ಟಾಪ್ 10ನಲ್ಲಿ ಕೊಹ್ಲಿ
ಏಕದಿನದಲ್ಲಿ ಅತ್ಯಧಿಕ ರನ್ ಸಾಧಕರಲ್ಲಿ ಈ ಹಿಂದೆ ವಿರಾಟ್ ಕೊಹ್ಲಿ ಎಂಎಸ್ ಧೋನಿಯ ಬಳಿಕ 13ನೇ ಸ್ಥಾನದಲ್ಲಿದ್ದರು. ಈಗ ಕೊಹ್ಲಿ ಒಟ್ಟು 10430 ರನ್ ಸಾಧನೆಯೊಂದಿಗೆ 10ನೇ ಸ್ಥಾನ ಆವರಿಸಿಕೊಂಡಿದ್ದಾರೆ. ಲಾರಾ ಒಟ್ಟು 10405 ರನ್ನೊಂದಿಗೆ ಈ ಮೊದಲು 10ನೇ ಸ್ಥಾನದಲ್ಲಿದ್ದರು.
ಸಚಿನ್ ನಂಬರ್ ವನ್!
ಏಕದಿನದಲ್ಲಿ 10 ಸಾವಿರಕ್ಕೂ ಅಧಿಕ ರನ್ ಗಳಿಸಿದವರಲ್ಲಿ ಭಾರತದ ಕ್ರಿಕೆಟ್ ದಂತಕತೆ ಸಚಿನ್ ತೆಂಡೂಲ್ಕರ್ (18426 ರನ್) ಮೊದಲ ಸ್ಥಾನದಲ್ಲಿದ್ದಾರೆ. 2. ಕುಮಾರ ಸಂಗಕ್ಕಾರ (ಶ್ರೀಲಂಕಾ-14234 ರನ್), 3. ರಿಕಿ ಪಾಂಟಿಂಗ್ (ಆಸ್ಟ್ರೇಲಿಯಾ-13704 ರನ್), 4. ಸನತ್ ಜಯಸೂರ್ಯಾ (ಶ್ರೀಲಂಕಾ-13430 ರನ್), 5. ಮಹೇಲಾ ಜಯವರ್ಧನೆ (ಶ್ರೀಲಂಕಾ-12,650 ರನ್), 6. ಇಂಝಮಾಮ್ ಉಲ್ ಹಖ್ (ಪಾಕಿಸ್ತಾನ-11,739 ರನ್, 7. ಜಾಕ್ ಕ್ಯಾಲೀಸ್ (ಸೌತ್ ಆಫ್ರಿಕಾ-11,579 ರನ್), 8. ಸೌರವ್ ಗಂಗೂಲಿ (ಭಾರತ-11,363 ರನ್), 9. ರಾಹುಲ್ ದ್ರಾವಿಡ್ (ಭಾರತ-10,889 ರನ್) ಸ್ಥಾನಗಳಲ್ಲಿದ್ದಾರೆ.
ಸರಣಿ ಮುನ್ನಡೆಯಲ್ಲಿ ಭಾರತ
ನ್ಯೂಜಿಲ್ಯಾಂಡ್ನ ನೇಪಿಯರ್ ನಲ್ಲಿರುವ ಮೆಕ್ಲೀನ್ ಪಾರ್ಕ್ ಸ್ಟೇಡಿಯಂನಲ್ಲಿ ಬುಧವಾರ (ಜ.23) ನಡೆದ ನ್ಯೂಜಿಲ್ಯಾಂಡ್-ಭಾರತ ಮೊದಲ ಏಕದಿನ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ 45, ಶಿಖರ್ ಧವನ್ 75 ರನ್, ಕುಲದೀಪ್ ಯಾದವ್ ಮತ್ತು ಮೊಹಮ್ಮದ್ ಶಮಿ ಬೌಲಿಂಗ್ ದಾಳಿಯ ಬೆಂಬಲದೊಂದಿಗೆ ಭಾರತ 8 ವಿಕೆಟ್ ಗೆಲುವನ್ನಾಚರಿಸಿತು. ಇದರೊಂದಿಗೆ ಭಾರತ ಐದು ಪಂದ್ಯಗಳ ಏಕದಿನ ಸರಣಿಯಲ್ಲಿ 1-0ಯ ಮುನ್ನಡೆಯನ್ನೂ ಸಾಧಿಸಿತು.
ಧವನ್ ಕೂಡಾ ದಾಖಲೆ
ನ್ಯೂಜಿಲ್ಯಾಂಡ್-ಭಾರತ ಇದೇ ಪಂದ್ಯದಲ್ಲಿ ಭಾರತದ ಆರಂಭಿಕ ಆಟಗಾರ ಶಿಖರ್ ಧವನ್ ಕೂಡ ಬ್ರಿಯಾನ್ ಲಾರಾ ದಾಖಲೆಯನ್ನು ಸರಿದೂಗಿಸಿಕೊಂಡಿದ್ದರು. 118 ಇನ್ನಿಂಗ್ಸ್ಗಳಲ್ಲಿ 5,000 ರನ್ ಸಾಧನೆ ಮಾಡಿದ್ದ ಧವನ್, ಲಾರಾ ದಾಖಲೆಯನ್ನು ಸರಿದೂಗಿಸಿದ್ದರು. ಆದರೆ ಇದೇ ಸಾಧನೆಗಾಗಿ ಧವನ್ ಅವರು ಭಾರತದ ಸೌರವ್ ಗಂಗೂಲಿ ಮತ್ತು ಸೌತ್ ಆಫ್ರಿಕಾದ ಗ್ರೇಮ್ ಸ್ಮಿತ್ ದಾಖಲೆಯನ್ನು ಮೀರಿಸಿದ್ದರು.