ಐಪಿಎಲ್ 2020: ಆಟಗಾರರ ಮೇಲೆ ನಾಡಾ, ಯುಎಇ ಹದ್ದಿನ ಕಣ್ಣು!

ನವದೆಹಲಿ, ಆಗಸ್ಟ್ 13: ನ್ಯಾಷನಲ್ ಆ್ಯಂಟಿ ಡೋಪಿಂಗ್ ಏಜೆನ್ಸಿ (ನಾಡಾ) ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್‌ನ ನ್ಯಾಷನಲ್ ಆ್ಯಂಟಿ ಡೋಪಿಂಗ್ ಕಮಿಟಿ (ನಾಡೊ) ಎರಡೂ ಜೊತೆಯಾಗಿ ಇಂಡಿಯನ್ ಪ್ರೀಮಿಯರ್ ಲೀಗ್‌ ಆಟಗಾರರತ್ತ ಹದ್ದಿನ ಕಣ್ಣಿಡಲಿವೆ.

ಐಪಿಎಲ್ ವೇಳೆ ಉದ್ದೀಪನ ಮದ್ದು ಪರೀಕ್ಷೆಗಾಗಿ ಆಟಗಾರರ ಮೂತ್ರದ ಮಾದರಿ ಪಡೆಯುವಾಗ ಕೊರೊನಾ ವೈರಸ್ ಬಗೆಗಿನ ಮಾರ್ಗಸೂಚಿಗಳನ್ನು ನಾಡಾ ಮತ್ತು ನಾಡೊ ಎರಡೂ ಪಾಲಿಸಲಿವೆ. ಉದ್ದೀಪನ ನಿಯಂತ್ರಣ ಅಧಿಕಾರಿಗಳು ಯುಎಇ ನಾಡೊದ ಸ್ಟ್ಯಾಂಡರ್ಸ್ ಆಪರೇಟಿಂಗ್ ಪ್ರೊಸೀಜರ್‌ಗೆ (ಸ್ಟ್ಯಾಂಡರ್ಡ್ ಆಪರೇಟಿಂಗ್ ಕಾರ್ಯವಿಧಾನಗಳು) ಒತ್ತು ನೀಡಲಿದೆ.

ಬಲ್ಲ ಮಾಹಿತಿಯ ಪ್ರಕಾರ, ನಾಡಾ ಮತ್ತು ಯುಎಇ ಎರಡೂ ಕೂಡ ಉದ್ದೀಪನ ಸೇವನೆ ನಿಯಂತ್ರಣಕ್ಕೆ ಒತ್ತು ನೀಡಿ ಕಾರ್ಯಾಚರಿಸಲಿವೆ. ಈ ಬಗ್ಗೆ ಎರಡರ ಮಧ್ಯೆಯೂ ಮಾತುಕತೆಗಳು ನಡೆದಿವೆ. ಆಟಗಾರರನ್ನು ಮುಖ್ಯವಾಗಿರಿಸಿ ಪರೀಕ್ಷೆ ನಡೆಸಲಾಗುತ್ತದೆ. ಯುಎಇಯಲ್ಲಿದ್ದು ಸ್ಪರ್ಧೆಯಲ್ಲಿ ಪಾಲ್ಗೊಳ್ಳುವ ಮತ್ತು ಪಾಲ್ಗೊಳ್ಳದ ಎರಡೂ ಆಟಗಾರರ ಮೇಲೆ ನಿಗಾ ಇಡಲಾಗುತ್ತದೆ ಎಂದು ತಿಳಿದು ಬಂದಿದೆ.

ಯುಎಇಯಲ್ಲಿ ಸೆಪ್ಟೆಂಬರ್ 19ರಿಂದ ಐಪಿಎಲ್ ಆರಂಭಗೊಳ್ಳಲಿದೆ. ದುಬೈ, ಅಬುಧಾಬಿ ಮತ್ತು ಶಾರ್ಜಾ ತಾಣಗಳಲ್ಲಿ ಪಂದ್ಯಗಳು ನಡೆಯಲಿವೆ. ನವೆಂಬರ್ 10ರಂದು ಫೈನಲ್ ಪಂದ್ಯದೊಂದಿಗೆ ಐಪಿಎಲ್‌ಗೆ ತೆರೆ ಬೀಳಲಿದೆ.