4 ವಿಕೆಟ್‌ ಪಡೆಯುತ್ತಲೇ ಎಲೈಟ್‌ ಕ್ಲಬ್‌ ಸೇರಲಿರುವ ಜಡೇಜಾ

ಭಾರತ ಹಾಗೂ ದಕ್ಷಿಣ ಆಫ್ರಿಕಾ ನಡುವಣ ಎರಡನೇ ಟೆಸ್ಟ್ ಗುವಾಹಟಿಯಲ್ಲಿ ನಡೆಯಲಿದೆ. ಈ ಟೆಸ್ಟ್‌ ಪಂದ್ಯದಲ್ಲಿ ಜಯ ಸಾಧಿಸಿ, ಸರಣಿಯಲ್ಲಿ ಪುಟಿದೇಳುವ ಲೆಕ್ಕಾಚಾರವನ್ನು ಹಾಕಿಕೊಂಡಿದೆ. ಕೋಲ್ಕತ್ತದಲ್ಲಿ ನಡೆದ ಮೊದಲ ಟೆಸ್ಟ್‌ನಲ್ಲಿ ಆತಿಥೇ ತಂಡದ ಸೋಲನ್ನು ಕಂಡಿದ್ದರಿಂದ, ಎರಡನೇ ಟೆಸ್ಟ್ ಪಂದ್ಯದಲ್ಲಿ ಆತಿಥೇಯ ತಂಡ ಗೆಲ್ಲುವುದು ಅನಿವಾರ್ಯವಾಗಿದೆ. ಈ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಪರ ಕಣಕ್ಕೆ ಇಳಿಯುವ ರವೀಂದ್ರ ಜಡೇಜಾ ಅವರ ಮೇಲೆ ಎಲ್ಲರ ಕಣ್ಣುಗಳು ನೆಟ್ಟಿರಲಿವೆ.

ಕೋಲ್ಕತ್ತದಲ್ಲಿ ನಡೆದ ಮೊದಲ ಟೆಸ್ಟ್‌ ಪಂದ್ಯದ ಎರಡನೇ ಇನಿಂಗ್ಸ್‌ನಲ್ಲಿ ಸೊಗಸಾದ ಸ್ಪಿನ್ ದಾಳಿ ನಡೆಸಿ ಎದುರಾಳಿ ಬ್ಯಾಟರ್‌ಗಳನ್ನು ಕಾಡಿದ್ದರು. ಈ ವೇಳೆ ಜಡ್ಡು 4 ವಿಕೆಟ್‌ ಪಡೆದು ಮಿಂಚಿದ್ದರು. ಗುವಾಹಟಿಯಲ್ಲಿ ನಡೆಯಲಿರುವ ಟೆಸ್ಟ್‌ ಪಂದ್ಯದಲ್ಲಿ ಜಡೇಜಾ ಸ್ಥಿರ ಪ್ರದರ್ಶನವನ್ನು ನೀಡಿ 4 ವಿಕೆಟ್‌ ಕಬಳಿಸಿದ್ದೇ ಆದಲ್ಲಿ ದೊಡ್ಡ ದಾಖಲೆಯನ್ನು ಬರೆಯಬಹುದಾಗಿದೆ.

ಶನಿವಾರದಿಂದ ಗುವಾಹಟಿಯಲ್ಲಿ ಎರಡನೇ ಟೆಸ್ಟ್‌ ನಡೆಯಲಿದೆ. ಈ ಪಂದ್ಯದಲ್ಲಿ ರವೀಂದ್ರ ಜಡೇಜಾ ಬಿಗುವಿನ ದಾಳಿ ನಡೆಸಿ 4 ವಿಕೆಟ್‌ಗಳನ್ನು ಪಡೆದಲ್ಲಿ, ದಕ್ಷಿಣ ಆಫ್ರಿಕಾ ವಿರುದ್ಧ ಟೆಸ್ಟ್‌ನಲ್ಲಿ 50 ವಿಕೆಟ್‌ಗಳನ್ನು ಪೂರ್ಣಗೊಳಿಸಿದ ಭಾರತದ ಐದನೇ ಬೌಲರ್‌ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಲಿದ್ದಾರೆ. ಈ ಪಟ್ಟಿಯಲ್ಲಿ ಟೀಮ್ ಇಂಡಿಯಾದ ಸ್ಪಿನ್ ಬೌಲರ್ ಅನಿಲ್‌ ಕುಂಬ್ಳೆ ಮೊದಲ ಸ್ಥಾನದಲ್ಲಿದ್ದಾರೆ. ಇವರು ಹರಿಣಗಳ ವಿರುದ್ಧ 84 ವಿಕೆಟ್‌ ಕಬಳಿಸಿದ್ದಾರೆ.

ದಕ್ಷಿಣ ಆಫ್ರಿಕಾ ವಿರುದ್ಧ ಟೆಸ್ಟ್‌ನಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದ ಭಾರತೀಯ ಬೌಲರ್ಸ್‌

ಅನಿಲ್ ಕುಂಬ್ಳೆ, 21 ಟೆಸ್ಟ್ ಪಂದ್ಯ, 84 ವಿಕೆಟ್‌
ಜಾವಗಲ್ ಶ್ರೀನಾಥ್, 13 ಟೆಸ್ಟ್ ಪಂದ್ಯ, 64 ವಿಕೆಟ್‌
ಹರ್ಭಜನ್ ಸಿಂಗ್, 11 ಟೆಸ್ಟ್ ಪಂದ್ಯ, 60 ವಿಕೆಟ್‌
ರವಿಚಂದ್ರನ್ ಅಶ್ವಿನ್, 14 ಟೆಸ್ಟ್ ಪಂದ್ಯ, 57 ವಿಕೆಟ್‌
ಮೊಹಮ್ಮದ್ ಶಮಿ, 11 ಟೆಸ್ಟ್ ಪಂದ್ಯ, 48 ವಿಕೆಟ್‌
ರವೀಂದ್ರ ಜಡೇಜಾ, 10 ಟೆಸ್ಟ್ ಪಂದ್ಯ, 46 ವಿಕೆಟ್‌

ರವೀಂದ್ರ ಜಡೇಜಾ ಎರಡನೇ ಟೆಸ್ಟ್‌ ಪಂದ್ಯದಲ್ಲಿ ಮೂರು ವಿಕೆಟ್‌ ಪಡೆದಿದ್ದೇ ಆದಲ್ಲಿ, ಮೊಹಮ್ಮದ್ ಶಮಿ ಅವರ ದಾಖಲೆಯನ್ನು ಅಳಿಸಿ ಹಾಕಲಿದ್ದಾರೆ. ಮೊಹಮ್ಮದ್ ಶಮಿ 11 ಟೆಸ್ಟ್‌ ಪಂದ್ಯಗಳಲ್ಲಿ 48 ವಿಕೆಟ್‌ ಕಬಳಿಸಿದ್ದಾರೆ. ಜಡ್ಡು 10 ಪಂದ್ಯಗಳಲ್ಲಿ 46 ವಿಕೆಟ್‌ ಪಡೆದಿದ್ದಾರೆ.

ಜಡ್ಡು ಸಾಧನೆ

36 ವರ್ಷದ ಜಡೇಜಾ ಭಾರತದ ಪರ 88 ಟೆಸ್ಟ್‌ ಪಂದ್ಯಗಳನ್ನು ಆಡಿದ್ದು, 2.58 ಎಕಾನಮಿಯೊಂದಿಗೆ 342 ವಿಕೆಟ್‌ ಕಬಳಿಸಿದ್ದಾರೆ. ಇನ್ನು ಬ್ಯಾಟಿಂಗ್‌ನಲ್ಲೂ ಇವರು ತಂಡಕ್ಕೆ ಆಧಾರವಾಗಬಲ್ಲ ಪ್ಲೇಯರ್. ಇವರು 55ರ ಸರಾಸರಿಯಲ್ಲಿ 4035 ರನ್‌ ಕಲೆ ಹಾಕಿದ್ದಾರೆ.