ಈ ಬಾರಿಯ ಐಪಿಎಲ್ ಟೂರ್ನಿಯಲ್ಲಿ ಕೋಟಿ ಕೋಟಿ ಪಡೆದು ಕಳಪೆ ಪ್ರದರ್ಶನ ನೀಡಿದ ಆಟಗಾರರು!

1. ಜೇ ರಿಚರ್ಡ್ಸನ್ : ಪಂಜಾಬ್ ಕಿಂಗ್ಸ್ (14 ಕೋಟಿ)

ಪಂಜಾಬ್ ಕಿಂಗ್ಸ್ ತಂಡದ ಬೌಲಿಂಗ್ ವಿಭಾಗವನ್ನು ಬಲಪಡಿಸಲು ಜೇ ರಿಚರ್ಡ್ಸನ್ ಅವರನ್ನು ಬರೋಬ್ಬರಿ 14 ಕೋಟಿ ರೂಪಾಯಿಗಳಿಗೆ ಖರೀದಿಸಲಾಯಿತು. ಆದರೆ ಪ್ರಸ್ತುತ ಟೂರ್ನಿಯಲ್ಲಿ 3 ಪಂದ್ಯಗಳನ್ನಾಡಿದ ರಿಚರ್ಡ್ಸನ್ ಕೇವಲ 3 ವಿಕೆಟ್‍ಗಳನ್ನು ಮಾತ್ರ ಪಡೆದು ಕಳಪೆ ಪ್ರದರ್ಶನ ನೀಡಿದ್ದಾರೆ.

2. ಟಾಮ್ ಕರನ್ : ಡೆಲ್ಲಿ ಕ್ಯಾಪಿಟಲ್ಸ್ ( 5.25 ಕೋಟಿ )

ಇಂಗ್ಲೆಂಡ್ ವೇಗಿ ಟಾಮ್ ಕರನ್ ಅವರನ್ನು ಡೆಲ್ಲಿ ಕ್ಯಾಪಿಟಲ್ಸ್ ತಂಡ 5.25 ಕೋಟಿ ರೂಪಾಯಿಗಳನ್ನು ನೀಡಿ ಖರೀದಿಸಿತ್ತು ಆದರೆ ಟಾಮ್ ಕರನ್ ಪ್ರಸ್ತುತ ಐಪಿಎಲ್ ಟೂರ್ನಿಯಲ್ಲಿ 2 ಪಂದ್ಯಗಳನ್ನಾಡಿ ಕೇವಲ ಒಂದೇ ಒಂದು ವಿಕೆಟ್ ಪಡೆಯಲಷ್ಟೇ ಶಕ್ತವಾದರು. ತದನಂತರ ಟಾಮ್ ಕರನ್ ಅವರಿಗೆ ಹೆಚ್ಚಿನ ಪಂದ್ಯಗಳಲ್ಲಿ ಆಡಲು ಅವಕಾಶವನ್ನೇ ನೀಡಲಿಲ್ಲ. ಟಾಮ್ ಕರನ್ ಅವರಿಗಿಂತ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಭಾಗವಾಗಿದ್ದ ಅನ್‌ಕ್ಯಾಪ್ಡ್ ಬೌಲರ್ ಅವೇಶ್ ಖಾನ್ 8 ಪಂದ್ಯಗಳನ್ನಾಡಿ 14 ವಿಕೆಟ್ ಪಡೆದು ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಪರ ಮಿಂಚಿದರು. ಡೆಲ್ಲಿ ಕ್ಯಾಪಿಟಲ್ಸ್ ಅವೇಶ್ ಖಾನ್ ಅವರನ್ನು 70 ಲಕ್ಷಕ್ಕೆ ಖರೀದಿಸಿತ್ತು.

3. ರಿಲೇ ಮೆರೆಡಿತ್ : ಪಂಜಾಬ್ ಕಿಂಗ್ಸ್ ( 8 ಕೋಟಿ )

ರಿಲೇ ಮೆರೆಡಿತ್ ಪ್ರಸ್ತುತ ಐಪಿಎಲ್ ಟೂರ್ನಿಯಲ್ಲಿ ಕಳಪೆ ಪ್ರದರ್ಶನ ನೀಡಿದ ಮತ್ತೊಬ್ಬ ಬೌಲರ್. ಆಸ್ಟ್ರೇಲಿಯಾದ ಈ ಅನ್‌ಕ್ಯಾಪ್ಡ್ ಆಟಗಾರನನ್ನು ಪಂಜಾಬ್ ಕಿಂಗ್ಸ್ ತಂಡ 8 ಕೋಟಿಗೆ ಖರೀದಿಸಿತ್ತು. ಆದರೆ ಮೆರೆಡಿತ್ 5 ಪಂದ್ಯಗಳನ್ನಾಡಿ ಗಳಿಸಿದ್ದು ಕೇವಲ 4 ವಿಕೆಟ್‍ಗಳು.

4. ಶಿವಮ್ ದುಬೆ : ರಾಜಸ್ಥಾನ್ ರಾಯಲ್ಸ್ ( 4.4 ಕೋಟಿ )

ರಾಜಸ್ಥಾನ್ ರಾಯಲ್ಸ್ ತಂಡದ ಆಲ್‌ರೌಂಡರ್ ಶಿವಮ್ ದುಬೆ ಪ್ರಸ್ತುತ ಐಪಿಎಲ್ ಟೂರ್ನಿಯಲ್ಲಿ 6 ಪಂದ್ಯಗಳನ್ನಾಡಿ 145 ರನ್ ಗಳಿಸಿದರು, ಆದರೆ ದುಬೆಗೆ ಬೌಲಿಂಗ್ ಮಾಡುವ ಅವಕಾಶವೇ ಸಿಗಲಿಲ್ಲ. ರಾಜಸ್ಥಾನ್ ರಾಯಲ್ಸ್ ತಂಡದ ಪರ ದುಬೆ ಟೂರ್ನಿಯಲ್ಲಿ 145 ರನ್ ಗಳಿಸಿದರೂ ಕೂಡ ತಂಡಕ್ಕೆ ಅಗತ್ಯವಿದ್ದ ಸಂದರ್ಭದಲ್ಲಿ ಉತ್ತಮ ಬ್ಯಾಟಿಂಗ್ ಮಾಡುವಲ್ಲಿ ವಿಫಲರಾದರು.

5. ಕೈಲ್ ಜೆಮಿಸನ್ : ರಾಯಲ್ ಚಾಲೆಂಜರ್ಸ್ ಬೆಂಗಳೂರು ( 15 ಕೋಟಿ )

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಅತಿ ದುಬಾರಿ ಆಟಗಾರ ಕೈಲ್ ಜೆಮಿಸನ್ ಪ್ರಸ್ತುತ ಟೂರ್ನಿಯಲ್ಲಿ 7 ಪಂದ್ಯಗಳನ್ನಾಡಿ 9 ವಿಕೆಟ್ ಪಡೆದು ಸಾಧಾರಣವಾದ ಪ್ರದರ್ಶನವನ್ನು ನೀಡಿದರು. 15 ಕೋಟಿಗೆ ತಕ್ಕಂತ ಪ್ರದರ್ಶನವನ್ನೇನೂ ಜೆಮಿಸನ್ ನೀಡಲಿಲ್ಲ. ಇತ್ತ ಬೆಂಗಳೂರು ತಂಡದ ಅನ್‌ಕ್ಯಾಪ್ಡ್ ಬೌಲರ್ ಹರ್ಷಲ್ ಪಟೇಲ್ ಕೇವಲ 20 ಲಕ್ಷ ಪಡೆದು ಜೆಮಿಸನ್ ಆಡಿದ್ದಷ್ಟೇ ಪಂದ್ಯಗಳನ್ನಾಡಿ 17 ವಿಕೆಟ್ ಪಡೆದು ಮಿಂಚಿದರು.