ಈ ರೋಹಿತ್ ಶರ್ಮಾನನ್ನು ನಾನು ಇಷ್ಟ ಪಡುತ್ತೇನೆ: ಟೀಮ್ ಇಂಡಿಯಾ ನಾಯಕನ ಬಗ್ಗೆ ಮಂಜ್ರೇಕರ್ ಪ್ರಶಂಸೆ

ಇದು ನನಗೆ ಇಷ್ಟವಾದ ರೋಹಿತ್ ಶರ್ಮಾ

"ನನಗೆ ಈ ರೋಹಿತ್ ಶರ್ಮಾ ಇಷ್ಟವಾಗುತ್ತಾರೆ. ಟಿ20 ಮಾದರಿಯಲ್ಲಿಯೂ ಅಷ್ಟೆ. ನೀವು ಆಡಬೇಕಿರುವುದು ಈ ರೀತಿಯಾಗಿ. ಹೀಗೆ ಆಡಿದಾಗ ಶತಕಗಳು ಅದರಷ್ಟಕ್ಕೇ ಬರುತ್ತವೆ. ಶತಕಗಳು ಆಟದ ಶೈಲಿಯ ಭಾಗವಾಗಿರಬೇಕು. ಇನ್ನು ಆರಂಭಿಕ ಆಟಗಾರರು ಇಷ್ಟು ಉತ್ತಮ ಅಡಿಪಾಯವನ್ನು ಒದಗಿಸಿದ ಬಳಿಕ ಕುಸಿತವನ್ನು ಕಂಡರೂ ಸ್ಕೋರ್‌ಬೋರ್ಡ್‌ನಲ್ಲಿ ಸಾಕಷ್ಟು ರನ್‌ಗಳು ಕಲೆಹಾಕಿತು. ಈ ರೋಹಿತ್ ಶರ್ಮಾ ನನಗೆ ಇಷ್ಟವಾಗುತ್ತಾರೆ" ಎಂದಿದ್ದಾರೆ ಸಂಜಯ್ ಮಂಜ್ರೇಕರ್.

ಅಂತಿಮ ಪಂದ್ಯದಲ್ಲಿ ಒಟ್ಟಾರೆ ಪ್ರದರ್ಶನದ ಬಗ್ಗೆ ಮಂಜ್ರೇಕರ್ ಮೆಚ್ಚುಗೆ

ಇನ್ನು ಮುಂದುವರಿದು ಮಾತನಾಡಿದ ಸಂಜಯ್ ಮಂಜ್ರೇಕರ್ ಅಂತಿಮ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಒಟ್ಟಾರೆ ಪ್ರದರ್ಶನದ ಬಗ್ಗೆಯೂ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. "ಟಾಸ್ ಸೋತು ಮೊದಲಿಗೆ ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟಾಗ ಯಾವಾಗಲೂ ಎದುರಾಳಿ ಬಹಳ ಸಮೀಪಕ್ಕೆ ಬರುತ್ತಿತ್ತು. ಆದರೆ ಇಂದು ಗೆದ್ದಿರುವ ಅಂತಿರವನ್ನು ನೋಡಿ. 90 ರನ್‌ಗಳಿಂದ ಗೆದ್ದಿದೆ. ಭಾರತದ ಬ್ಯಾಟರ್‌ಗಳು ಃಆಗೂ ಬೌಲರ್‌ಗಳು ಅದ್ಭುತವಾದ ಪ್ರದರ್ಶನ ನೀಡಿದ್ದಾರೆ" ಎಂದಿದ್ದಾರೆ ಸಂಜಯ್ ಮಂಜ್ರೇಕರ್.

ಭರ್ಜರಿ ಶತಕ ಸಿಡಿಸಿದ ರೋಹಿತ್

ಕಿವಿಸ್ ವಿರುದ್ಧದ ಅಂತಿಮ ಏಕದಿನ ಪಂದ್ಯದಲ್ಲಿ ಟೀಮ್ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಮೂರು ವರ್ಷಗಳ ಬಳಿಕ ಏಕದಿನ ಮಾದರಿಯಲ್ಲಿ ಶತಕ ಸಿಡಿಸಿ ಸಂಭ್ರಮಿಸಿದ್ದಾರೆ. 85 ಎಸೆತ ಎದುರಿಸಿದ ರೋಹಿತ್ 6 ಸಿಕ್ಸರ್ ಹಾಗೂ 9 ಬೌಂಡರಿ ನೆರವಿನೊಂದಿಗೆ 101 ರನ್‌ಗಳಿಸಿ ವಿಕೆಟ್ ಕಳೆದುಕೊಂಡರು. ಶುಬ್ಮನ್ ಗಿಲ್ 78 ಎಸೆತಗಳಲ್ಲಿ 5 ಸಿಕ್ಸರ್ ಹಾಗೂ 13 ಬೌಂಡರಿ ನೆರವಿನೊಂದಿಗೆ 112 ರನ್‌ಗಳನ್ನು ಗಳಿಸಿ ಔಟಾದರು. ಈ ಜೋಡಿ ಮೊದಲ ವಿಕೆಟ್‌ಗೆ ಭರ್ಜರಿ 212 ರನ್‌ಗಳ ಜೊತೆಯಾಟದಲ್ಲಿ ಭಾಗಿಯಾದರು. ಹೀಗಾಗಿ ಟೀಮ್ ಇಂಡಿಯಾ ಈ ಪಂದ್ಯದಲ್ಲಿ 315 ರನ್‌ಗಳ ಬೃಹತ್ ಮೊತ್ತ ಗಳಿಸಲು ಸಾಧ್ಯವಾಗಿತ್ತು.