ಐಎಸ್‌ಎಲ್: ಈಸ್ಟ್‌ ಬೆಂಗಾಲ್‌ ಕದನ ಗೆದ್ದು ಸೋಲಿನ ಕೊಂಡಿ ಕಳಚುವ ತವಕದಲ್ಲಿ ಬಿಎಫ್‌ಸಿ

ಗೋವಾ, ಜನವರಿ 8: ಪ್ರಸಕ್ತ ಸಾಲಿನ ಇಂಡಿಯನ್ ಸೂಪರ್‌ ಲೀಗ್‌ ಟೂರ್ನಿಯಲ್ಲಿ ಬೆಂಗಳೂರು ಎಫ್‌ಸಿ ತಂಡದ ಅದೃಷ್ಟ ಕೈಕೊಟ್ಟಂತೆ ಕಾಣಿಸುತ್ತಿದೆ. ಏಕೆಂದರೆ ಕಳೆದ ಮೂರೂ ಪಂದ್ಯಗಳನ್ನು ಸೋತು ಸುಣ್ಣವಾಗಿರುವ ಮಾಜಿ ಚಾಂಪಿಯನ್ಸ್‌, ಐಎಸ್‌ಎಲ್‌ ಟೂರ್ನಿಯ ಇತಿಹಾಸದಲ್ಲಿ ಮೊತ್ತ ಮೊದಲ ಬಾರಿ ಇಷ್ಟು ಕಳಪೆ ಪ್ರದರ್ಶನ ನೀಡಿದೆ.

ಬೆಂಗಳೂರು ಎಫ್‌ಸಿ ತಂಡ ಈಗ ಫತೊರ್ಡ ಕ್ರೀಡಾಂಗಣದಲ್ಲಿ ಶನಿವಾರ ನಡೆಯಲಿರುವ ಪಂದ್ಯದಲ್ಲಿ ಈಸ್ಟ್‌ ಬೆಂಗಾಲ್‌ ಎಫ್‌ಸಿ ವಿರುದ್ಧ ಪೈಪೋಟಿ ನಡೆಸಲಿದ್ದು, ಹ್ಯಾಟ್ರಿಕ್ ಸೋಲಿನ ಕೊಂಡಿ ಕಳಚುವ ತವಕದಲ್ಲಿದೆ. ಅಂದಹಾಗೆ ತಂಡದ ಈ ಹೀನಾಯ ಪ್ರದರ್ಶನದ ಬೆನ್ನಲ್ಲೇ ತನ್ನ ಮುಖ್ಯ ಕೋಚ್‌ ಕಾರ್ಲೋಸ್‌ ಕೌಡಾರ್ಟ್‌ ಅವರನ್ನು ಕಿತ್ತೊಗೆದಿರುವ ಬಿಎಫ್‌ಸಿ ನೌಶದ್ ಮೂಸಾ ಅವರನ್ನು ಮಧ್ಯಂತರ ಕೋಚ್‌ ಆಗಿ ನೇಮಕ ಮಾಡಿದೆ.

"ಮುಂದಿನ ಪಂದ್ಯ ನಮ್ಮ ಪಾಲಿಗೆ ಅತ್ಯಂತ ಮಹತ್ವದ್ದು. ಆಟಗಾರರಿಗೂ ಇದರ ಅರಿವಿದೆ. ಕಳೆದ 7 ವರ್ಷಗಳಲ್ಲಿ ಇಷ್ಟು ಕಳಪೆ ಪ್ರದರ್ಶನ ನೀಡಿರುವುದು ಇದೇ ಮೊದಲು. ಸತತ ಮೂರು ಪಂದ್ಯ ಸೋತ್ತಿದ್ದೇವೆ. ಆಟಗಾರರಿಗೆ ಇದನ್ನು ಸರಗಿಸಿಕೊಳ್ಳುವುದು ಬಹಳಾ ಕಷ್ಟವಾಗಿದೆ. ಹೀಗಾಗಿ ಪುಟಿದೇಳುವ ತವಕದಲ್ಲಿದ್ದಾರೆ. ಆಗಿದ್ದೆಲ್ಲವನ್ನೂ ಮರೆತು ಮುಂದಿನ ಪಂದ್ಯದ ಕಡೆಗೆ ಗಮನ ನೀಡುವ ಅಗತ್ಯವಿದೆ," ಎಂದು ಮೂಸಾ ಹೇಳಿದ್ದಾರೆ.

ಬಿಎಫ್‌ಸಿ ಈಗ ಕಳೆದ ನಾಲ್ಕು ಪಂದ್ಯಗಳಲ್ಲಿ ಸೋಲಿಲ್ಲದ ಸರದಾರನಂತೆ ಮೆರೆದಿರುವ ಎಸ್‌ಸಿ ಈಸ್ಟ್‌ ಬೆಂಗಾಲ್‌ ತಂಡದ ಸವಾಲನ್ನು ಎದುರಿಸಲಿದೆ. ಈ ಬಗ್ಗೆ ಮಾತನಾಡಿರುವ ಮೂಸಾ ಅತ್ಯಂತ ಮನೋರಂಜನಾತ್ಮಕ ಪಂದ್ಯ ಮೂಡಿಬರಲಿದೆ ಎಂದಿದ್ದಾರೆ. "ಈಸ್ಟ್‌ ಬೆಂಗಾಲ್‌ ಉತ್ತಮ ತಂಡ. ಪಂದ್ಯದಿಂದ ಪಂದ್ಯಕ್ಕೆ ಸುಧಾರಿಸುತ್ತಿದೆ. ಬ್ರೈಟ್‌ ಎನೊಬಾಖ್ರೆ ಒಬ್ಬ ಪ್ರತಿಭಾನ್ವಿತ ಆಟಗಾರ. ಹೀಗಾಗಿ ಈ ಪಂದ್ಯದಲ್ಲಿ ಮನೋರಂಜನಾತ್ಮಕ ಫುಟ್ಬಾಲ್‌ ಆಟ ಕಾಣಲು ಸಿಗಲಿದೆ. ಇದರ ಭರಚಸೆ ನೀಡಬಲ್ಲೆ. ಚೆಂಡಿನ ನಿಯಂತ್ರಣ ಕಳೆದುಕೊಂಡಾಗ ಒತ್ತಡಕ್ಕೆ ಒಳಗಾಗದೆ ಗೋಲ್‌ ಬಿಟ್ಟುಕೊಡದಂತೆ ನೋಡಿಕೊಳ್ಳುವ ಅಗತ್ಯವಿದೆ," ಎಂದಿದ್ದಾರೆ.

ಕೌಡಾರ್ಟ್‌ ಮಾರ್ಗದರ್ಶನದಲ್ಲಿ ಬೆಂಗಳೂರು ಎಫ್‌ಸಿ ತಂಡ ಈ ಬಾರಿ ಅತ್ಯಂತ ಹೀನಾಯ ಪ್ರದರ್ಶನ ನೀಡಿದ್ದು, ಹೆಚ್ಚು ಗೋಲ್‌ಗಳನ್ನು ಬಿಟ್ಟುಕೊಟ್ಟಿದೆ. ಅದರಲ್ಲೂ ಕಳೆದ ಕೆಲ ಪಂದ್ಯಗಳಲ್ಲಿ ತಂಡದ ಪ್ರದರ್ಶನ ಹೀನಾಯ ಸ್ಥಿತಿ ತಲುಪಿದೆ. ತಂಡದ ಸ್ಟ್ರೈಕರ್‌ಗಳು ಯಶಸ್ಸು ತಂದುಕೊಡಲು ವಿಫಲರಾಗುತ್ತಿದ್ದಂತೆಯೇ ತಂಡದ ಬಲ ಕುಗ್ಗಿದಂತ್ತಾಗಿದೆ. ಕಳೆದ 9 ಪಂದ್ಯಗಳಲ್ಲಿ ಬಿಎಫ್‌ಸಿ ಕೇವಲ 3 ಪಂದ್ಯಗಳಲ್ಲಿ ಮಾತ್ರವೇ ಗೆಲುವಿನ ರುಚಿ ಕಂಡಿದೆ. ಈ ಪಂದ್ಯಗಳಲ್ಲಿ ಒಟ್ಟು 12 ಗೋಲ್‌ ಗಳಿಸಿದರೆ ಅಷ್ಟೇ ಗೋಲ್‌ಗಳನ್ನು ಬಿಟ್ಟುಕೊಟ್ಟಿದೆ.

"ಈ ಬಗ್ಗೆ ಹೆಚ್ಚು ಕೆಲಸ ಮಾಡುತ್ತಿದ್ದೇವೆ. ನಾವು ಎಲ್ಲಾ ವಿಡಿಯೋಗಳನ್ನು ಗಮನಿಸಿದ್ದೇವೆ. ದಾಳಿ ಮಾಡುವಾಗ ನಮ್ಮಲ್ಲಿ ಸಂಖ್ಯೆ ಕಡಿಮೆ ಇದೆ ಎಂಬುದು ಗೊತ್ತಾಗಿದೆ. ಹೀಗಾಗಿ ಮುಂದಿನ ಪಂದ್ಯಗಳಲ್ಲಿ ದಾಳಿ ಮಾಡುವಾಗ ಹೆಚ್ಚಿನ ಸಂಖ್ಯೆ ಕಾಯ್ದುಕೊಳ್ಳುವ ಕಡೆಗೆ ಗಮನ ನೀಡಲಿದ್ದೇವೆ. ಈ ಮೂಲಕ ಗೋಲ್‌ ಗಳಿಕೆಯ ಹೆಚ್ಚು ಅವಕಾಶಗಳನ್ನು ಸೃಷ್ಟಿಸುವ ಪ್ರಯತ್ನ ಮಾಡಲಿದ್ದೇವೆ," ಎಂದು ಮೂಸಾ ಹೇಳಿದ್ದಾರೆ.

ಎಫ್‌ಸಿ ಗೋವಾ ವಿರುದ್ಧ ನೀಡಿದ ಅದ್ಭುತ ಪ್ರದರ್ಶನದಿಂದ ಈಸ್ಟ್‌ ಬೆಂಗಾಲ್‌ ತಂಡ ಆತ್ಮವಿಶ್ವಾಸದ ಅಲೆಯಲ್ಲಿದೆ. ಪಂದ್ಯದಲ್ಲಿ 10 ಆಟಗಾರರೊಂದಿಗೆ ಹೋರಾಡುವಂತ್ತಾದರೂ ಬೆಂಗಾಲ್‌ ಬಲಿಷ್ಠ ತಂಡವಾಗಿ ಕಾಣಿಸಿತ್ತು. ಪ್ರಮುಖವಾಗಿ ಹೊಸ ಪ್ರತಿಭೆ ಬ್ರೈಟ್‌ ಎನೊಬಾಖ್ರೆ ಸತತ ಗೋಲ್‌ ಬಾರಿಸಿ ಗಮನ ಸೆಳೆದಿದ್ದಾರೆ.

ಬಿಎಸ್‌ಸಿ ವಿರುದ್ಧವೂ ಉತ್ತಮ ಪ್ರದರ್ಶನ ನೀಡುವುದಾಗಿ ನೈಜೀರಿಯಾ ಮೂಲದ ಫುಟ್ಬಾಲ್‌ ಹೇಳಿಕೊಂಡಿದ್ದಾರೆ. "ಇದು ನನ್ನ ಪಾಲಿಗೆ ಅದ್ಭುತ ಸಮಯ. ಇಲ್ಲಿನ ಆಟಗಾರರು ಮತ್ತು ಸಿಬ್ಬಂದಿ ವರ್ಗ ಅದ್ಭುತವಾಗಿದ್ದಾರೆ. ಮುಂದಿನ ಪಂದ್ಯದ ಕಡೆಗೆ ಗಮನ ನೀಡಿ ಸಾಧ್ಯವಾದಷ್ಟು ಅಂಕಗಳನ್ನು ಕಲೆಹಾಕುವ ಕಡೆಗೆ ಎದುರು ನೋಡಬೇಕಿದೆ. ಸೀಸನ್‌ನ ಅಂತ್ಯಕ್ಕೆ ಉತ್ತಮ ಸ್ಥಾನ ಕಾಯ್ದುಕೊಳ್ಳುವ ಅಗತ್ಯವಿದೆ," ಎಂದು ಬ್ರೈಟ್‌ ಹೇಳಿದ್ದಾರೆ.

ಕಳೆದ ಪಂದ್ಯದಲ್ಲಿ ಎರಡನೇ ಬಾರಿ ಎಚ್ಚರಿಕೆ ಪಡೆದಿದ್ದ ಈಸ್ಟ್‌ ಬೆಂಗಾಲ್‌ ತಂಡದ ಬಾಸ್‌ ರಾಬಿ ಫ್ಲವರ್‌ ಒಂದು ಪಂದ್ಯ ಅಮಾನತು ಎದುರಿಸುವಂತ್ತಾಗಿದೆ. ಜೊತೆಗೆ ತಂಡದ ನಾಯಕ ಡ್ಯಾನಿ ಫಾಕ್ಸ್‌ ಕೂಡ ಕಳೆದ ಪಂದ್ಯದಲ್ಲಿ ರೆಡ್‌ ಕಾರ್ಡ್‌ ಪಡೆದಿರುವ ಕಾರಣ ಬಿಎಫ್‌ಸಿ ಎದುರು ಕಣಕ್ಕಿಳಿಯದಂತ್ತಾಗಿದ್ದಾರೆ. ಗಾಯದ ಮೇಲೆ ಬರೆ ಎಂಬಂತೆ ಅನುಭವಿ ಆಟಗಾರ ಹರ್ಮನ್‌ಜೋತ್‌ ಖಾಬ್ರಾ ಸೇವೆಯನ್ನೂ ಬೆಂಗಾಲ್‌ ತಂಡ ಕಳೆದುಕೊಂಡಿದೆ.