ಭಾರತ vs ಆಸ್ಟ್ರೇಲಿಯಾ ಸರಣಿ: ದ್ವಿಪಕ್ಷೀಯ ಸರಣಿಗಳಲ್ಲೇ ದೊಡ್ಡ ಹೆಜ್ಜೆ, 120 ದೇಶಗಳಲ್ಲಿ ನೇರಪ್ರಸಾರ

ವಿಶ್ವ ಕ್ರಿಕೆಟ್ ಅಭಿಮಾನಿಗಳು ಅತ್ಯಂತ ನಿರೀಕ್ಷೆಯಿಂದ ಕಾಯುತ್ತಿರುವ ಭಾರತ ಹಾಗೂ ಆಸ್ಟ್ರೇಲಿಯಾ ನಡುವಿನ ಟೆಸ್ಟ್ ಸರಣಿಗೆ ಕ್ಷಣಗಣನೆ ಆರಂಭವಾಗಿದೆ. ಈ ಜಿದ್ದಾಜಿದ್ದಿನ ಕಾದಾಟವನ್ನು ನೋಡಲು ವಿಶ್ವದ ಕ್ರಿಕೆಟ್ ಅಭಿಮಾನಿಗಳು ಕಾತರಿಸುತ್ತಿದ್ದಾರೆ. ಹೀಗಾಗಿ ಈ ಸರಣಿ ನೇರಪ್ರಸಾರದ ವಿಚಾರದಲ್ಲಿ ವಿಶೇಷವಾದ ಸಾಧನೆಯೊಂದನ್ನು ಮಾಡಲಿದೆ.

ಇನ್‌ಸೈಡ್‌ ಸ್ಪೋರ್ಟ್ಸ್ ಮಾಡಿರುವ ವರದಿಯ ಪ್ರಕಾರ ಭಾರತ ಹಾಗೂ ಆಸ್ಟ್ರೇಲಿಯಾ ನಡುವಿನ ಈ ಟೆಸ್ಟ್ ಸರಣಿ ವಿಶ್ವಾದ್ಯಂತ ಸುಮಾರು 120 ದೇಶಗಳಲ್ಲಿ ನೇರಪ್ರಾರವಾಗಲಿದೆ. ದ್ವಿಪಕ್ಷೀಯ ಕ್ರಿಕೆಟ್‌ನಲ್ಲಿ ಇದೊಂದು ಅತ್ಯಂದ ದೊಡ್ಡ ಸಾಧನೆಯಾಗಿದ್ದು ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾ ನಡುವೆ ನಡೆಯುವ ಆ್ಯಶಸ್ ಸರಣಿಗಿಂತಲೂ ದೊಡ್ಡ ಸರಣಿಯನ್ನಾಗಿ ಮಾಡಿದೆ.

ಭಾರತದಲ್ಲಿ ನೇರಪ್ರಸಾರ: ಇನ್ನು ಆಸ್ಟ್ರೇಲಿಯಾ ಹಾಗೂ ಭಾರತ ನಡುವಿನ ಟೆಸ್ಟ್ ಸರಣಿಯ ನೇರಪ್ರಸಾರ ಭಾರತದಲ್ಲಿ ಸೋನಿ ಪಿಕ್ಚರ್ಸ್ ಸ್ಪೋರ್ಟ್ಸ್ ನೆಟ್‌ವರ್ಕ್‌ನಲ್ಲಿ ಪ್ರಸಾರವಾಗಲಿದೆ. ಭಾರತದಲ್ಲಿ ಅಧಿಕೃತವಾಗಿ ನಾಲ್ಕು ಭಾಷೆಗಳಲ್ಲಿ ಈ ಪಂದ್ಯದ ವೀಕ್ಷಕವಿವರಣೆಯಿರಲಿದೆ.

ಸೋನಿ ಟೆನ್ 1ನಲ್ಲಿ ಇಂಗ್ಲೀಷ್, ಸೋನಿ ಟೆನ್ 3ನಲ್ಲಿ ಹಿಂದಿ ಹಾಗೂ ಸೋನಿ ಸಿಕ್ಸ್ ಚಾನೆಲ್‌ಗಳಲ್ಲಿ ಇಂಗ್ಲೀಷ್ ತಮಿಳು ಹಾಗೂ ತೆಲುಗು ಭಾಷೆಯಲ್ಲಿ ನೇರಪ್ರಸಾರದ ಜೊತೆಗೆ ವೀಕ್ಷಕ ವಿವರಣೆ ಇರಲಿದೆ. ಶುಕ್ರವಾರ ಬೆಳಗ್ಗೆ 8:30ರಿಂದ ನೇರಪ್ರಸಾರ ಆರಂಭವಾಗಲಿದೆ.

ಏಷ್ಯಾದ ದೇಶಗಳಾದ ಅಪ್ಘಾನಿಸ್ತಾನ, ಬಾಂಗ್ಲಾದೇಶ, ಭೂತಾನ್, ಮಾರೀಷಸ್, ನೇಪಾಲ್ ಪಾಕಿಸ್ತಾನ ಹಾಗೂ ಶ್ರೀಲಂಕಾದಲ್ಲಿ ಸೋನಿ ನೆಟ್‌ವರ್ಕ್‌ನಲ್ಲೇ ಪಂದ್ಯದ ನೇರಪ್ರಸಾರವಾಗಲಿದೆ.