IPL 2024: ಯಾವುದೇ ಜಗಳವೂ 'ವಿರಾಟ' ಅಥವಾ 'ಗಂಭೀರ'ವಲ್ಲ; ದೆಹಲಿ ಪೊಲೀಸ್ ಟ್ವೀಟ್!

ಶುಕ್ರವಾರ, ಮಾರ್ಚ್ 29ರಂದು ಬೆಂಗಳೂರಿನ ಎಂ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ 2024ರ ಐಪಿಎಲ್‌ನ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಮತ್ತು ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ತಂಡಗಳು ಮುಖಾಮುಖಿಯಾದವು.

ತವರಿನ ಅಂಗಳದಲ್ಲಿ ಆರ್‌ಸಿಬಿ ತಂಡವು ಕೆಕೆಆರ್ ವಿರುದ್ಧ 7 ವಿಕೆಟ್‌ಗಳ ದಯನೀಯ ಸೋಲು ಅನುಭವಿಸಿತು. ಅಲ್ಲದೆ, 2015ರಿಂದ ಕೆಕೆಆರ್ ವಿರುದ್ಧ ಎಂ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸೋಲಿನ ಸರಣಿಯನ್ನು ಮುಂದುವರೆಸಿತು.

ಆದರೆ, ತೀವ್ರ ಹಣಾಹಣಿಯ ಪಂದ್ಯದ ಸಂದರ್ಭದಲ್ಲಿ ಆರ್‌ಸಿಬಿ ಸ್ಟಾರ್ ವಿರಾಟ್ ಕೊಹ್ಲಿ ಮತ್ತು ಕೆಕೆಆರ್ ಮೆಂಟರ್ ಗೌತಮ್ ಗಂಭೀರ್ ಮೈದಾನದಲ್ಲಿ ಅನಿರೀಕ್ಷಿತವಾಗಿ ಒಬ್ಬರನ್ನೊಬ್ಬರು ತಬ್ಬಿಕೊಳ್ಳುತ್ತಿರುವುದು ಕಂಡುಬಂದಿದೆ.

ಇದು ವಿಶ್ವಾದ್ಯಂತ ಕ್ರಿಕೆಟ್ ಅಭಿಮಾನಿಗಳ ಗಮನವನ್ನು ಸೆಳೆಯಿತು ಮತ್ತು ಟೈಮ್-ಔಟ್ ಸಂದರ್ಭದಲ್ಲಿ ಯಾರೂ ನಿರೀಕ್ಷಿಸದ ಘಟನೆಗೆ ಆರ್‌ಸಿಬಿ ಮತ್ತು ಕೆಕೆಆರ್ ಪಂದ್ಯ ಸಾಕ್ಷಿಯಾಯಿತು.

ಸಾಮಾಜಿಕ ಮಾಧ್ಯಮದಲ್ಲಿ ಹಾಸ್ಯ ಪ್ರಜ್ಞೆಗೆ ಹೆಸರುವಾಸಿಯಾದ ದೆಹಲಿ ಪೊಲೀಸರು ತಮ್ಮ ಸೇವೆಗಳ ಬಗ್ಗೆ ಜಾಗೃತಿ ಮೂಡಿಸಲು ವಿರಾಟ್ ಕೊಹ್ಲಿ ಮತ್ತು ಗೌತಮ್ ಗಂಭೀರ್ ಅಪ್ಪುಗೆ ಅವಕಾಶವನ್ನು ಬಳಸಿಕೊಂಡರು. ಗಮನಾರ್ಹವಾಗಿ, ಉಭಯ ಕ್ರಿಕೆಟಿಗರು ಮೂಲತಃ ದೆಹಲಿಯವರೇ ಆಗಿದ್ದಾರೆ.

ಕೊಹ್ಲಿ ಮತ್ತು ಗಂಭೀರ್ ಆಲಿಂಗನದ ಫೋಟೋವನ್ನು ಹಂಚಿಕೊಂಡ ದೆಹಲಿ ಪೊಲೀಸ್, 'ಕಿಸಿ ಭಿ ಸಮಸ್ಯೆ ಮೇ ಮದದ್ ಕೆ ಲಿಯೇ 112 ಹೈ ತೈಯಾರ್!' (ಯಾವುದೇ ಸಮಸ್ಯೆಯಲ್ಲಿ ಸಹಾಯ ಮಾಡಲು 112 ಸಿದ್ಧವಾಗಿದೆ) ಎಂದು ಬರೆದುಕೊಂಡಿದೆ. 112 ಡಯಲ್ ಮಾಡಿ ಮತ್ತು ಜಗಳವನ್ನು ಕೊನೆಗೊಳಿಸಿ! ಯಾವುದೇ ಜಗಳ 'ವಿರಾಟ' ಅಥವಾ 'ಗಂಭೀರ' ಅಲ್ಲ ಎಂದು ಪೋಸ್ಟ್ ಮಾಡಿದೆ.

ಈ ಹಿಂದೆ ಮೈದಾನದಲ್ಲಿ ದೆಹಲಿಯ ಇಬ್ಬರು ಆಟಗಾರರ ನಡುವಿನ ಉದ್ವಿಗ್ನತೆಯ ಇತಿಹಾಸದ ನಡುವೆ ಈ ಸನ್ನೆ ಬಂದಿದೆ. ಐಪಿಎಲ್ 2023ರಲ್ಲಿ ವಿರಾಟ್ ಕೊಹ್ಲಿ ಮತ್ತು ಗೌತಮ್ ಗಂಭೀರ್ ನಡುವಿನ ಜಗಳ ವಿನಿಮಯವು ಉಭಯ ಆಟಗಾರರಿಗೆ ದಂಡವನ್ನು ವಿಧಿಸಲಾಗಿತ್ತು. ಆದಾಗ್ಯೂ, ಇತ್ತೀಚಿನ ಕ್ರೀಡಾ ಮನೋಭಾವವು ಅವರ ಸಂಬಂಧದಲ್ಲಿ ಧನಾತ್ಮಕ ಬದಲಾವಣೆಯನ್ನು ಪ್ರತಿಬಿಂಬಿಸುತ್ತದೆ.

ವಿರಾಟ್ ಕೊಹ್ಲಿ ಮತ್ತು ಗೌತಮ್ ಗಂಭೀರ್ ನಡುವಿನ ಅಪ್ಪುಗೆಯನ್ನು ಪಂದ್ಯದ ಕಾಮೆಂಟೇಟರ್‌ಗಳಾದ ರವಿಶಾಸ್ತ್ರಿ ಮತ್ತು ಸುನಿಲ್ ಗವಾಸ್ಕರ್ ಚಪ್ಪಾಳೆಯೊಂದಿಗೆ ಸ್ವಾಗತಿಸಿದರು. ಆ ಕ್ಷಣವನ್ನು ಸ್ಮರಣಾರ್ಥವಾಗಿ ಆಸ್ಕರ್ ಪ್ರಶಸ್ತಿ ಕೊಡಬೇಕೆಂದು ತಮಾಷೆಯಾಗಿ ಕರೆದರು.

ಇನ್ನು ಐಪಿಎಲ್ 2024ರ ಪಂದ್ಯದಲ್ಲಿ ಆರ್‌ಸಿಬಿ 6 ವಿಕೆಟ್‌ಗೆ 182 ರನ್‌ಗಳ ಸ್ಪರ್ಧಾತ್ಮಕ ಮೊತ್ತವನ್ನು ಕಲೆಹಾಕಿತು ಮತ್ತು ವಿರಾಟ್ ಕೊಹ್ಲಿ 83 ರನ್‌ಗಳೊಂದಿಗೆ ತಮ್ಮ ಬ್ಯಾಟಿಂಗ್ ಪರಾಕ್ರಮ ಪ್ರದರ್ಶಿಸಿದರು.

ಆದಾಗ್ಯೂ, ಕೆಕೆಆರ್ ತಂಡ ಆರಾಮವಾಗಿ ಗುರಿಯನ್ನು ಬೆನ್ನಟ್ಟಿತು, ಕೇವಲ 16.5 ಓವರ್‌ಗಳಲ್ಲಿ 3 ವಿಕೆಟ್‌ಗೆ 186 ರನ್‌ಗಳೊಂದಿಗೆ ವಿಜಯಶಾಲಿಯಾಗಿ ಹೊರಹೊಮ್ಮಿತು. ಪ್ರಸಕ್ತ ಆವೃತ್ತಿಯಲ್ಲಿ ತವರಿನಿಂದ ಹೊರಗೆ ಗೆಲುವು ಸಾಧಿಸಿದ ಮೊದಲ ತಂಡವೆನಿಸಿತು.

ಇದೀಗ ದೆಹಲಿ ಪೊಲೀಸರ ಜಾಣ್ಮೆಯ ಟ್ವೀಟ್ ವಿರಾಟ್ ಕೊಹ್ಲಿ ಮತ್ತು ಗೌತಮ್ ಗಂಭೀರ್ ನಡುವಿನ ಸೌಹಾರ್ದತೆಯನ್ನು ಎತ್ತಿ ತೋರಿಸಿದ್ದು ಮಾತ್ರವಲ್ಲದೆ, ಅವರ ತುರ್ತು ಸಹಾಯದ ಹಾಟ್‌ಲೈನ್‌ನ ಜ್ಞಾಪನೆಯಾಗಿಯೂ ಕಾರ್ಯನಿರ್ವಹಿಸಿತು.

ದೆಹಲಿ ಪೊಲೀಸರು ಈ ರೀತಿ ಟ್ವೀಟ್ ಮಾಡಿರುವುದು ಇದೇ ಮೊದಲೇನಲ್ಲ. ಇದಕ್ಕೂ ಮುನ್ನ ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಟೆಸ್ಟ್ ಪಂದ್ಯದ ವೇಳೆ ರೋಹಿತ್ ಶರ್ಮಾ ಮತ್ತು ಸರ್ಫರಾಜ್ ಖಾನ್ ನಡುವಿನ ವಿಚಾರ ವಿನಿಮಯದ ಕುರಿತು ಹಾಸ್ಯಮಯ ಟ್ವೀಟ್ ಮಾಡಿದ್ದರು.

ಐಪಿಎಲ್ 2024ರಲ್ಲಿ ಆರ್‌ಸಿಬಿ ಮತ್ತು ಕೆಕೆಆರ್ ನಡುವಿನ ಮುಂದಿನ ಮುಖಾಮುಖಿ ಏಪ್ರಿಲ್ 21ರಂದು ಕೋಲ್ಕತ್ತಾದ ಈಡನ್ ಗಾರ್ಡನ್ಸ್‌ನಲ್ಲಿ ನಡೆಯಲಿದ್ದು, ಈ ಪೈಪೋಟಿಯಲ್ಲಿ ಮತ್ತೊಂದು ರೋಚಕ ಅಧ್ಯಾಯದ ಭರವಸೆ ಕಾಣಬಹುದು.