ಧೋನಿ, ಹಾರ್ದಿಕ್ ಅಲ್ಲ; ಈ ಐಪಿಎಲ್‌ನ ಬೆಸ್ಟ್ ಕ್ಯಾಪ್ಟನ್ ಈತನೇ ಎಂದ ಮೈಕಲ್ ವಾನ್

ಆರ್‌ಸಿಬಿ ನಾಯಕನನ್ನು ಹೆಸರಿಸಿದ ಮೈಕಲ್ ವಾನ್

ಒಂದಲ್ಲಾ ಒಂದು ಕಾರಣಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯವಾಗಿದ್ದು ಸುದ್ದಿಯಲ್ಲಿರುವ ಮೈಕಲ್ ವಾನ್ ಈ ಬಾರಿ ಐಪಿಎಲ್ 15ನೇ ಆವೃತ್ತಿಯ ಅತ್ಯುತ್ತಮ ನಾಯಕ ಯಾರು ಎಂದು ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ಫಾಫ್ ಡು ಪ್ಲೆಸಿಸ್ ಈ ಬಾರಿಯ ಐಪಿಎಲ್‌ನ ಅತ್ಯುತ್ತಮ ನಾಯಕ ಎಂದಿದ್ದಾರೆ ಮೈಕಲ್ ವಾನ್. ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧದ ಗೆಲುವಿನ ಬಳಿಕ ವಾನ್ ಈ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ.

"ಆರ್‌ಸಿಬಿ ಟ್ರೋಫಿ ಗೆಲ್ಲಲು ಉತ್ತಮ ಅವಕಾಶ"

ಮುಂದುವರಿದು ಮಾತನಾಡಿದ ಮೈಕಲ್ ವಾನ್ ಬೆಂಗಳೂರು ಮೂಲದ ಫ್ರಾಂಚೈಸಿ ಈ ಬಾರಿಯ ಐಪಿಎಲ್ ಟೂರ್ನಿಯಲ್ಲಿ ಟ್ರೋಫಿ ಗೆಲ್ಲಲು ಅತ್ಯುತ್ತಮ ಅವಕಾಶವಿದೆ ಎಂದಿದ್ದಾರೆ. ಚೆನ್ನೈ ಸೂಪರ್ ಕಿಂಗ್ಸ್ ತಂಡದಲ್ಲಿದ್ದಾಗ ಫಾಫ್ ತಂಡ ಟ್ರೋಫಿಯನ್ನು ಗೆಲ್ಲುವಂತೆ ಮಾಡಿದ್ದರು ಎಂದು ದಕ್ಷಿಣ ಆಫ್ರಿಕಾ ಮೂಲದ ಕ್ರಿಕೆಟಿಗನ ಬಗ್ಗೆ ವಿಶೇಷ ಭರವಸೆಯ ಮಾತುಗಳನ್ನು ಆಡಿದ್ದಾರೆ ಇಂಗ್ಲೆಂಡ್ ತಂಡದ ಮಾಜಿ ನಾಯಕ.

ಅತ್ಯುತ್ತಮ ನಾಯಕ, ಅದ್ಭುತ ಚಿಂತಕರಾಗಿದ್ದರು

ಮೈಕಲ್ ವಾನ್ ಆರ್‌ಸಿಬಿ ನಾಯಕ ಫಾಫ್ ಡು ಪ್ಲೆಸಿಸ್ ಅವರನ್ನು ಉತ್ತಮ ನಾಯಕ ಹಾಗೂ ಅದ್ಭುತ ಚಿಂತಕ ಎಂದಿದ್ದಾರೆ. "ನನ್ನ ಪ್ರಕಾರ ಆತ ಈ ಐಪಿಎಲ್‌ನ ಅತ್ಯುತ್ಯಮ ನಾಯಕ. ಆತನನ್ನು ನಾನು ಉತ್ತಮ ಚಿಂತಕ ಎಂದು ಭಾವಿಸುತ್ತೇನೆ. ಬ್ಯಾಟರ್ ಆಗಿ ಕಣಕ್ಕಿಳಿದಾಗ ಹಾಗೂ ನಾಯಕನಾಗಿ ಮೈದಾನಕ್ಕಿಳಿದಾಗ ಆತ ಇದನ್ನು ಸಾಬೀತುಪಡಿಸಿದ್ದಾರೆ. ಆತ ನಾಯಕನಾಗಿ ದೀರ್ಘ ಸಮಯದಿಂದ ಇರುವ ರೀತಿ ಹಾಗೂ ತಂಡವನ್ನು ಅತ್ಯುತ್ತಮವಾಗಿ ನಿರ್ವಹಿಸುವ ರೀತಿಯಿಂದಾಗಿ ಆತನನ್ನು ನಾನು ಇಷ್ಟಪಡುತ್ತೇನೆ" ಎಂದಿದ್ದಾರೆ.

ಫಾಫ್ ಕಾರಣದಿಂದಾಗಿ ಅತ್ಯುತ್ತಮ ಅವಕಾಶವಿದೆ ಎಂದಿದ್ದೆ

"ನಾನು ಇದನ್ನು ಆರಂಭದಿಂದಲೇ ಹೇಳಿಕೊಂಡಿದ್ದೆ. ಫಾಫ್ ಅವರ ಕಾರಣದಿಂದಾಗಿ ಆರ್‌ಸಿಇಬಿ ಈ ಬಾರಿ ಉತ್ತಮ ಅವಕಾಶವನ್ನು ಹೊಂದಿದೆ. ಯಾಕೆಂದರೆ ನೀವು ಅತ್ಯುತ್ತಮ ಅಸ್ತ್ರಗಳನ್ನು ಹೊಂದಿದ್ದೀರಿ. ಅಲ್ಲದೆ ಅತ್ಯುತ್ತಮ ಕ್ರಿಕೆಟ್ ಚಿಂತಕರನ್ನು ಕೂಡ ಹೊಂದಿದ್ದೀರಿ. ಚೆನ್ನೈ ತಂಡದಲ್ಲಿದ್ದುಕೊಂಡು ಫಾಫ್ ಟ್ರೋಫಿಗಳನ್ನು ಗೆದ್ದಿದ್ದಾರೆ. ಹಾಗಾಗಿ ಅವರಿಗೆ ಐಪಿಎಲ್‌ನಲ್ಲಿ ಗೆಲುವು ಸಾಧಿಸುವುದು ಹೇಗೆ ಎಂಬುದು ತಿಳಿದಿದೆ." ಎಂದಿದ್ದಾರೆ ಮೈಕಲ್ ವಾನ್.