IPL 2024 Auction: ಹಗ್ ಎಡ್ಮೀಡ್ಸ್ ಬದಲಿಗೆ ದುಬೈನಲ್ಲಿ ಮಿನಿ ಹರಾಜು ಕೂಗಲಿದ್ದಾಳೆ ಈ ಮಹಿಳೆ!

ನಿಮಗೆ ಹಗ್ ಎಡ್ಮೀಡ್ಸ್ ನೆನಪಿದೆಯೇ? 2022ರ ಮೆಗಾ ಐಪಿಎಲ್ ಹರಾಜಿನಲ್ಲಿ ವೇದಿಕೆಯ ಮೇಲೆ ಕುಸಿದು ಬಿದ್ದ ಅದೇ ಹರಾಜುದಾರ. ಅನಾರೋಗ್ಯ ಮತ್ತು ತಲೆಸುತ್ತು ಬಂದ ಕಾರಣ ಕುಸಿದು ಬಿದ್ದಿದ್ದ ಹಗ್ ಎಡ್ಮೀಡ್ಸ್, ಮರುದಿನದ ಹರಾಜು ಕರ್ತವ್ಯಕ್ಕೆ ಮರಳಿದ್ದರು.

ಇಂತಹ ತುರ್ತು ಸಂದರ್ಭದಲ್ಲಿ ಮೊದಲ ದಿನವನ್ನು ಅದ್ಭುತವಾಗಿ ನಿಭಾಯಿಸಿದ ಚಾರು ಶರ್ಮಾ ಅವರನ್ನು ಎರಡನೇ ದಿನ ಶೀಘ್ರವಾಗಿ ಬದಲಾಯಿಸಲಾಯಿತು. ಕೊಚ್ಚಿಯಲ್ಲಿ ನಡೆದ 2023ರ ಐಪಿಎಲ್ ಹರಾಜಿನಲ್ಲಿ ಹಗ್ ಎಡ್ಮೀಡ್ಸ್ ಮತ್ತೆ ಹರಾಜು ಕೂಗುವ ವೇದಿಕೆ ಮೇಲೇರಿದರು.

ಇದೀಗ ಕೆಲವು ವರದಿಗಳ ಪ್ರಕಾರ, ಹಗ್ ಎಡ್ಮೀಡ್ಸ್ ಸ್ಥಾನವನ್ನು ಭಾರತೀಯ ಮಹಿಳೆಯೊಬ್ಬಳು ಬದಲಾಯಿಸಲು ಸಜ್ಜಾಗಿದ್ದಾರೆ. ಹೌದು, ಹಗ್ ಎಡ್ಮೀಡ್ಸ್ ಬದಲಿಗೆ ಮಲ್ಲಿಕಾ ಸಾಗರ್ ಡಿಸೆಂಬರ್ 19ರಂದು ದುಬೈನಲ್ಲಿ ನಡೆಯುವ ಮಿನಿ ಹರಾಜು ಕೂಗುವ ಸಾಧ್ಯತೆಯಿದೆ.

ಮಲ್ಲಿಕಾ ಸಾಗರ್ ಈ ವೃತ್ತಿಗೆ ಹೊಸಬರೇನಲ್ಲ. ಅವಳು ಹಗ್ ಎಡ್ಮೀಡ್ಸ್ ಅವರಂತೆ ಅನುಭವಿ ಹರಾಜುಗಾರ್ತಿ. ಸ್ಪೋರ್ಟ್‌ಸ್ಟಾರ್‌ ವರದಿಯ ಪ್ರಕಾರ, ಮುಂಬರುವ ಐಪಿಎಲ್ ಮಿನಿ ಹರಾಜಿಗೆ ನಿಮ್ಮ ಸೇವೆಯ ಅಗತ್ಯವಿಲ್ಲ ಎಂದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಈಗಾಗಲೇ ಹಗ್ ಎಡ್ಮೀಡ್ಸ್‌ಗೆ ತಿಳಿಸಿದೆ.

ಡಿಸೆಂಬರ್ 19ರಂದು ದುಬೈನಲ್ಲಿ ಹರಾಜು ಪ್ರಕ್ರಿಯೆಗಳನ್ನು ನಡೆಸಿ ಕೊಡುವ ಪ್ರಸ್ತಾಪದೊಂದಿಗೆ ಬಿಸಿಸಿಐ ಈಗಾಗಲೇ ಮಲ್ಲಿಕಾ ಸಾಗರ್ ಅವರನ್ನು ಸಂಪರ್ಕಿಸಿದೆ. ಆದರೆ ಬಿಸಿಸಿಐ ಇದನ್ನು ಇಲ್ಲಿಯವರೆಗೆ ಖಚಿತಪಡಿಸಿಲ್ಲ ಎಂದು ವರದಿ ಹೇಳಿದೆ.

ಈ ವರ್ಷದ ಆರಂಭದಲ್ಲಿ ನಡೆದ ಮಹಿಳಾ ಪ್ರೀಮಿಯರ್ ಲೀಗ್ ಹರಾಜಿನಲ್ಲಿ ಇದೇ ಮಲ್ಲಿಕಾ ಸಾಗರ್ ಹರಾಜುಗಾರ್ತಿಯಾಗಿದ್ದರು. ಡಿಸೆಂಬರ್ 9ರಂದು ಮುಂಬೈನಲ್ಲಿ ನಡೆಯಲಿರುವ 2024ರ WPL ಹರಾಜಿನಲ್ಲಿ ಮಲ್ಲಿಕಾ ಸಾಗರ್ ಹರಾಜು ಕೂಗುವ ವೇದಿಕೆಯಲ್ಲಿರಲಿದ್ದಾರೆ.

ಮುಂಬೈನ ಪುಂಡೋಲ್ಸ್‌ನಲ್ಲಿ ಹರಾಜುದಾರರಾಗಿರುವ ಮಲ್ಲಿಕ್ ಸಾಗರ್, ಫಿಲಡೆಲ್ಫಿಯಾದ ಬ್ರೈನ್ ಮಾವರ್ ಕಾಲೇಜಿನಲ್ಲಿ ಕಲಾ ಇತಿಹಾಸ ಪದವಿಯನ್ನು ಪಡೆದ ಬಳಿಕ 2001ರಲ್ಲಿ ಕ್ರಿಸ್ಟೀಸ್‌ನಲ್ಲಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು.

ಗಮನಾರ್ಹವಾಗಿ, ಮಲ್ಲಿಕಾ ಭಾರತೀಯ ಮೂಲದ ಮೊದಲ ಹರಾಜುದಾರರಾದರು ಮತ್ತು ಕ್ರಿಸ್ಟೀಸ್‌ನಲ್ಲಿ ಆ ಪಾತ್ರದಲ್ಲಿ ಮೊದಲ ಮಹಿಳೆಯಾಗಿದ್ದಾರೆ. ಅವರು 2021ರಲ್ಲಿ ಪ್ರೊ ಕಬಡ್ಡಿ ಲೀಗ್‌ನ ಹರಾಜನ್ನು ಸಹ ನಡೆಸಿಕೊಟ್ಟಿದ್ದಾರೆ. ಕಬಡ್ಡಿ ಹರಾಜು ನಡೆಸಿದ ಮೊದಲ ಮಹಿಳೆಯಾಗಿದ್ದಾರೆ.

ಇನ್ನು ಹಗ್ ಎಡ್ಮೀಡ್ಸ್ ಅವರಿಗೆ ರಿಚರ್ಡ್ ಮ್ಯಾಡ್ಲಿ ಅವರು ಬ್ಯಾಟನ್ ಅನ್ನು ಹಸ್ತಾಂತರಿಸಿದ್ದರಿಂದ, ಎಡ್ಮೀಡ್ಸ್ 2018ರಲ್ಲಿ ಐಪಿಎಲ್‌ನ ಅಧಿಕೃತ ಹರಾಜುದಾರರಾಗಿ ಜವಾಬ್ದಾರಿ ವಹಿಸಿಕೊಂಡರು.

2022ರ ಮೆಗಾ ಹರಾಜಿನಲ್ಲಿ, ಭಂಗಿಯ ಹೈಪೊಟೆನ್ಷನ್ ಕಾರಣದಿಂದ ಎಡ್ಮೀಡ್ಸ್ ಬೆಂಗಳೂರಿನ ಹೋಟೆಲ್‌ನ ಬಿಡ್ ರೂಂನಲ್ಲಿ ಹರಾಜು ಮಾಡುವಾಗ ನೆಲದ ಮೇಲೆ ಕುಸಿದು ಬಿದ್ದರು. ಕೂಡಲೇ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತು.

ಹಗ್ ಎಡ್ಮೀಡ್ಸ್ ಅವರು ಫೈನ್ ಆರ್ಟ್, ಕ್ಲಾಸಿಕ್ ಕಾರುಗಳು ಮತ್ತು ಚಾರಿಟಿ ಹರಾಜುಗಳಲ್ಲಿ ಪರಿಣತಿ ಹೊಂದಿದ್ದಾರೆ. 2016ರಲ್ಲಿ ಸ್ವತಂತ್ರ ವೃತ್ತಿಜೀವನಕ್ಕೆ ಪ್ರವೇಶಿಸುವ ಮೊದಲು ಪ್ರತಿಷ್ಠಿತ ಕ್ರಿಸ್ಟೀಸ್‌ನೊಂದಿಗೆ 38 ವರ್ಷಗಳನ್ನು ಕಳೆದಿದ್ದರು.

ಹಗ್ ಎಡ್ಮೀಡ್ಸ್ ತಮ್ಮ ಮೊದಲ ಐಪಿಎಲ್ ಹರಾಜು ನಡೆಸಲು 2018ರಲ್ಲಿ ಜೈಪುರಕ್ಕೆ ಪ್ರಯಾಣಿಸಿದರು. ಅದಕ್ಕೂ ಮುನ್ನ ಅವರು 2500ಕ್ಕೂ ಹೆಚ್ಚು ಹರಾಜುಗಳನ್ನು ನಡೆಸಿದ್ದರು. ಆದರೆ ಕ್ರಿಕೆಟ್‌ನಲ್ಲಿ ಯಾವುದೂ ಇರಲಿಲ್ಲ.