ಪಡಿಕ್ಕಲ್ ಪದಾರ್ಪಣೆಗೆ ಅರ್ಧ ಶತಕದ ಮೆರುಗು: ಐಪಿಎಲ್‌ನಲ್ಲೂ ಸಂಪ್ರದಾಯ ಮುಂದುವರಿಸಿದ ಕನ್ನಡಿಗ!

ಪಡಿಕ್ಕಲ್ ಮುಂದೆ ಫಿಂಚ್ ಮಂಕು

ಇಂದಿನ ಪಂದ್ಯದ ಮೂಲಕ ಆಸ್ಟ್ರೇಲಿಯಾ ನಾಯಕ ಆರೋನ್ ಫಿಂಚ್ ಕೂಡ ಆರ್‌ಸಿಬಿ ತಂಡಕ್ಕೆ ಪದಾರ್ಪಣೆಯನ್ನು ಮಾಡಿದದರು. ಫಿಂಚ್‌ಗೆ ಆರಂಭಿಕನಾಗಿ ನಿರೀಕ್ಷೆಯಂತೆಯೇ ಪಡಿಕ್ಕಲ್ ಸಾಥ್ ನೀಡಿದ್ದರು. ಆದರೆ ಪಡಿಕ್ಕಲ್ ಕೌಶಲ್ಯಯುತ ಆಟಕ್ಕೆ ಅನುಭವಿ ಫಿಂಚ್ ಆಟವೇ ನೀರಸವೆನಿಸಿತ್ತು. ದೇವದತ್ ಪಡಿಕ್ಕಲ್ ಮುಂದೆ ಫಿಂಚ್ ಅಕ್ಷರಶಃ ಮಂಕಾಗಿದ್ದರು. 42 ಎಸೆತ ಎದುರಿಸಿದ ಪಡಿಕ್ಕಲ್ ಭರ್ಜರಿ 56 ರನ್ ಗಳಿಸಿ ಔಟಾದರು.

ಪಡಿಕ್ಕಲ್ ಪದಾರ್ಪಣೆ ಹಾಗೂ ಅರ್ಧ ಶತಕ

ದೇವದತ್ ಪಡಿಕ್ಕಲ್ ಪದಾರ್ಪಣಾ ಪಂದ್ಯದಲ್ಲಿ ಅರ್ಧ ಶತಕವನ್ನು ಬಾರಿಸುವ ಸಂಪ್ರದಾಯವನ್ನೇ ಹೊಂದಿದ್ದಾರೆ. 2018ರಲ್ಲಿ ಮಹಾರಾಷ್ಟ್ರದ ವಿರುದ್ಧ ರಣಜಿ ಪಂದ್ಯದ ಪದಾರ್ಪಣಾ ಪಂದ್ಯವನ್ನಾಡಿದ ಪಡಿಕ್ಕಲ್ ಎರಡನೇ ಇನ್ನಿಂಗ್ಸ್‌ನಲ್ಲಿ 77 ರನ್‌ಗಳಿಸಿದ್ದರು. ಜಾರ್ಖಂಡ್ ತಂಡದ ವಿರುದ್ಧ 2019ರಲ್ಲಿ ವಿಜಯ್ ಹಝಾರೆ ಟೂರ್ನಿಯಲ್ಲಿ ಲಿಸ್ಟ್ 'ಎ'ಗೆ ಪದಾರ್ಪಣೆ ಮಾಡಿದ ದೇವದತ್ ಪಡಿಕ್ಕಲ್ 58 ರನ್ ಬಾರಿಸಿದ್ದರು. ಉತ್ತರಾಖಂಡ್ ವಿರುದ್ಧ 2019ರಲ್ಲಿ ಟಿ20 ಪಂದ್ಯಕ್ಕೆ ಪದಾರ್ಪಣೆ ಮಾಡಿ ಅಲ್ಲಿ 53 ರನ್ ಗಳಿಸಿ ಅಜೇಯರಾಗುಳಿದಿದ್ದರು. ಈಗ ಐಪಿಎಲ್‌ನಲ್ಲೂ ಅರ್ಧ ಶತಕದ ಮೂಲಕವೇ ಪದಾರ್ಪಣೆಯನ್ನು ಮಾಡಿದ್ದಾರೆ.

ಅರ್ಧ ಶತಕ ಗಳಿಸಿದ 3ನೇ ಕಿರಿಯ ಆಟಗಾರ

20 ವರ್ಷ 76 ದಿನ ವಯಸ್ಸಿನ ಪಡಿಕ್ಕಲ್ ಐಪಿಎಲ್‌ನಲ್ಲಿ ಅರ್ಧ ಶತಕವನ್ನು ಗಳಿಸಿದ 3ನೇ ಕಿರಿಯ ಆಟಗಾರ ಎಂಬ ದಾಖಲೆಗೂ ಪಾತ್ರರಾಗಿದ್ದಾರೆ. ಶ್ರೀವತ್ಸ ಗೋದ್ವಾಮಿ(52ರನ್) ಹಾಗೂ ಮನೀಷ್ ಪಾಂಡೆ (119ರನ್) ಗಳಿಸಿ ಈ ಪಟ್ಟಿಯಲ್ಲಿ ಮೊದಲ ಎರಡು ಸ್ಥಾನದಲ್ಲಿದ್ದಾರೆ. ಈ ಇಬ್ಬರೂ ಹದಿಹರೆಯಲ್ಲೇ ಈ ಸಾಧನೆಯನ್ನು ಮಾಡಿದ್ದರು.