ಐಪಿಎಲ್ 2021 : ಟೂರ್ನಿಯನ್ನು ಮುಂದುವರೆಸಲು ಈ ದೇಶದಿಂದ ಸಿಕ್ತು ಗ್ರೀನ್ ಸಿಗ್ನಲ್

ಇಂಗ್ಲೆಂಡ್‌ನಲ್ಲಿಯೇ ಐಪಿಎಲ್ ನಡೆಸಿ

ಕೊರೊನಾ ಕಾರಣದಿಂದಾಗಿ ಅರ್ಧಕ್ಕೆ ನಿಂತಿರುವ ಐಪಿಎಲ್ ಟೂರ್ನಿಯನ್ನು ಇಂಗ್ಲೆಂಡ್‌ನಲ್ಲಿಯೇ ನಡೆಸಲಿ ಎಂದು ಎಂಸಿಸಿ, ಸರ್ರೆ, ವಾರ್ವಿಕ್‌ಷೈರ್ ಮತ್ತು ಲಂಕಾಷೈರ್ ಕೌಂಟಿಗಳು ಇಂಗ್ಲೆಂಡ್ ಕ್ರಿಕೆಟ್ ಬೋರ್ಡ್‌ಗೆ ಪತ್ರವನ್ನು ಬರೆದು ತಿಳಿಸಿವೆ.

ಎರಡೇ ವಾರದಲ್ಲಿ ಐಪಿಎಲ್ ಮುಗಿಯುತ್ತದೆ

ಇಂಗ್ಲೆಂಡ್ ನೆಲದಲ್ಲಿ ಐಪಿಎಲ್ ನಡೆಸಲಿ ಎಂದು ಪ್ರಸ್ತಾಪಿಸಿರುವ ಕೌಂಟಿಗಳು ಎರಡೇ ವಾರದಲ್ಲಿ ಐಪಿಎಲ್ ಟೂರ್ನಿಯನ್ನು ಮುಗಿಸಿಕೊಡುತ್ತೇವೆ ಎಂದು ಹೇಳಿವೆ. ಪಂದ್ಯಗಳ ನಡುವೆ ಅಂತರ ನೀಡದೆ ದಿನಕ್ಕೆ 2-3 ಪಂದ್ಯಗಳನ್ನು ಆಯೋಜಿಸಿ ವೇಗವಾಗಿ ಎರಡು ವಾರಗಳಲ್ಲಿ ಐಪಿಎಲ್ ಮುಗಿಸುವುದಾಗಿ ಕೌಂಟಿ ಕ್ರಿಕೆಟ್ ಕ್ಲಬ್‌ಗಳು ತಿಳಿಸಿವೆ.

ಯುಎಇಗಿಂತ ಇಂಗ್ಲೆಂಡ್‌ನಲ್ಲಿಯೇ ಉತ್ತಮ

ಭಾರತದಲ್ಲಿ ಕೊರೊನಾ ದಿನದಿಂದ ದಿನಕ್ಕೆ ಹೆಚ್ಚಳವಾಗುತ್ತಿರುವ ಕಾರಣ ಯುಎಇಗೆ ಟಿ ಟ್ವೆಂಟಿ ವಿಶ್ವಕಪ್ ಸ್ಥಳಾಂತರವಾಗುವುದು ಬಹುತೇಕ ಖಚಿತವಾಗಿದೆ. ಹೀಗಾಗಿ ಇಂಗ್ಲೆಂಡ್‌ನಲ್ಲಿ ಐಪಿಎಲ್ ಉಳಿದ ಪಂದ್ಯಗಳನ್ನು ನಡೆಸುವುದರಿಂದ ಯುಎಇ ಪಿಚ್‌ಗಳು ಟಿ ಟ್ವೆಂಟಿ ವಿಶ್ವಕಪ್ ಆಡಲು ತಾಜಾ ಅನುಭವವನ್ನು ನೀಡಲಿವೆ ಎಂದು ಇಂಗ್ಲೆಂಡ್ ಕೌಂಟಿಗಳು ತಿಳಿಸಿವೆ.

ಸೆಪ್ಟೆಂಬರ್‌ನಲ್ಲಿಯೇ ಐಪಿಎಲ್

ಒಂದುವೇಳೆ ಬಿಸಿಸಿಐ ಐಪಿಎಲ್ ಪಂದ್ಯಗಳನ್ನು ನಮ್ಮಲ್ಲಿ ನಡೆಸಲು ಒಪ್ಪಿಗೆ ಸೂಚಿಸಿದರೆ ಸೆಪ್ಟೆಂಬರ್ ತಿಂಗಳಿನಲ್ಲಿಯೇ ಐಪಿಎಲ್ ಆತಿಥ್ಯವನ್ನು ವಹಿಸಿಕೊಳ್ಳಲು ನಾವು ಸಿದ್ಧ ಎಂದು ಇಂಗ್ಲೆಂಡ್ ಕೌಂಟಿ ಕ್ರಿಕೆಟ್‍ ಕ್ಲಬ್‌ಗಳು ಪ್ರಸ್ತಾಪಿಸಿವೆ.

ಇಷ್ಟೆಲ್ಲಾ ಅಂಶಗಳನ್ನು ಹೆಸರಿಸಿ ಪ್ರಸ್ತುತ ಐಪಿಎಲ್ ಟೂರ್ನಿಯ ಉಳಿದ ಪಂದ್ಯಗಳ ಆತಿಥ್ಯ ವಹಿಸಲು ಮುಂದೆ ಬಂದಿರುವ ಇಂಗ್ಲೆಂಡ್ ಕ್ರಿಕೆಟ್ ಕೌಂಟಿ ಕ್ಲಬ್‌ಗಳ ಈ ಪ್ರಸ್ತಾಪವನ್ನು ಬಿಸಿಸಿಐ ಒಪ್ಪಿಕೊಳ್ಳುತ್ತಾ ಎಂಬುದನ್ನು ಕಾದು ನೋಡಬೇಕು.