IPL 2024: ಕ್ವಾಲಿಫೈಯರ್ 1ರಲ್ಲಿ KKR vs SRH ಪಂದ್ಯ ಮಳೆ ಬಂದು ರದ್ದಾದರೆ ಮುಂದೇನು?

ಮಂಗಳವಾರ, ಮೇ 21ರಂದು ಅಹಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯಲಿರುವ 2024ರ ಇಂಡಿಯನ್ ಪ್ರೀಮಿಯರ್ ಲೀಗ್‌ನ (ಐಪಿಎಲ್) ಕ್ವಾಲಿಫೈಯರ್ 1ರ ಪಂದ್ಯದಲ್ಲಿ ಅಂಕಪಟ್ಟಿಯ ಅಗ್ರ 2 ತಂಡಗಳಾದ ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ಮತ್ತು ಸನ್ ರೈಸರ್ಸ್ ಹೈದರಾಬಾದ್ (ಎಸ್‌ಆರ್‌ಹೆಚ್) ರೋಚಕ ಹಣಾಹಣಿ ನಡೆಸಲು ಸಜ್ಜಾಗಿವೆ.

ಪ್ರಸಕ್ತ ಆವೃತ್ತಿಯ ತಮ್ಮ ಅಂತಿಮ ಲೀಗ್ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ 4 ವಿಕೆಟ್‌ಗಳ ಗೆಲುವಿನ ನಂತರ, ಸನ್‌ ರೈಸರ್ಸ್ ಹೈದರಾಬಾದ್ ತಂಡ ಐಪಿಎಲ್ 2024ರ ಅಂಕಪಟ್ಟಿಯಲ್ಲಿ ಎರಡನೇ ಸ್ಥಾನ ಗಳಿಸಿತು. 14 ಪಂದ್ಯಗಳಿಂದ 17 ಅಂಕಗಳೊಂದಿಗೆ ಮುಗಿಸಿದರು.

ರಾಜಸ್ಥಾನ ರಾಯಲ್ಸ್ ತಂಡವೂ 17 ಅಂಕ ಗಳಿಸಿದ್ದರೂ, ಪ್ಯಾಟ್ ಕಮ್ಮಿನ್ಸ್ ನಾಯಕತ್ವದ ತಂಡವು ಉತ್ತಮ ನೆಟ್ ರನ್ ರೇಟ್‌ನಿಂದ ಎರಡನೇ ಸ್ಥಾನ ಪಡೆಯಿತು. ಈ ಮೂಲಕ ಐಪಿಎಲ್ 2024ರ ಫೈನಲ್‌ಗೆ ಅರ್ಹತೆ ಪಡೆಯಲು ಎರಡು ಅವಕಾಶಗಳನ್ನು ಪಡೆದುಕೊಂಡಿತು.

ಇದೀಗ ಸನ್‌ ರೈಸರ್ಸ್ ಹೈದರಾಬಾದ್ ತಂಡವು ಅಂಕಪಟ್ಟಿಯ ಅಗ್ರಸ್ಥಾನಿಯಾದ ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ತಂಡವನ್ನು ಎದುರಿಸಲಿದೆ. ಇಲ್ಲಿನ ವಿಜೇತ ತಂಡವು ಮೇ 26ರಂದು ಫೈನಲ್‌ಗೆ ಅರ್ಹತೆ ಪಡೆಯುತ್ತದೆ.

ಈ ನಡುವೆ ಸೋತ ತಂಡವು ರಾಜಸ್ಥಾನ್ ರಾಯಲ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ನಡುವಿನ ವಿಜೇತರೊಂದಿಗೆ ಕ್ವಾಲಿಫೈಯರ್ 2 ಪಂದ್ಯವನ್ನು ಆಡಲಿದೆ. ಕ್ವಾಲಿಫೈಯರ್ 2ರ ವಿಜೇತ ತಂಡ ನಂತರ ಕ್ವಾಲಿಫೈಯರ್ 1ರ ವಿಜೇತ ತಂಡವನ್ನು ಫೈನಲ್‌ನಲ್ಲಿ ಎದುರಿಸುತ್ತದೆ.

ಇದೇ ವೇಳೆ 17ನೇ ಆವೃತ್ತಿಯ ಪಂದ್ಯಾವಳಿಯಲ್ಲಿ ಕೆಕೆಆರ್ ತಂಡವು ಎಸ್‌ಆರ್‌ಹೆಚ್ ವಿರುದ್ಧ ಎರಡನೇ ಬಾರಿಗೆ ಸೆಣಸಾಡಲಿದೆ. ಉಭಯ ತಂಡಗಳು ಋತುವಿನ ಆರಂಭದಲ್ಲಿ ಈಡನ್ ಗಾರ್ಡನ್ಸ್‌ನಲ್ಲಿ ಮುಖಾಮುಖಿಯಾದವು. ಅಲ್ಲಿ ಕೆಕೆಆರ್ ನಾಲ್ಕು ರನ್‌ಗಳ ಗೆಲುವು ಪಡೆದಿತ್ತು.

ಮಳೆಯಿಂದ ಕೆಕೆಆರ್ vs ಎಸ್‌ಆರ್‌ಹೆಚ್ ಪಂದ್ಯ ರದ್ದಾದರೆ ಮುಂದೇನು?

ಭಾರತದ ಬಹುತೇಕ ಭಾಗಗಳಂತೆ ಅಹಮದಾಬಾದ್ ಕೂಡ ಹೆಚ್ಚಿನ ಮಳೆಗೆ ಸಾಕ್ಷಿಯಾಗಿದೆ. ಮೇ 20ರಂದು ಪಂದ್ಯವನ್ನು ನಡೆಸಿದ್ದರೆ, ಮಳೆಯಿಂದ ರದ್ದುಗೊಳ್ಳಬಹುದಿತ್ತು. ಆದರೆ ಮೇ 21ರಂದು ಹವಾಮಾನ ಮುನ್ಸೂಚನೆ ಹೆಚ್ಚು ಉತ್ತಮವಾಗಿದೆ.

ಪಂದ್ಯವು ಯಾವುದೇ ಅಡೆತಡೆಯಿಲ್ಲದೆ ಮುಂದುವರಿಯಬೇಕು. ಆದರೆ ಮಳೆಯಿಂದಾಗಿ ಮಳೆ ಅಡ್ಡಿಪಡಿಸಿದರೆ, ಲೀಗ್‌ನಲ್ಲಿ ಉತ್ತಮ ರನ್ ರೇಟ್ ಹೊಂದಿದ ತಂಡವು ಫೈನಲ್‌ಗೆ ಅರ್ಹತೆ ಪಡೆಯುತ್ತದೆ. ಸೋತ ತಂಡ ಕ್ವಾಲಿಫೈಯರ್ 2 ಪಂದ್ಯವನ್ನು ಆಡುತ್ತದೆ.

ಆ ಸಂದರ್ಭದಲ್ಲಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ಕೋಲ್ಕತ್ತಾ ನೈಟ್ ರೈಡರ್ಸ್ ಫೈನಲ್‌ಗೆ ಅರ್ಹತೆ ಪಡೆಯುತ್ತದೆ ಮತ್ತು ಹೈದರಾಬಾದ್ ಸನ್ ರೈಸರ್ಸ್ ಕ್ವಾಲಿಫೈಯರ್ 2 ಪಂದ್ಯಕ್ಕಾಗಿ ಚೆನ್ನೈಗೆ ಪ್ರಯಾಣಿಸಲಿದೆ.

ಅಕ್ಯುವೆದರ್ ಪ್ರಕಾರ, ಅಹಮದಾಬಾದ್‌ನಲ್ಲಿ ಮಂಗಳವಾರ ತುಂಬಾ ಬಿಸಿಯಾದ ದಿನವಾಗಿರುತ್ತದೆ ಮತ್ತು ಗಾಳಿಯು ಗಂಟೆಗೆ 33 ಕಿಮೀ ವೇಗದಲ್ಲಿ ಬೀಸುತ್ತದೆ. ಶೇ.3ರಷ್ಟು ಮೋಡದ ಹೊದಿಕೆ ಇರುತ್ತದೆ ಮತ್ತು ಪಂದ್ಯದ ಕೊನೆಯಲ್ಲಿ ಇಬ್ಬನಿ ಇರುತ್ತದೆ.