ಆಸ್ಟ್ರೇಲಿಯಾ ಡೇ-ನೈಟ್ ಟೆಸ್ಟ್ ನಲ್ಲಿ ಟೀಮ್ ಇಂಡಿಯಾ ಆಡುತ್ತಿಲ್ಲ

ನವದೆಹಲಿ, ಮೇ 7: ಈ ವರ್ಷಾಂತ್ಯದಲ್ಲಿ ಆಸ್ಟ್ರೇಲಿಯಾ ಪ್ರವಾಸ ಸಂದರ್ಭ ನಡೆಸಲುದ್ದೇಶಿಸಿದ್ದ ಡೇ-ನೈಟ್ ಟೆಸ್ಟ್ ಪಂದ್ಯಾಟದಲ್ಲಿ ಭಾರತ ಕ್ರಿಕೆಟ್ ತಂಡ ಪಾಲ್ಗೊಳ್ಳುತ್ತಿಲ್ಲ ಎಂದು ಬಿಸಿಸಿಐಯು ಕ್ರಿಕೆಟ್ ಆಸ್ಟ್ರೇಲಿಯಾಕ್ಕೆ ಅಧಿಕೃತವಾಗಿ ತಿಳಿಸಿದೆ.

ಕ್ರಿಕೆಟ್ ಆಸ್ಟ್ರೇಲಿಯಾವು ತವರಿನಲ್ಲಿ ಪಿಂಕ್ ಬಾಲ್ ಟೆಸ್ಟ್ ನಡೆಸಲು ಉದ್ದೇಶಿಸಿತ್ತು. ಈ ಪಂದ್ಯಾಟಕ್ಕೆ ಟೀಮ್ ಇಂಡಿಯಾವನ್ನೂ ಆಹ್ವಾನಿಸಿತ್ತು. ಆದರೆ ಭಾರತದ ಕ್ರಿಕೆಟ್ ಮಂಡಳಿ ಸಾಂಪ್ರದಾಯಿಕ ಕೆಂಪು ಚೆಂಡು ಪಂದ್ಯದ ನಿಯಮ ಮೀರಿ ಪಿಂಕ್ ಬಾಲ್ ಪಂದ್ಯದಲ್ಲಿ ಪಾಲ್ಗೊಳ್ಳಲಾಗದು ಎಂದು ಕ್ರಿಕೆಟ್ ಆಸ್ಟ್ರೇಲಿಯಾಕ್ಕೆ ಹೇಳಿದೆ.

ರವಿಶಾಸ್ತ್ರಿ ಮುಂದಾಳತ್ವದ ಭಾರತ ಕ್ರಿಕೆಟ್ ತಂಡ ನಿರ್ವಹಣಾ ಸಮಿತಿಯು ಡೇ-ನೈಟ್ ಟೆಸ್ಟ್ ಪಂದ್ಯಾಟಕ್ಕಾಗಿ ಟೀಮ್ ಇಂಡಿಯಾಕ್ಕೆ ಸುಮಾರು 18 ತಿಂಗಳ ತರಬೇತಿಯ ಅವಶ್ಯಕತೆಯಿದೆ ಎಂದು ಸುಪ್ರೀಮ್ ಕೋರ್ಟ್ ನೇಮಿತ ಭಾರತ ಕ್ರಿಕೆಟ್ ಆಡಳಿತ ಸಮಿತಿಗೆ ತಿಳಿಸಿತ್ತು. ಅದರಂತೆ ಪಿಂಕ್ ಬಾಲ್ ಟೆಸ್ಟ್ ನಿಂದ ಭಾರತವೀಗ ಸಂಪೂರ್ಣ ಹಿಂದೆ ಸರಿಯುವ ನಿರ್ಧಾರ ಪ್ರಕಟಿಸಿದೆ.