IPL 2026: ಪ್ಲೇ ಆಫ್‌ ಟಿಕೆಟ್‌ಗಳನ್ನು ಪಡೆಯುವುದು ಹೇಗೆ? ಯಾವಾಗ ಬುಕ್ಕಿಂಗ್‌ ಆರಂಭ? ಇಲ್ಲಿದೆ ಮಾಹಿತಿ

ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ( ಬಿಸಿಸಿಐ) ಐಪಿಎಲ್ 2026 ರ ಪ್ಲೇಆಫ್ ಪಂದ್ಯಗಳ ಟಿಕೆಟ್ ಮಾರಾಟದ ವೇಳಾಪಟ್ಟಿಯನ್ನು ಪ್ರಕಟಿಸಿದೆ. ಆನ್‌ಲೈನ್ ಬುಕಿಂಗ್‌ಗಳು ಈ ವಾರಾಂತ್ಯದಲ್ಲಿ ಹಂತ ಹಂತವಾಗಿ ಆರಂಭವಾಗಲಿದ್ದು, ಈ ಟಿಕೆಟ್‌ಗಳನ್ನು ಜೊಮಾಟೊ 'ಡಿಸ್ಟ್ರಿಕ್ಟ್'ನಲ್ಲಿ ಪಡೆಯಬಹುದಾಗಿದೆ.

ಮೇ 26 ರಂದು ಧರ್ಮಶಾಲಾದಲ್ಲಿ ಐಪಿಎಲ್ ಕ್ವಾಲಿಫೈಯರ್ 1 ನಡೆಯಲಿದೆ. ಎಲಿಮಿನೇಟರ್ ಪಂದ್ಯ ಮೇ 27 ರಂದು ಮುಲ್ಲಾನಪುರ್‌ನಲ್ಲಿ ನಡೆಯಲಿದ್ದು, ಕ್ವಾಲಿಫೈಯರ್ 2 ಪಂದ್ಯ ಮೇ 29 ರಂದು ಮುಲ್ಲಾನಪುರ್‌ನಲ್ಲಿ, ಫೈನಲ್ ಮೇ 31 ರಂದು ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಸಲು ನಿರ್ಧರಿಸಲಾಗಿದೆ.

ರುಪೇ ಕ್ರೆಡಿಟ್ ಕಾರ್ಡ್‌ದಾರರಿಗೆ ಟಿಕೆಟ್ ಪಡೆಯಲು ಮೊದಲ ಅವಕಾಶ ನೀಡಲಾಗಿದೆ. ಮೊದಲ ಹಂತದ ಬುಕಿಂಗ್ ಮೇ 20 ರಂದು ರಾತ್ರಿ 7:00 ಗಂಟೆಗೆ ಓಪನ್‌ವಾಗಲಿದ್ದು, ಇದರ ಲಾಭವನ್ನು ಗ್ರಾಹಕರು 24 ಗಂಟೆಗಳ ಕಾಲ ಪಡೆಯಬಹುದಾಗಿದೆ. ಈ ಸಮಯದಲ್ಲಿ ರುಪೇ ಕ್ರೆಡಿಟ್ ಕಾರ್ಡ್‌ ಬಳಕೆದಾರರು ಮೇ 26 ರಂದು ನಡೆಯಲಿರುವ ಕ್ವಾಲಿಫೈಯರ್ 1 ಹಾಗೂ ಎಲಿಮಿನೇಟರ್ ಪಂದ್ಯಗಳ ಟಿಕೆಟ್‌ಗಳನ್ನು ಬುಕ್ ಮಾಡಬಹುದಾಗಿದೆ.

ಟಿಕೆಟ್‌ ಬುಕ್‌ ಮಾಡುವುದು ಯಾವಾಗ?

ಉಳಿದ ಅಭಿಮಾನಿಗಳಿಗೆ ಕ್ವಾಲಿಫೈಯರ್ 1 ಮತ್ತು ಎಲಿಮಿನೇಟರ್ ಟಿಕೆಟ್ ಮಾರಾಟ ಮೇ 21 ರಂದು ರಾತ್ರಿ 8:00 ಗಂಟೆಗೆ ಆರಂಭವಾಗಲಿವೆ. ಮೇ 23 ರ ರಾತ್ರಿ 8 ಗಂಟೆಯ ಮೇಲೆ ಕ್ವಾಲಿಫೈಯರ್ 2 ಹಾಗೂ ಫೈನಲ್‌ ಟಿಕೆಟ್‌ಗಳು ಲಭ್ಯ ಇರಲಿವೆ. ಪ್ರೇಕ್ಷಕರು ಟಿಕೆಟ್‌ಗಳನ್ನು ಅಧಿಕೃತ ಐಪಿಎಲ್‌ ವೆಬ್‌ಸೈಟ್ ಹಾಗೂ ಡಿಸ್ಟ್ರಿಕ್ಟ್‌ ಬೈ ಜೊಮ್ಯಾಟೊ ವೆಬ್‌ಸೈಟ್ ಮತ್ತು ಮೊಬೈಲ್ ಅಪ್ಲಿಕೇಶನ್ ಮೂಲಕ ಬುಕ್ ಮಾಡಬಹುದಾಗಿದೆ.

ಟಿಕೆಟ್‌ ಕಳ್ಳಾಟ ತಪ್ಪಿಸಲು ಬಿಸಿಸಿಐ ದೊಡ್ಡ ಕ್ರಮವನ್ನು ಕೈಗೊಂಡಿದೆ. ಅಭಿಮಾನಿಗಳು ಈ ಮೋಸಕ್ಕೆ ಬಲಿಯಾಗದಂತೆ ತಡೆಯಲು ಬಿಸಿಸಿಐ ಅಧಿಕೃತ ವೆಬ್‌ಸೈಟ್‌ ಮೂಲಕ ಖರೀದಿ ಮಾಡುವಂತೆ ಸೂಚಿಸಿದೆ. ಇನ್ನು 19ನೇ ಆವೃತ್ತಿಯ ಐಪಿಎಲ್‌ ಫೈನಲ್ ಪಂದ್ಯವು ವಿಶ್ವದ ಅತಿ ದೊಡ್ಡ ಕ್ರೀಡಾಂಗಣ ಎಂದೇ ಖ್ಯಾತಿ ಪಡೆರುವ ಅಹಮದಾಬಾದ್‌ ಮೈದಾನದಲ್ಲಿ ನಡೆಯಲಿದೆ.