IPL 2024: ಐಪಿಎಲ್ ಜೆರ್ಸಿಯಲ್ಲಿ ಈ ಬಣ್ಣಗಳನ್ನು ನಿಷೇಧಿಸಿದ ಬಿಸಿಸಿಐ; ಕಾರಣ ಇಲ್ಲಿದೆ

2024ರ ಇಂಡಿಯನ್ ಪ್ರೀಮಿಯರ್ ಲೀಗ್‌ನ (ಐಪಿಎಲ್) ಆರಂಭಕ್ಕೆ ಕೇವಲ ನಾಲ್ಕು ದಿನಗಳು ಮಾತ್ರ ಬಾಕಿ ಉಳಿದಿದ್ದು, ಮಾರ್ಚ್ 22ರಂದು ಆರ್‌ಸಿಬಿ ಮತ್ತು ಸಿಎಸ್‌ಕೆ ನಡುವಿನ ಹೈ-ವೋಲ್ಟೇಜ್ ಪಂದ್ಯದೊಂದಿಗೆ ಅದ್ಧೂರಿ ಚಾಲನೆ ಸಿಗಲಿದೆ.

ಇದೇ ವೇಳೆ 2024ರ ಐಪಿಎಲ್‌ಗಾಗಿ ಪಂಜಾಬ್ ಕಿಂಗ್ಸ್ (ಪಿಬಿಕೆಎಸ್) ತಂಡವು ತಮ್ಮ ಹೊಸ ಜೆರ್ಸಿಯನ್ನು ಶನಿವಾರ, ಮಾರ್ಚ್ 16ರಂದು ಚಂಡೀಗಢದ ಎಲಾಂಟೆ ಮಾಲ್‌ನಲ್ಲಿ ಅನಾವರಣಗೊಳಿಸಿತು.

ಈ ಸಂದರ್ಭದಲ್ಲಿ ಪಂಜಾಬ್ ಕಿಂಗ್ಸ್ ತಂಡದ ನಾಯಕ ಶಿಖರ್ ಧವನ್, ವೇಗದ ಬೌಲರ್ ಅರ್ಶ್‌ದೀಪ್ ಸಿಂಗ್, ವಿಕೆಟ್ ಕೀಪರ್ ಜಿತೇಶ್ ಶರ್ಮಾ ಮತ್ತು ಸಹ-ಒಡತಿ ಪ್ರೀತಿ ಜಿಂಟಾ ಉಪಸ್ಥಿತರಿದ್ದರು.

ಜೆರ್ಸಿ ಅನಾವರಣ ಸಂದರ್ಭದಲ್ಲಿ ಮಾತನಾಡಿದ ಪ್ರೀತಿ ಜಿಂಟಾ ಮುಂಬರುವ ಆವೃತ್ತಿಗಾಗಿ ಜೆರ್ಸಿಯ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡರು. 2009-2013ರ ಅವಧಿಯಲ್ಲಿ ಕೆಂಪು ಮತ್ತು ಬೂದು ಮಿಶ್ರಿತ ಪಂಜಾಬ್‌ ತಂಡದ ಹಳೆಯ ಜೆರ್ಸಿಯನ್ನು ನೆನಪಿಸಿಕೊಂಡರು.

ಆದಾಗ್ಯೂ, ಆಟದಲ್ಲಿ ಚೆಂಡಿನ ಬಣ್ಣಕ್ಕೆ ಹೊಂದಿಕೆಯಾಗುವುದರಿಂದ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಬಿಳಿ, ಬೂದು ಮತ್ತು ಬೆಳ್ಳಿಯಂತಹ ಬಣ್ಣಗಳನ್ನು ನಿಷೇಧಿಸಿದೆ ಎಂದು ಬಾಲಿವುಡ್ ನಟಿ ಬಹಿರಂಗಪಡಿಸಿದರು.

ಹೀಗಾಗಿ, ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿ ತಮ್ಮ ಜೆರ್ಸಿ ಬಣ್ಣದ ಆಯ್ಕೆಯನ್ನು ಬದಲಾಯಿಸಬೇಕಾಯಿತು ಮತ್ತು ಈಗ ಸಂಪೂರ್ಣ ಕೆಂಪು ಬಣ್ಣದಲ್ಲಿ ಕಂಡುಬರಲಿದೆ.

"ಈ ಹಿಂದೆ ನಾವು ಕೆಂಪು, ಬೂದು ಮತ್ತು ಬೆಳ್ಳಿ ಬಣ್ಣದ ಸಂಯೋಜನೆಯನ್ನು ಹೊಂದಿದ್ದೆವು. ಆದರೆ ನಂತರ ಚೆಂಡಿನೊಂದಿಗಿನ ದೃಷ್ಟಿ ಸಮಸ್ಯೆಗಳಿಂದಾಗಿ ಬಿಸಿಸಿಐ ಬೆಳ್ಳಿ, ಬೂದು ಮತ್ತು ಬಿಳಿ ಬಣ್ಣವನ್ನು ನಿಷೇಧಿಸಿದೆ. ಆದ್ದರಿಂದ, ನಾವು ಕೆಂಪು ಬಣ್ಣದೊಂದಿಗೆ ಮುನ್ನಡೆಯುತ್ತಿದ್ದೇವೆ. ಈ ವರ್ಷ ನಾವು ಕೆಂಪು ಬಣ್ಣದೊಂದಿಗೆ ಅತ್ಯುತ್ತಮ ಸಂಯೋಜನೆಯನ್ನು ಹೊಂದಿದ್ದೇವೆ," ಎಂದು ಪಂಜಾಬ್ ಕಿಂಗ್ಸ್ ಮಾಲಕಿ ಪ್ರೀತಿ ಜಿಂಟಾ ಹೇಳಿದರು.

ಗಮನಾರ್ಹವಾಗಿ, 2023ರ ಐಪಿಎಲ್‌ನಲ್ಲಿ ಪಂಜಾಬ್ ಕಿಂಗ್ಸ್ ತಂಡ ಸ್ಮರಣೀಯ ಋತುವನ್ನು ಹೊಂದಿರಲಿಲ್ಲ. ಏಕೆಂದರೆ ಆಡಿದ 14 ಪಂದ್ಯಗಳಿಂದ ಆರು ಗೆಲುವುಗಳೊಂದಿಗೆ ತಮ್ಮ ಹೆಸರಿಗೆ 12 ಅಂಕಗಳನ್ನು ಹೊಂದಿ ಅಂಕಪಟ್ಟಿಯಲ್ಲಿ ಎಂಟನೇ ಸ್ಥಾನವನ್ನು ಪಡೆದರು.

2024ರ ಐಪಿಎಲ್‌ಗಾಗಿ ನಡೆದ ಮಿನಿ ಹರಾಜಿನಲ್ಲಿ ವೇಗಿ ಹರ್ಷಲ್ ಪಟೇಲ್, ಆಲ್‌ರೌಂಡರ್ ಕ್ರಿಸ್ ವೋಕ್ಸ್ ಮತ್ತು ಸ್ವಾಶ್‌ಬಕ್ಲಿಂಗ್ ಬ್ಯಾಟರ್ ರಿಲೀ ರೊಸ್ಸೌ ಅವರನ್ನು ಖರೀದಿಸಿದ ಅವರು ಋತುವಿನ ಮುಂಚೆಯೇ ತಮ್ಮ ತಂಡವನ್ನು ಬಲಪಡಿಸಿದೆ.

ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಪಂಜಾಬ್ ಕಿಂಗ್ಸ್ ಅಭಿಯಾನ ಆರಂಭ

ಮುಂಬರುವ 2024ರ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಋತುವಿನಲ್ಲಿ ಪಂಜಾಬ್ ಕಿಂಗ್ಸ್ ತನ್ನ ಅಭಿಯಾನವನ್ನು ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಶನಿವಾರ, ಮಾರ್ಚ್ 23ರಂದು ಹೊಸದಾಗಿ ನಿರ್ಮಿಸಲಾಗಿರುವ ಚಂಡೀಗಢದ ಮುಲ್ಲನ್‌ಪುರದ ಮಹಾರಾಜ ಯಾದವೀಂದ್ರ ಸಿಂಗ್ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಪ್ರಾರಂಭಿಸಲಿದೆ.

ಪಂದ್ಯಾವಳಿಯ ಮೊದಲ ಹಂತದಲ್ಲಿ ಪಂಜಾಬ್ ಕಿಂಗ್ಸ್ ತಂಡವು ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಲಕ್ನೋ ಸೂಪರ್ ಜೈಂಟ್ಸ್ ಮತ್ತು ಗುಜರಾತ್ ಟೈಟನ್ಸ್ ವಿರುದ್ಧ ಕಣಕ್ಕಿಳಿಯಲಿದೆ.

2024ರ ಐಪಿಎಲ್‌ನ ಮೊದಲ 21 ಪಂದ್ಯಗಳ ವೇಳಾಪಟ್ಟಿಯನ್ನು ಬಿಸಿಸಿಐ ಪ್ರಕಟಿಸಿದೆ. ದೇಶದ ಸಾರ್ವತ್ರಿಕ ಚುನಾವಣೆಯ ವೇಳಾಪಟ್ಟಿ ಪ್ರಕಟಿಸಲಾಗಿದ್ದು, ಶೀಘ್ರದಲ್ಲೇ ಉಳಿದ ಪಂದ್ಯಗಳ ವೇಳಾಪಟ್ಟಿ ಪ್ರಕಟಿಸಲಾಗುವುದು.