MCL 2025: 11 ಸಿಕ್ಸರ್‌ ಬಾರಿಸಿ ಅಬ್ಬರಿಸಿದ ಡೆಲ್ಲಿ ಪ್ಲೇಯರ್‌

ಮೇಜರ್‌ ಲೀಗ್‌ ಕ್ರಿಕೆಟ್‌ ಟೂರ್ನಿಯಲ್ಲಿ ಭರವಸೆಯ ಆಟಗಾರರು ಅಬ್ಬರದ ಪ್ರದರ್ಶನ ನೀಡುತ್ತಿದ್ದಾರೆ. ಈ ಸಾಲಿಗೆ ಈಗ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಆಟಗಾರ ಸೇರಿದ್ದಾರೆ. ಐಪಿಎಲ್‌ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡದ ಪರ ಆಡುವ ಜೇಕ್ ಫ್ರೇಸರ್-ಮೆಕ್‌ಗುರ್ಕ್ ಎಂಸಿಎಲ್‌ನಲ್ಲಿ ಅಬ್ಬರಿಸಿದ್ದಾರೆ. ಇವರು ಸ್ಯಾನ್ ಫ್ರಾನ್ಸಿಸ್ಕೊ ​​ಯೂನಿಕಾರ್ನ್ಸ್ ಪರ ಬ್ಯಾಟ್ ಮಾಡಿ ಅಬ್ಬರಿಸಿದರು.

ಶನಿವಾರ ಸ್ಯಾನ್ ಫ್ರಾನ್ಸಿಸ್ಕೊ ​​ಯೂನಿಕಾರ್ನ್ಸ್ ಹಾಗೂ ಲಾಸ್ ಏಂಜಲೀಸ್ ನೈಟ್ ರೈಡರ್ಸ್ ತಂಡದ ನಡುವೆ ಕಾದಾಟ ನಡೆಯಿತು. ಈ ಹೋರಾಟದಲ್ಲಿ ಟಾಸ್‌ ಸೋತರೂ ಮೊದಲು ಬ್ಯಾಟ್ ಮಾಡಿದ ಸ್ಯಾನ್ ಫ್ರಾನ್ಸಿಸ್ಕೊ ​​ಯೂನಿಕಾರ್ನ್ಸ್ ತಂಡ 20 ಓವರ್‌ಗಳಲ್ಲಿ 8 ವಿಕೆಟ್‌ ನಷ್ಟಕ್ಕೆ 219 ರನ್‌ ಕಲೆ ಹಾಕಿತು. ಇದಕ್ಕುತ್ತರವಾಗಿ ಬ್ಯಾಟ್ ಮಾಡಿದ ಏಂಜಲೀಸ್ ನೈಟ್ ರೈಡರ್ಸ್ 19.5 ಓವರ್‌ಗಳಲ್ಲಿ 187 ರನ್‌ ಸೇರಿಸಿ ಸೋಲು ಕಂಡಿತು. ಲೀಗ್‌ನಲ್ಲಿ ಸ್ಯಾನ್ ಫ್ರಾನ್ಸಿಸ್ಕೊ ​​ತಂಡ ದಾಖಲಿಸಿದ ಸತತ ಎರಡನೇ ಗೆಲುವಾಗಿದೆ.

ಮೊದಲು ಬ್ಯಾಟ್ ಮಾಡಿದ ಸ್ಯಾನ್ ಫ್ರಾನ್ಸಿಸ್ಕೊ ತಂಡದ ಟಿಮ್ ಸೀಫರ್ಟ್ (5) ದೊಡ್ಡ ಇನಿಂಗ್ಸ್ ಕಟ್ಟಲಿಲ್ಲ. ಎರಡನೇ ವಿಕೆಟ್‌ಗೆ ಫಿನ್ ಅಲೇನ್‌ ಹಾಗೂ ಜೇಕ್ ಫ್ರೇಸರ್-ಮೆಕ್‌ಗುರ್ಕ್ ಸೊಗಸಾದ ಜೊತೆಯಾಟದ ಕಾಣಿಕೆ ನೀಡಿ ತಂಡಕ್ಕೆ ಆಧಾರವಾದರು. ಎರಡನೇ ವಿಕೆಟ್‌ಗೆ ಜೇಕ್ ಫ್ರೇಸರ್-ಮೆಕ್‌ಗುರ್ಕ್ ಹಾಗೂ ಅಲೇನ್‌ ಜೋಡಿ 55 ಎಸೆತಗಳಲ್ಲಿ 121 ರನ್‌ ಸೇರಿಸಿತು. ಮೊದಲ ಪಂದ್ಯದಲ್ಲಿ ಅಬ್ಬರಿಸಿ ಶತಕ ಬಾರಿಸಿದ್ದ ಫಿನ್ ಅಲೇನ್‌, ಎರಡನೇ ಪಂದ್ಯದಲ್ಲೂ 5 ಬೌಂಡರಿ, 4 ಸಿಕ್ಸರ್ ಸಹಾಯದಿಂದ 52 ರನ್‌ ಬಾರಿಸಿ ಮಿಂಚಿದರು.

11 ಸಿಕ್ಸರ್‌

ಜೇಕ್ ಫ್ರೇಸರ್-ಮೆಕ್‌ಗುರ್ಕ್ ಆರ್ಭಟಿಸಿದರು. ಇವರು 38 ಎಸೆತಗಳಲ್ಲಿ 88 ರನ್‌ ಬಾರಿಸಿದರು. ಇವರ ಇನಿಂಗ್ಸ್‌ನಲ್ಲಿ 2 ಬೌಂಡರಿ, 11 ಸಿಕ್ಸರ್‌ಗಳು ಸೇರಿವೆ. ಈ ತಂಡದ ಪರ ಸಂಜಯ್‌ ಕೃಷ್ಣ ಮೂರ್ತಿ 12, ಕೂಪರ್ ಕಾನೋಲಿ 20 ರನ್‌ ಸಿಡಿಸಿ ಔಟ್ ಆದರು.

ಗುರಿಯನ್ನು ಹಿಂಬಾಲಿಸಿದ ಲಾಸ್ ಏಂಜಲೀಸ್ ನೈಟ್ ರೈಡರ್ಸ್ ತಂಡ ಆರಂಭ ಕಳಪೆಯಾಗಿತ್ತು. ಮೂರನೇ ಕ್ರಮಾಂಕದಲ್ಲಿ ಬ್ಯಾಟ್ ಮಾಡಿದ ಉನ್‌ಮುಕ್ತ ಚಾಂದ್‌ ಸ್ಥಿರ ಪ್ರದರ್ಶನ ನೀಡಿ ತಂಡಕ್ಕೆ ಆಸರೆಯಾದರು. ಇವರು 4 ಬೌಂಡರಿ, 4 ಸಿಕ್ಸರ್ ಸಹಾಯದಿಂದ 53 ರನ್‌ ಬಾರಿಸಿ ಮಿಂಚಿದರು. ಇದೇ ತಂಡದ ಮ್ಯಾಥ್ಯೂ ಟ್ರಂಪ್ 41 ರನ್‌ ಬಾರಿಸಿದರು. ಉಳಿದ ಬ್ಯಾಟರ್‌ಗಳು ರನ್‌ ಕಲೆ ಹಾಕುವಲ್ಲಿ ವಿಫಲರಾದರು. ಈ ತಂಡದ ನಾಯಕ ಸುನಿಲ್ ನರೈನ್‌ 3 ಬೌಂಡರಿ, 2 ಸಿಕ್ಸರ್‌ ಸಿಡಿಸಿ ಔಟ್ ಆದರು. ಸ್ಯಾನ್‌ ಫ್ರಾನ್ಸಿಸ್ಕೋ ತಂಡದ ಜೇವಿಯರ್ ಬಾರ್ಟ್ಲೆಟ್ ಹಾಗೂ ಹ್ಯಾರೀಸ್ ರೌಫ್‌ ತಲಾ4 ವಿಕೆಟ್ ಪಡೆದರು.