ಚಿನ್ನಸ್ವಾಮಿಯಲ್ಲಿ 11 ಆಸನಗಳು ಖಾಲಿ, ಕಾಲ್ತುಳಿತದಲ್ಲಿ ಮೃತಪಟ್ಟ ಆರ್‌ಸಿಬಿ ಅಭಿಮಾನಿಗಳಿಗೆ ವಿಶೇಷ ಗೌರವ

IPL 2026 RCB: ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡ ಐಪಿಎಲ್‌ ಚೊಚ್ಚಲ ಟ್ರೊಫಿ ಗೆದ್ದ ಹಿನ್ನೆಲೆ ಜೂನ್ 4, 2025ರಂದು ಬೆಂಗಳೂರಿನಲ್ಲಿ ವಿಜಯೋತ್ಸವವನ್ನು ಇಟ್ಟುಕೊಳ್ಳಲಾಗಿತ್ತು. ಈ ವೇಳೆ ಚಿನ್ನಸ್ವಾಮಿ ಬಳಿ ಕಾಲ್ತುಳಿತ ಸಂಭವಿಸಿ 11 ಮಂದಿ ಪ್ರಾಣ ಕಳೆದುಕೊಂಡಿದ್ದರು. ಇದೀಗ ಈ ದುರಂತದಲ್ಲಿ ಪ್ರಾಣ ಕಳೆದುಕೊಂಡ ಅಭಿಮಾನಿಗಳಿಗೆ ವಿಶೇಷ ಗೌರವ ಸಲ್ಲಿಸಲು ಆರ್‌ಸಿಬಿ ಹಾಗೂ ಕೆಎಸ್‌ಸಿಎ ನಿರ್ಧರಿಸಿವೆ.

ಆರ್‌ಸಿಬಿ ಚೊಚ್ಚಲ ಐಪಿಎಲ್ ಪ್ರಶಸ್ತಿ ಗೆದ್ದ ಸಂಭ್ರಮದಲ್ಲಿ ಎಂ.ಚಿನ್ನಸ್ವಾಮಿ ಕ್ರೀಡಾಂಗಣದ ಹೊರಗೆ ಅಭಿಮಾನಿಗಳು ಬೃಹತ್ ಸಂಖ್ಯೆಯಲ್ಲಿ ನೆರೆದಿದ್ದರು. ಈ ವೇಳೆ ಉಂಟಾದ ಕಾಲ್ತುಳಿತದಲ್ಲಿ 11 ಅಭಿಮಾನಿಗಳು ದುರದೃಷ್ಟವಶಾತ್ ಸಾವನ್ನಪ್ಪಿದ್ದರು. ಇದೀಗ ಮೃತಪಟ್ಟ ಅಭಿಮಾನಿಗಳ ನೆನಪಿಗಾಗಿ ಒಂದು ಹೃದಯಸ್ಪರ್ಶಿ ಸ್ಮರಣಾರ್ಥ ಲಾಂಛನ ಅನಾವರಣಗೊಳಿಸಲಾಗುವುದು ಎಂದು ತಿಳಿಸಿವೆ.

ಮೃತಪಟ್ಟಿದ್ದ ಅಭಿಮಾನಿಗಳಿಗೆ ವಿಶೇಷ ಗೌರವ ಸಲ್ಲಿಸಲು ನಿರ್ಧಾರ

ಈ ಕ್ರಮವು ಅಭಿಮಾನಿಗಳ ಕುಟುಂಬಕ್ಕೆ ಸಾಂತ್ವನ ನೀಡುವ ಮತ್ತು ಆರ್‌ಸಿಬಿ ತಂಡಕ್ಕೆ ಅಭಿಮಾನಿಗಳ ಮೇಲಿರುವ ಪ್ರೀತಿಯನ್ನು ಪ್ರತಿಬಿಂಬಿಸುವ ಒಂದು ಸಣ್ಣ ಪ್ರಯತ್ನವಾಗಿದೆ. ಮಾರ್ಚ್ 28ರಂದು ನಡೆಯಲಿರುವ ಮೊದಲ ಪಂದ್ಯದ ವೇಳೆ ಈ ಶ್ರದ್ಧಾಂಜಲಿ ಕಾರ್ಯಕ್ರಮ ಅಥವಾ ಸ್ಮಾರಕ ಅನಾವರಣ ನಡೆಯುವ ಸಾಧ್ಯತೆಯಿದೆ.

ಆರ್‌ಸಿಬಿ ಮತ್ತು ಕೆಎಸ್‌ಸಿಎ ಜಂಟಿಯಾಗಿ ಹಮ್ಮಿಕೊಂಡಿರುವ ಈ ಸ್ಮರಣಾರ್ಥ ಯೋಜನೆಯೂ ಕೇವಲ ಒಂದು ಕಾರ್ಯಕ್ರಮವಾಗಿರದೆ, ಮೃತಪಟ್ಟ ಅಭಿಮಾನಿಗಳ ನೆನಪನ್ನು ಮೈದಾನದಲ್ಲಿ ಶಾಶ್ವತವಾಗಿ ಉಳಿಸುವ ಪ್ರಯತ್ನವಾಗಿದೆ. ಕ್ರೀಡಾಂಗಣದ ಒಳಗಿನ ಪ್ರವೇಶ ದ್ವಾರದ ಬಳಿ ಒಂದು ವಿಶೇಷ ಸ್ಮರಣಾರ್ಥ ಫಲಕವನ್ನು ಸ್ಥಾಪಿಸಲಾಗುವುದು. ಇದು ಮೈದಾನಕ್ಕೆ ಬರುವ ಪ್ರತಿಯೊಬ್ಬರಿಗೂ ಆ 11 ಜೀವಗಳ ಕ್ರಿಕೆಟ್ ಪ್ರೇಮವನ್ನು ನೆನಪಿಸುತ್ತದೆ.

ಕ್ರೀಡಾಂಗಣದ ಒಂದು ಪ್ರಮುಖ ಸ್ಟ್ಯಾಂಡ್‌ನಲ್ಲಿ 11 ಆಸನಗಳನ್ನು ಕಾಯಂ ಆಗಿ ಕಾಯ್ದಿರಿಸಲಾಗುವುದು. ಈ 11 ಆಸನಗಳನ್ನು ಐಪಿಎಲ್ ಮಾತ್ರವಲ್ಲದೆ, ಇಲ್ಲಿ ನಡೆಯುವ ಯಾವುದೇ ಅಂತಾರಾಷ್ಟ್ರೀಯ ಪಂದ್ಯಗಳಿಗೂ ಮಾರಾಟ ಮಾಡಲಾಗುವುದಿಲ್ಲ. ಈ ಆಸನಗಳು ಸದಾ ಖಾಲಿ ಇರುವ ಮೂಲಕ ಮೃತಪಟ್ಟ ಅಭಿಮಾನಿಗಳ ಉಪಸ್ಥಿತಿಯನ್ನು ಸಂಕೇತಿಸುತ್ತವೆ.

ಈ ಆಸನಗಳ ಸುತ್ತಲಿನ ಪ್ರದೇಶವನ್ನು ಗೌರವಾರ್ಥವಾಗಿ ಪ್ರತ್ಯೇಕಿಸಲಾಗುವುದು, ಇದು ಕ್ರೀಡಾಂಗಣದ ಒಂದು ಪವಿತ್ರ ಸ್ಥಳದಂತೆ ಇರಲಿದೆ. ಕೆಎಸ್‌ಸಿಎ ಅಧ್ಯಕ್ಷ ವೆಂಕಟೇಶ್ ಪ್ರಸಾದ್ ಅವರು ಹೇಳಿದಂತೆ, "ನಮ್ಮ ಉದ್ದೇಶ ನೋವನ್ನು ಮರುಕಳಿಸುವುದಲ್ಲ, ಬದಲಾಗಿ ಆ 11 ಜನರ ನೆನಪನ್ನು ಗೌರವಿಸುವುದಾಗಿದೆ," ಎಂದು ತಿಳಿಸಿದ್ದಾರೆ.

ಮೃತ ಅಭಿಮಾನಿಗಳಿಗೆ ಶ್ರದ್ಧಾಂಜಲಿ

ಉದ್ಘಾಟನಾ ಪಂದ್ಯ ಆರಂಭವಾಗುವ ಮೊದಲು ಕ್ರೀಡಾಂಗಣದಲ್ಲಿರುವ ಆಟಗಾರರು, ಅಧಿಕಾರಿಗಳು ಮತ್ತು ಪ್ರೇಕ್ಷಕರು ಒಂದು ನಿಮಿಷದ ಕಾಲ ಮೌನಾಚರಣೆ ಮಾಡುವ ಮೂಲಕ ಮೃತರ ಆತ್ಮಕ್ಕೆ ಶಾಂತಿ ಕೋರಲಿದ್ದಾರೆ. ಕ್ರೀಡಾಂಗಣದ ದೊಡ್ಡ ಸ್ಕ್ರೀನ್ ಮೇಲೆ ಆ ದುರಂತದಲ್ಲಿ ಪ್ರಾಣ ಕಳೆದುಕೊಂಡ 11 ಅಭಿಮಾನಿಗಳ ಹೆಸರುಗಳನ್ನು ಪ್ರದರ್ಶಿಸಲಾಗುವುದು.

ಎದುರಾಳಿ ತಂಡಗಳ ಸಹಕಾರ

ಕೇವಲ ಆರ್‌ಸಿಬಿ ಮಾತ್ರವಲ್ಲದೆ, ಇಲ್ಲಿಗೆ ಆಗಮಿಸುವ ಎದುರಾಳಿ ತಂಡಗಳು (ಸನ್ ರೈಸರ್ಸ್ ಹೈದರಾಬಾದ್ ಸೇರಿದಂತೆ) ಈ ಶ್ರದ್ಧಾಂಜಲಿ ಸಭೆಯಲ್ಲಿ ಪಾಲ್ಗೊಳ್ಳಲಿವೆ. ಇದು ಕ್ರಿಕೆಟ್ ಲೋಕವು ಮೃತ ಅಭಿಮಾನಿಗಳ ಕುಟುಂಬಕ್ಕೆ ತೋರುತ್ತಿರುವ ಸಾಮೂಹಿಕ ಗೌರವವಾಗಿದೆ. ಈ ಸ್ಮರಣಾರ್ಥ ಕಾರ್ಯಕ್ರಮವು ಕೇವಲ ಒಂದು ಸಂಪ್ರದಾಯವಾಗಿರದೆ, ಆರ್‌ಸಿಬಿ ತಂಡವು ತನ್ನ "12ನೇ ಆಟಗಾರರಾದ" (ಅಭಿಮಾನಿಗಳ) ಮೇಲೆ ಹೊಂದಿರುವ ಅಪಾರ ಪ್ರೀತಿ ಮತ್ತು ಗೌರವಕ್ಕೆ ಸಾಕ್ಷಿಯಾಗಲಿದೆ.

ಆರ್‌ಸಿಬಿ ತನ್ನ ಚೊಚ್ಚಲ ಐಪಿಎಲ್ ಪ್ರಶಸ್ತಿಯನ್ನು ಗೆದ್ದ ಸಂಭ್ರಮವನ್ನು ಆಚರಿಸಲು ಸಾವಿರಾರು ಅಭಿಮಾನಿಗಳು ಚಿನ್ನಸ್ವಾಮಿ ಕ್ರೀಡಾಂಗಣದ ಸುತ್ತ ಜಮಾಯಿಸಿದ್ದರು. ಈ ವೇಳೆ ಉಂಟಾದ ಭಾರಿ ಜನದಟ್ಟಣೆಯು ನಿಯಂತ್ರಣ ಮೀರಿ ಕಾಲ್ತುಳಿತಕ್ಕೆ ಕಾರಣವಾಯಿತು. ಈ ಭೀಕರ ದುರಂತದಲ್ಲಿ ಕೇವಲ 14 ವರ್ಷದ ಬಾಲಕನೂ ಸೇರಿದಂತೆ ಒಟ್ಟು 11 ಅಭಿಮಾನಿಗಳು ಪ್ರಾಣ ಕಳೆದುಕೊಂಡರು. ಅಲ್ಲದೆ, ಹಲವರು ಗಾಯಗೊಂಡು ಆಸ್ಪತ್ರೆ ಸೇರಿದ್ದರು.

ಸುರಕ್ಷತಾ ಕ್ರಮಗಳಿಗೆ ಆಗ್ರಹ

ಈ ಘಟನೆಯ ನಂತರ, ಕ್ರೀಡಾಂಗಣದ ಹೊರಗಿನ ಜನಸಂದಣಿ ನಿರ್ವಹಣೆಯನ್ನು ಸುಧಾರಿಸಬೇಕು ಮತ್ತು ಮೃತಪಟ್ಟವರ ನೆನಪಿಗಾಗಿ ಶಾಶ್ವತ ಸ್ಮಾರಕಗಳನ್ನು ನಿರ್ಮಿಸಬೇಕು ಎಂಬ ಕೂಗು ದೇಶಾದ್ಯಂತ ಕೇಳಿಬಂದಿತ್ತು. ಈ ದುರಂತವು ಆರ್‌ಸಿಬಿ ಗೆಲುವಿನ ಸಿಹಿಯನ್ನು ಕಹಿಯಾಗಿಸಿತ್ತು. ಇದೀಗ 2026ರ ಐಪಿಎಲ್ ಆರಂಭದ ವೇಳೆಗೆ ಅಂತಹ ಯಾವುದೇ ಘಟನೆ ಮರುಕಳಿಸದಂತೆ ಎಂ.ಚಿನ್ನಸ್ವಾಮಿ ಕ್ರೀಡಾಂಗಣದ ಸುತ್ತ ಅತ್ಯಂತ ಕಟ್ಟುನಿಟ್ಟಾದ ಭದ್ರತೆ ಮತ್ತು ಜನಸಂದಣಿ ನಿರ್ವಹಣಾ ವ್ಯವಸ್ಥೆಯನ್ನು ಜಾರಿಗೆ ತರಲಾಗಿದೆ.