ಲ್ಯಾನ್ಸ್‌ ಕ್ಲುಸ್ನರ್‌ : ದೆಹಲಿ ರಣಜಿ ತಂಡಕ್ಕೆ ಸಲಹೆಗಾರ ಕಮ್ ಕೋಚ್

ನವದೆಹಲಿ, ಸೆಪ್ಟೆಂಬರ್ 04: ದೆಹಲಿ ರಣಜಿ ತಂಡದ ಸಲಹೆಗಾರ ಕಮ್ ಕೋಚ್ ಆಗಿ ದಕ್ಷಿಣ ಆಫ್ರಿಕಾದ ಮಾಜಿ ಆಲ್ ರೌಂಡರ್ ಲ್ಯಾನ್ಸ್‌ ಕ್ಲುಸ್ನರ್‌ ಅವರನ್ನು ನೇಮಿಸಲಾಗಿದೆ. 2018-19ರ ಋತುವಿನಲ್ಲಿ ದೆಹಲಿಯ ಮಾಜಿ ನಾಯಕ ಮಿಥುನ್ ಮನ್ಹಾಸ್ ಕೋಚ್ ಆಗಿದ್ದರೆ, ಲ್ಯಾನ್ಸ್ ಕ್ಲುಸ್ನರ್ ಕನ್ಸಲ್ಟಂಟ್ ಕೋಚ್ ಆಗಿರುತ್ತಾರೆ ಎಂದು ದೆಹಲಿ ಕ್ರಿಕೆಟ್ ಮಂಡಳಿ(ಡಿಸಿಸಿಎ) ಪ್ರಕಟಿಸಿದೆ.

'ಸೆಪ್ಟಂಬರ್​ 19ರಿಂದ ಆರಂಭವಾಗುವ ವಿಜಯ್‌ ಹಜಾರೆ ಹಾಗೂ ದೇವಧರ್ ಟ್ರೋಫಿ ಹಾಗೂ 2019ರಲ್ಲಿ ನಡೆಯುವ ದೇಸಿ ಟ್ವೆಂಟಿ-20 ಕ್ರಿಕೆಟ್‌ ಟೂರ್ನಿಗಾಗಿ ದೆಹಲಿ ರಣಜಿ ತಂಡದ ಸಲಹೆಗಾರರಾಗಿ ಕ್ಲುಸ್ನರ್‌ ಅವರು ಕಾರ್ಯನಿರ್ವಹಿಸಲಿದ್ದಾರೆ' ಎಂದು ದೆಹಲಿ ಜಿಲ್ಲಾ ಕ್ರಿಕೆಟ್‌ ಸಂಸ್ಥೆಯ ಅಧ್ಯಕ್ಷ ರಜತ್‌ ಶರ್ಮಾ ಅವರು ಪಿಟಿಐಗೆ ತಿಳಿಸಿದರು.

46 ವರ್ಷ ವಯಸ್ಸಿನ ಲ್ಯಾನ್ಸ್​ ಕ್ಲುಸ್ನರ್‌ ಅವರು ದಕ್ಷಿಣ ಆಫ್ರಿಕಾದ ಪರ 49 ಟೆಸ್ಟ್‌ ಪಂದ್ಯಗಳನ್ನು ಆಡಿದ್ದು, 1906 ರನ್‌ ಹಾಗೂ 80 ವಿಕೆಟ್‌ಗಳನ್ನು ಗಳಿಸಿದ್ದದರೆ. 171 ಏಕದಿನ ಪಂದ್ಯಗಳಲ್ಲಿ 3576 ರನ್‌ ಹಾಗೂ 192 ವಿಕೆಟ್‌ಗಳನ್ನು ಪಡೆದಿದ್ದಾರೆ.

1999 ರ ವಿಶ್ವಕಪ್​ನಲ್ಲಿ ಅತ್ಯುತ್ತಮ ಆಲ್​ರೌಂಡ್​ ಪ್ರದರ್ಶನ ನೀಡಿ ಸರಣಿ ಶ್ರೇಷ್ಠ ಪ್ರಶಸ್ತಿಗೆ ಪಾತ್ರರಾಗಿದ್ದರು. ವಿಶ್ವಕಪ್ ಸೆಮಿಫೈನಲ್ ಪಂದ್ಯದಲ್ಲಿ ಟೈ ಆದ ಪಂದ್ಯದಲ್ಲಿ ದುರಂತ ನಾಯಕನಾಗಿ ಕ್ಲುಸ್ನರ್ ಕಾಣಿಸಿಕೊಂಡಿದ್ದರು.