ವರ್ಣಬೇಧದ ವಿರುದ್ಧ ಧ್ವನಿಯೆತ್ತಿ, ಯಾಕಂದ್ರೆ ಅದು ತಪ್ಪು: ಜೋಫ್ರಾ ಆರ್ಚರ್

ಇಂಗ್ಲೆಂಡ್‌ನ ತಂಡದ ಯುವ ವೇಗಿ ಜೋಫ್ರಾ ಆರ್ಚರ್ ಜನಾಂಗೀಯ ನಿಂದನೆ ಅನುಭವಿಸಿದ ಕ್ರೀಡಾಪಟುಗಳು ಧ್ವನಿ ಎತ್ತಬೇಕು ಎಂದಿದ್ದಾರೆ. ಅಮೆರಿಕಾದಲ್ಲಿ ವರ್ಣಬೇಧದ ಕಾರಣಕ್ಕೆ ವ್ಯಕ್ತಿಯೋರ್ವನನ್ನು ಪೊಲೀಸ್ ಅಧಿಕಾರಿ ಮೊಣಕಾಲಿನಿಂದ ಉಸಿರುಗಟ್ಟಿಸಿ ಕೊಂದ ಬಳಿಕ ಈ ಬಗ್ಗೆ ಪ್ರತಿಭಟನೆಗಳು ತೀವ್ರಗೊಳ್ಳುತ್ತಿದೆ. ಈ ಹಿನ್ನೆಲೆಯಲ್ಲಿ ಆರ್ಚರ್ ಈ ರೀತಿ ಪ್ರತಿಕ್ರಿಯಿಸಿದ್ದಾರೆ.

ಡೈಲಿ ಮೇಲ್‌ಗೆ ಬರೆದಿರುವ ಅಂಕಣದಲ್ಲಿ ಈ ವಿಚಾರವನ್ನು ಆರ್ಚರ್ ಪ್ರಸ್ತಾಪಿಸಿದ್ದಾರೆ. 'ಬ್ಲಾಕ್ ಲೈವ್ಸ್ ಮ್ಯಾಟರ್' ಅಭಿಯಾನ ಸಾಕಷ್ಟು ಪರಿಣಾಮಕಾರಿಯಾಗಿ ನಡೆಯುತ್ತಿದೆ. ಇದಕ್ಕಾಗಿ ನಾನು ಮೆಚ್ಚುಗೆಯನ್ನು ವ್ಯಕ್ತಪಡಿಸುತ್ತೇನೆ ಎಂದಿದ್ದಾರೆ ಜೋಫ್ರಾ ಆರ್ಚರ್.

ಜೋಫ್ರಾ ಆರ್ಚರ್ ಕಳೆದ ನ್ಯೂಜಿಲೆಂಡ್ ಪ್ರವಾಸದಲ್ಲಿ ಜನಾಂಗೀಯ ನಿಂದನೆಗೆ ಒಳಗಾಗಿದ್ದರು. ಪ್ರೇಕ್ಷಕನೋರ್ವ ಆರ್ಚರ್ ಅವರನ್ನು ಗುರಿಯಾಗಿಸಿ ನಿಂದಿಸಿದ್ದ. ಈ ವಿಚಾರ ಕ್ರಿಕೆಟ್ ವಲಯದಲ್ಲಿ ಸಾಕಷ್ಟು ಸಂಚಲನಕ್ಕೆ ಕಾರಣವಾಗಿತ್ತು. ಬಳಿಕ ಆರೋಪಿಯನ್ನು ನ್ಯೂಜಿಲೆಂಡ್ ಸರ್ಕಾರ ಪತ್ತೆ ಹಚ್ಚಿ ಬಂಧಿಸುವಲ್ಲಿ ಯಶಸ್ವಿಯಾಗಿತ್ತು.

ಓರ್ವ ವ್ಯಕ್ತಿಯಾಗಿ ಈ ರೀತಿಯ ಘಟನೆಗಳ ವಿರುದ್ಧ ನಾನು ಯಾವಾಗಲೂ ಧ್ವನಿ ಎತ್ತುತ್ತೇನೆ. ನಿಮಗೆ ಕೆಟ್ಟದು ಆಗುತ್ತಿದೆ ಎಂದು ಅನಿಸಿದರೆ ನೀವು ಧ್ವನಿಎತ್ತಬೇಕು. ಇಂತಾ ವಿಚಾರಗಳನ್ನು ಮುಚ್ಚಿಟ್ಟುಕೊಂಡಿರುವುದು ಸರಿಯಲ್ಲ. ಯಾಕೆಂದರೆ ವರ್ಣಬೇಧ ನೀತಿ ಸರಿಯಲ್ಲ ಎಂದು ಅವರು ಬರೆದುಕೊಂಡಿದ್ದಾರೆ.

ಇಂಗ್ಲೆಂಡ್ ತಂಡದ ಪರವಾಗಿ 7 ಟೆಸ್ಟ್ ಮತ್ತು 14 ಅಂತಾರಾಷ್ಟ್ರೀಯ ಏಕದಿನ ಪಂದ್ಯಗಳಲ್ಲಿ ಪ್ರತಿನಿಧಿಸಿರುವ ಆರ್ಚರ್ ತಮ್ಮ ತಂಡದಲ್ಲಿರುವ ವೈವಿಧ್ಯತೆಯ ಬಗ್ಗೆಯೂ ಹೇಳಿಕೊಂಡಿದ್ದಾರೆ. 2019 ರ ವಿಶ್ವಕಪ್ ಸಂದರ್ಭದಲ್ಲಿ ನನ್ನ, ಜೋಸ್ ಬಟ್ಲರ್ ಮತ್ತು ಆದಿಲ್ ರಶೀದ್ ಸಂಭ್ರಮಾಚರಣೆಯಲ್ಲಿ ಒಂದು ಚಿತ್ರ ಇತ್ತು. ನಮ್ಮ ತಂಡದ ಬಗ್ಗೆ ನೀವು ತಿಳಿದುಕೊಳ್ಳಬೇಕಾದ ಎಲ್ಲವನ್ನೂ ಇದು ನಿಮಗೆ ತಿಳಿಸಿದೆ "ಎಂದು ಆರ್ಚರ್ ತಂಡ ವೈವಿಧ್ಯತೆಯ ಬಗ್ಗೆಯೂ ಬರೆದುಕೊಂಡಿದ್ದಾರೆ.