ನಿಯಮ ಉಲ್ಲಂಘನೆ, ರಬಾಡಗೆ ಒಂದು ಪಂದ್ಯದ ನಿಷೇಧ

ಲಂಡನ್, ಜುಲೈ 09 : ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕೌನ್ಸಿಲ್‌ನ (ಐಸಿಸಿ) ನೀತಿ ಸಂಹಿತೆ ಮುರಿದ ಕಾರಣ ದಕ್ಷಿಣ ಆಫ್ರಿಕಾದ ವೇಗಿ ಕಗಿಸೊ ರಬಾಡ ಅವರಿಗೆ ಒಂದು ಪಂದ್ಯದ ನಿಷೇಧ ಹೇರಲಾಗಿದೆ. ಈ ಮೂಲಕ ಕಠಿಣ ನಿಯಮಗಳನ್ನು ಜಾರಿಗೊಳಿಸುವ ಬಗ್ಗೆ ಐಸಿಸಿ ಖಡಕ್ ಸಂದೇಶ ರವಾನಿಸಿದೆ.

ನಿಷೇಧಕ್ಕೊಳಗಾಗಿರುವ ರಬಾಡ ಅವರು ಇಂಗ್ಲೆಂಡ್ ವಿರುದ್ಧದ ಟ್ರೆಂಟ್ ಬ್ರಿಜ್ ನ ಎರಡನೇ ಟೆಸ್ಟ್‌ನಲ್ಲಿ ಆಡುವಂತಿಲ್ಲ. ಇಂಗ್ಲೆಂಡ್‌ ವಿರುದ್ಧ -ಲಾರ್ಡ್ಸ್ ಮೈದಾನದಲ್ಲಿ ನಡೆದಿರುವ ಮೊದಲ ಟೆಸ್ಟ್‌ ಪಂದ್ಯದ ಮೊದಲ ದಿನ ಬೆನ್‌ ಸ್ಟೋಕ್ಸ್‌ ಅವರ ವಿಕೆಟ್‌ ಪಡೆದಾಗ ರಬಾಡ ಅವರು ನಡೆದುಕೊಂಡ ರೀತಿಯನ್ನು ಪರಿಶೀಲಿಸಿದ ಐಸಿಸಿ ಮ್ಯಾಚ್ ರೆಫ್ರಿ ಅವರು ರಬಾಡ ಮೇಲೆ ನಿಷೇಧ ಹೇರಿದ್ದಾರೆ.

ಸ್ಟೋಕ್ಸ್‌ ಅವರು ಔಟಾಗಿ ಪೆವಿಲಿಯನ್‌ ನತ್ತ ಹೊರಟಿದ್ದಾಗ ರಬಾಡ ಅವರು ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದರು. ವಿಕೆಟ್ ನಲ್ಲಿರುವ ಮೈಕಿನಲ್ಲಿ ಧ್ವನಿ ಮುದ್ರಿತವಾಗಿದ್ದು, ಇದರ ಆಧಾರ ಮೇಲೆ ಅಂಪೈರ್‌ ಗಳಾದ ಪಾಲ್‌ ರೀಫಲ್‌ ಮತ್ತು ಎಸ್‌. ರವಿ, ಮೂರನೇ ಅಂಪೈರ್‌ ಸಿಮನ್‌ ಫ್ರೈ ಅವರು ಐಸಿಸಿ ಶಿಸ್ತು ಸಮಿತಿಗೆ ದೂರು ನೀಡಿದ್ದರು.