ಇಂಡಿಯನ್ ಪ್ರೀಮಿಯರ್ ಲೀಗ್ 2021ರ ಆರಂಭದ ದಿನಾಂಕ ಪ್ರಕಟ

ನವದೆಹಲಿ: 2021ರ ಇಂಡಿಯನ್ ಪ್ರೀಮಿಯರ್ ಲೀಗ್ ಆರಂಭ ಮತ್ತು ಅಂತ್ಯದ ದಿನಾಂಕ ಪ್ರಕಟವಾಗಿದೆ. ಭಾರತದ ಅದ್ದೂರಿ ಕ್ರಿಕೆಟ್ ಟೂರ್ನಿ ಏಪ್ರಿಲ್ 9ಕ್ಕೆ ಆರಂಭಗೊಂಡು ಮೇ 30ರಂದು ಫೈನಲ್ ನೊಂದಿಗೆ ಅಂತ್ಯಗೊಳ್ಳಲಿದೆ ಎಂದು ವರದಿಯೊಂದು ಹೇಳಿದೆ.

14ನೇ ಆವೃತ್ತಿಯ ಐಪಿಎಲ್ ಟೂರ್ನಿ ಈ ಸಾರಿ ಭಾರತದಲ್ಲೇ ನಡೆಯಲಿದೆ. ಇಂಡಿಯಾ ಟುಡೇ ವರದಿಯ ಪ್ರಕಾರ ಏಪ್ರಿಲ್ 9ರಂದು ಟೂರ್ನಿ ಆರಂಭಗೊಂಡರೆ ಮೇ 30ರಂದು ಪ್ರಶಸ್ತಿ ಸುತ್ತಿನ ಪಂದ್ಯ ನಡೆಯಲಿದೆ.

ವರದಿಯ ಪ್ರಕಾರ, ಬೋರ್ಡ್ ಆಫ್ ಕಂಟ್ರೋಲ್‌ ಫಾರ್ ಕ್ರಿಕೆಟ್ ಇನ್ ಇಂಡಿಯಾ (ಬಿಸಿಸಿಐ) ಐಪಿಎಲ್ ಗಾಗಿ 6 ತಾಣಗಳನ್ನು ಅಂತಿಮಗೊಳಿಸಿದೆ ಎನ್ನಲಾಗಿದೆ.

ಮುಂಬೈ, ದೆಹಲಿ, ಕೋಲ್ಕತ್ತಾ, ಚೆನ್ನೈ, ಬೆಂಗಳೂರು ಮತ್ತು ಅಹ್ಮದಾಬಾದ್ ತಾಣಗಳು 2021ರ ಐಪಿಎಲ್ ಗೆ ಆತಿಥ್ಯ ವಹಿಸಲಿದೆ. 52 ದಿನಗಳ ಟೂರ್ನಿ ಇದಾಗಿರಲಿದ್ದು ಒಟ್ಟು 60 ಪಂದ್ಯಗಳು ನಡೆಯಲಿವೆ ಎಂದು ತಿಳಿದು ಬಂದಿದೆ.