ಕ್ರಿಸ್ ಗೇಲ್ ಕಣಕ್ಕಿಳಿಯದ ಬಗ್ಗೆ ಪಂಜಾಬ್ ತಂಡಕ್ಕೆ ಎಚ್ಚರಿಕೆ ನೀಡಿದ ಸುನಿಲ್ ಗವಾಸ್ಕರ್

ಗೈಲ್ ಅಲಭ್ಯತೆಗೆ ಕೋಚ್ ಕುಂಬ್ಳೆ ನೀಡಿದ್ರು ಕಾರಣ

"ಕ್ರಿಸ್ ಗೇಲ್ ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ದದ ಪಂದ್ಯದಲ್ಲಿ ಕಣಕ್ಕಿಳಿಯ ಬೇಕಾಗಿತ್ತು. ಆದರೆ ಕಳೆದ ಕೆಲ ದಿನಗಳಿಂದ ಗೇಲ್‌ಗೆ ಫುಡ್ ಪಾಯ್ಸನ್ ಅಗಿರುವ ಕಾರಣ ಅವರು ತುಂಬಾ ಬಳಲಿದ್ದಾರೆ" ಎಂದು ಕಿಂಗ್ಸ್ ಇಲೆವೆನ್ ತಂಡದ ಮುಖ್ಯ ಕೋಚ್ ಅನಿಲ್ ಕುಂಬ್ಳೆ ಕ್ರಿಸ್ ಗೇಲ್ ಅಲಭ್ಯತೆಯ ಬಗ್ಗೆ ಕಾರಣವನ್ನು ನೀಡಿದ್ದಾರೆ.

ಎಚ್ಚರಿಕೆ ನೀಡಿದ ಗವಾಸ್ಕರ್

ಕ್ರಿಸ್ ಗೇಲ್ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದಲ್ಲಿ ಈ ಬಾರಿಯ ಆಡುವ ಬಳಗದಲ್ಲಿ ಒಂದು ಬಾರಿಯೂ ಕಾಣಿಸಿಕೊಂಡಿಲ್ಲ. ಹೀಗಾಗಿ ತುಂಬಾ ತಡವಾಗಿ ನಿರ್ಧಾರವನ್ನು ತೆಗೆದುಕೊಂಡು ಅವಕಾಶ ಕೈಮೀರಿ ಹೋಗುವ ಮುನ್ನ ತಂಡ ಎಚ್ಚೆತ್ತುಕೊಳ್ಳಬೇಕು. ಅನುಭವಿ ಆಟಗಾರನನ್ನು ಶೀಘ್ರವಾಗಿ ಆಡುವ ಬಳಗದಲ್ಲಿ ಸೇರ್ಪಡೆಗೊಳಿಸಬೇಕು ಎಂದು ಗವಾಸ್ಕರ್ ಪ್ರತಿಕ್ರಿಯಿಸಿದ್ದಾರೆ.

ಗೇಲ್ ಆಗಮನ ಕಿಂಗ್ಸ್‌ಗೆ ಬಲ

ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ಆಡುವ ಬಳಗದಲ್ಲಿ ಕಾಣಿಸಿಕೊಳ್ಳದ ಕ್ರಿಸ್ ಗೇಲ್ ಸತತ 6 ಪಂದ್ಯಗಳಿಂದ ಹೊರಗುಳಿದಂತಾಗಿದೆ. ಐಪಿಎಲ್‌ನಲ್ಲಿ ಕ್ರಿಸ್ ಗೇಲ್ ಸಾಕಷ್ಟು ದಾಖಲೆಗಳನ್ನು ಹೊಂದಿದ್ದು ಐಪಿಎಲ್‌ನ ಟಾಪ್ 10 ರನ್‌ ಗಳಿಸಿದವರ ಪಟ್ಟಿಯಲ್ಲಿ ಕಾಣಿಸಿಕೊಂಡಿದ್ದಾರೆ. ಐಪಿಎಲ್‌ನಲ್ಲಿ ಗೇಲ್ ಹೆಸರಿನಲ್ಲಿ 6 ಶತಕಗಳು ಸಿಡಿದಿವೆ. ಸತತ ಸೋಲಿನಿಂದ ಕಂಗೆಟ್ಟಿರುವ ರಾಹುಲ್ ಪಡೆಗೆ ಗೇಲ್ ಆಗಮನ ಬಲ ನೀಡಬಹುದು ಎಂಬುದು ಕ್ರಿಕೆಟ್ ಪಂಡಿತರ ಹಾಗೂ ಅಭಿಮಾನಿಗಳ ನಿರೀಕ್ಷೆ.

ಗೇಲ್ ಆಗಮನಕ್ಕೆ ಇದು ಸರಿಯಾದ ಸಮಯ

ಗೇಲ್ ಕಣಕ್ಕಿಳಿಯದ ಬಗ್ಗೆ ಮಾತನಾಡಿದ ಸುನಿಲ್ ಗವಾಸ್ಕರ್ "ಗೇಲ್ ತಂಡಕ್ಕೆ ಸೇರಿಕೊಳ್ಲುವುದನ್ನು ನಾನು ಖಂಡಿತಾ ಬಯಸುತ್ತೇನೆ. ಎಡಗೈ ಆಟಗಾರನ ಸ್ಥಾನವನ್ನು ಅವರು ತುಂಬ ಬಲ್ಲರು. ಗ್ಲೆನ್ ಮ್ಯಾಕ್ಸ್‌ವೆಲ್ ಉತ್ತಮ ಲಯದಲ್ಲಿಲ್ಲ. ಗೇಲ್ ಸೇರ್ಪಡೆಗೆ ಇದು ಸರಿಯಾದ ಸಮಯ. ಮುಂದಿನ ಒಂದೆರಡು ಪಂದ್ಯಗಳ ಒಳಗೆ ಗೇಲ್ ಆಡುವ ಬಳಗದಲ್ಲಿ ಸೇರಿಕೊಳ್ಳಲೇ ಬೇಕು" ಎಂದು ಗವಾಸ್ಕರ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.