿದ ಭಾರತದ ವನಿತೆಯರು 19.1 ಓವರ್‌ಗೆ ಎಲ್ಲಾ ವಿಕೆಟ್ ಕಳೆದು 99 ರನ್ ಬಾರಿಸಲಷ್ಟೇ ಶಕ್ತರಾದರು.

ಶೆಫಾಲಿ ವಿಶ್ವದಾಖಲೆ

ಕೇವಲ 16 ವರ್ಷ, 40 ದಿನ ವಯಸ್ಸಿನವರಾಗಿರುವ ಹರ್ಯಾಣದ ಶೆಫಾಲಿ ವರ್ಮಾ, ವಿಶ್ವಕಪ್‌ ಫೈನಲ್‌ನಲ್ಲಿ ಪಾಲ್ಗೊಂಡ ಅತೀ ಕಿರಿಯ ಆಟಗಾರ್ತಿಯಾಗಿ ವಿಶ್ವದಾಖಲೆ ಬರೆದಿದ್ದಾರೆ. ಅಷ್ಟೇ ಅಲ್ಲ ಪುರುಷರು ಮತ್ತು ಮಹಿಳಾ ವಿಭಾಗದಲ್ಲಿ ಸೃಷ್ಠಿಯಾಗಿದ್ದ ಈ ಹಿಂದಿನ ದಾಖಲೆಗಳನ್ನೂ ಸರಿಗಟ್ಟಿದ್ದಾರೆ. ಬರೀ ಕಿರಿಯ ಆಟಗಾರ್ತಿಯಷ್ಟೇ ಅಲ್ಲ, ಟೂರ್ನಿಯ ಅತ್ಯಧಿಕ ರನ್ ಪಟ್ಟಿಯಲ್ಲಿ 5ನೇ ಸ್ಥಾನ (163 ರನ್) ಕೂಡ ಪಡೆದಿದ್ದಾರೆ.

ಎರಡರಲ್ಲೂ ಶೆಫಾಲಿ ನಂ.1

ಪುರುಷರು ಮತ್ತು ಮಹಿಳೆಯರು ಅಷ್ಟೇ ಅಲ್ಲ, ಏಕದಿನ-ಟಿ20 ಎರಡೂ ಮಾದರಿಯಲ್ಲೂ ವಿಶ್ವಕಪ್ ಫೈನಲ್‌ನಲ್ಲಿ ಆಡಿದ ಅತೀ ಕಿರಿಯ ಆಟಗಾರ್ತಿಯಾಗಿ ಶೆಫಾಲಿ ಗಮನ ಸೆಳೆದಿದ್ದಾರೆ. ಈ ದಾಖಲೆ ಸಾಲಿನಲ್ಲಿ ದ್ವಿತೀಯ ಸ್ಥಾನದಲ್ಲಿ ವೆಸ್ಟ್ ಇಂಡೀಸ್‌ನ ಶಕ್ವಾನಾ ಕ್ವಿಂಟೈನ್ ಇದ್ದಾರೆ.

ದಾಖಲೆ ಪಟ್ಟಿಯ ಹೆಸರುಗಳು

ವಿಶ್ವಕಪ್‌ನಲ್ಲಿ ಅತೀ ಕಿರಿಯ ಆಟಗಾರರೆಂಬ ದಾಖಲೆ ಬರೆದವರೆಂದರೆ, ಭಾರತದ ಶೆಫಾಲಿ ವರ್ಮಾ (16 ವರ್ಷ, 40 ದಿನ, ಮಹಿಳಾ ಟಿ20, 2020), ವೆಸ್ಟ್ ಇಂಡೀಸ್‌ನ ಶಕ್ವಾನಾ ಕ್ವಿಂಟೈನ್ (17 ವರ್ಷ, 45 ದಿನ, ಮಹಿಳಾ ಏಕದಿ, 2013), ಪಾಕಿಸ್ತಾನದ ಮೊಹಮ್ಮದ್ ಅಮೀರ್ (17 ವರ್ಷ, 69 ದಿನ, ಪುರುಷರ ಟಿ20, 2009), ವೆಸ್ಟ್ ಇಂಡೀಸ್‌ನ ಹೇಲಿ ಮ್ಯಾಥ್ಯೂಸ್ (18 ವರ್ಷ, 15 ದಿನ, ಮಹಿಳಾ ಟಿ20, 2016).