ಮುಂಬೈ vs ಡೆಲ್ಲಿ ಫೈನಲ್‌ ಹಣಾಹಣಿ: 5 ಅಚ್ಚರಿಯ ಸತ್ಯ ಸಂಗತಿಗಳು!

1. ವಿಭಿನ್ನ ನಾಯಕತ್ವ

ಐಪಿಎಲ್ ಇತಿಹಾಸದಲ್ಲಿ ಫೈನಲ್‌ನಲ್ಲಿ ಅತೀ ಯಶಸ್ವಿ ನಾಯಕ ರೋಹಿತ್ ಶರ್ಮಾ ಮತ್ತು ಯುವ ನಾಯಕ ಶ್ರೇಯಸ್ ಅಯ್ಯರ್ ಮುಖಾಮುಖಿಯಾಗುತ್ತಿರುವುದು ಇದೇ ಮೊದಲ ಬಾರಿ. ಮುಂಬೈ ನಾಲ್ಕು ಬಾರಿ ಟ್ರೋಫಿ ಗೆದ್ದಿದ್ದರೆ, ಡೆಲ್ಲಿ ಫೈನಲ್‌ಗೆ ಪ್ರವೇಶಿಸುತ್ತಿರುವುದು ಇದೇ ಚೊಚ್ಚಲಬಾರಿ.

2. ದಾಖಲೆ ಮುರಿಯುವ ಅವಕಾಶ

ಡೆಲ್ಲಿ ನಾಯಕ ಶ್ರೇಯಸ್ ಐಯ್ಯರ್‌ಗೆ ರೋಹಿತ್ ಶರ್ಮಾ ಹೆಸರಿನಲ್ಲಿರುವ ದಾಖಲೆ ಮುರಿಯಲು ಅವಕಾಶವಿದೆ. ಐಪಿಎಲ್‌ ಫೈನಲ್‌ನಲ್ಲಿ ತಂಡ ಮುನ್ನಡೆಸಿ ಗೆದ್ದ ಅತೀ ಕಿರಿಯ ನಾಯಕ ಎಂಬ ದಾಖಲೆಯನ್ನು ರೋಹಿತ್ 2013ರಲ್ಲಿ ನಿರ್ಮಿಸಿದ್ದರು. ಈ ಬಾರಿ ಡೆಲ್ಲಿ ಗೆದ್ದರೆ ಶರ್ಮಾ ದಾಖಲೆ ಬದಿಗೆ ಸರಿಯಲಿದೆ.

3. ಫೈನಲ್‌ನಲ್ಲಿ ವಿಶೇಷ ದಾಖಲೆ

ಮುಂಬೈಯಲ್ಲಿ ಜನಿಸಿ ಮುಂಬೈ ವಿರುದ್ಧ ಐಪಿಎಲ್‌ನಲ್ಲಿ ನಾಯಕತ್ವ ವಹಿಸುತ್ತಿರುವ ಮೊದಲ ಆಟಗಾರ ಶ್ರೇಯಸ್ ಅಯ್ಯರ್. ಇದಕ್ಕೆ ವಿರುದ್ಧ ಅಂದರೆ, ಕರ್ನಾಟಕದಲ್ಲಿ ಜನಿಸಿ ಬೆಂಗಳೂರು ತಂಡವನ್ನು ಫೈನಲ್‌ನಲ್ಲಿ ಮುನ್ನಡೆಸಿದ ದಾಖಲೆ 2009ರಲ್ಲಿ ಕುಂಬ್ಳೆ ನಿರ್ಮಿಸಿದ್ದರು. ಇನ್ನು ಮುಂಬೈಯಲ್ಲಿ ಜನಿಸಿ ಮುಂಬೈಗೆ ಫೈನಲ್‌ನಲ್ಲಿ ನಾಯಕತ್ವ ವಹಿಸಿದ್ದ ದಾಖಲೆ 2010ರಲ್ಲಿ ಸಚಿನ್ ತೆಂಡೂಲ್ಕರ್ ನಿರ್ಮಿಸಿದ್ದರು.

4. ರೋಹಿತ್-ಶ್ರೇಯಸ್

ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ನಾಯಕತ್ವ ವಹಿಸದೆ ಐಪಿಎಲ್‌ ಫೈನಲ್‌ನಲ್ಲಿ ತಂಡ ಮುನ್ನಡೆಸಿದ ಭಾರತೀಯ ನಾಯಕರೆಂಬ ದಾಖಲೆ 2013ರಲ್ಲಿ ರೋಹಿತ್ ಬರೆದಿದ್ದರು. ಈಗ ಅಂದರೆ 2020ರಲ್ಲಿ ಶ್ರೇಯಸ್ ಐಯ್ಯರ್ ನಿರ್ಮಿಸಿದ್ದಾರೆ. ರೋಹಿತ್ 2013ರಲ್ಲಿ ಮತ್ತು ಶ್ರೇಯಸ್ 2020ರಲ್ಲಿ ಭಾರತವನ್ನು ಏಕದಿನ ಮತ್ತು ಟಿ20ಯಲ್ಲಿ ಪ್ರತಿನಿಧಿಸಿದ್ದರು. ಆದರೆ ಟೆಸ್ಟ್‌ನಲ್ಲಿ ಇಬ್ಬರೂ ಭಾರತ ಪ್ರತಿನಿಧಿಸಿರಲಿಲ್ಲ.

5. ಗೆದ್ದ ತಂಡದಲ್ಲಿದ್ದ ಆಟಗಾರರು

ಸದ್ಯ ಫೈನಲ್‌ಗೆ ಪ್ರವೇಶಿಸಿರುವ ಡೆಲ್ಲಿ ಕ್ಯಾಪಿಟಲ್ಸ್ ತಂಡದಲ್ಲಿ ಮಾಜಿ ಚಾಂಪಿಯನ್ಸ್ ತಂಡಗಳ ಮೂರು ಆಟಗಾರರಿದ್ದಾರೆ. ಅವರೆಂದರೆ ಶಿಖರ್ ಧವನ್ (ಸನ್ ರೈಸರ್ಸ್ ಹೈದರಾಬಾದ್-2016), ರವಿಚಂದ್ರನ್ ಅಶ್ವಿನ್ (2010 & 2011ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್) ಮತ್ತು ಅಕ್ಸರ್ ಪಟೇಲ್ (2013ರಲ್ಲಿ ಮುಂಬೈ ಇಂಡಿಯನ್ಸ್).