ಜುಲೈ 31ರಿಂದ ಲಂಕಾ ಪ್ರೀಮಿಯರ್ ಲೀಗ್ ಆರಂಭ; ಆಗಸ್ಟ್ 21ರಂದು ಫೈನಲ್

ಲಂಕಾ ಪ್ರೀಮಿಯರ್ ಲೀಗ್‌ನ (ಎಲ್‌ಪಿಎಲ್) ಮೂರನೇ ಆವೃತ್ತಿ ಮುಂದಿನ ತಿಂಗಳು ಅಂದರೆ ಜುಲೈ 31ರಂದು ಪ್ರಾರಂಭವಾಗಲಿದೆ ಎಂದು ಶ್ರೀಲಂಕಾ ಕ್ರಿಕೆಟ್ ಮಂಡಳಿ ಶುಕ್ರವಾರ ಖಚಿತಪಡಿಸಿದೆ.

ಕ್ಯಾಂಡಿ ವಾರಿಯರ್ಸ್, ಡಂಬುಲ್ಲಾ ಜೈಂಟ್ಸ್, ಕೊಲಂಬೊ ಸ್ಟಾರ್ಸ್, ಗಾಲೆ ಗ್ಲಾಡಿಯೇಟರ್ಸ್ ಮತ್ತು ಜಾಫ್ನಾ ಕಿಂಗ್ಸ್ ಐದು ತಂಡಗಳನ್ನು ಒಳಗೊಂಡಿರುವ ಲಂಕಾ ಪ್ರೀಮಿಯರ್ ಲೀಗ್‌ 2022 ಆಗಸ್ಟ್ 21ರಂದು ಫೈನಲ್ ಪಂದ್ಯದ ಮೂಲಕ ಮುಕ್ತಾಯಗೊಳ್ಳಲಿದೆ. ಎಲ್‌ಪಿಎಲ್ ಪಂದ್ಯಾವಳಿಯು ಕೊಲಂಬೊ ಮತ್ತು ಹಂಬಂಟೋಟಾದಲ್ಲಿ ನಡೆಯಲಿದೆ ಮತ್ತು ಲಂಕಾ ಪ್ರೀಮಿಯರ್ ಲೀಗ್‌ನಲ್ಲಿ ಒಟ್ಟು 24 ಪಂದ್ಯಗಳು ನಡೆಯಲಿವೆ.

ಲಂಕಾ ಪ್ರೀಮಿಯರ್ ಲೀಗ್ ಅನ್ನು 2018ರಲ್ಲಿ ಶ್ರೀಲಂಕಾ ಕ್ರಿಕೆಟ್ (ಎಸ್‌ಎಲ್‌ಸಿ) ಸ್ಥಾಪಿಸಿತು ಮತ್ತು ಪಂದ್ಯಾವಳಿಯ ಮೊದಲ ಆವೃತ್ತಿಯನ್ನು ಹಲವಾರು ಬಾರಿ ಮುಂದೂಡಲ್ಪಟ್ಟ ನಂತರ 2020ರಲ್ಲಿ ಆಡಿಸಲಾಯಿತು. ಜಾಫ್ನಾ ಕಿಂಗ್ಸ್ (2020ರಲ್ಲಿ ಜಾಫ್ನಾ ಸ್ಟಾಲಿಯನ್ಸ್) ಲೀಗ್‌ನಲ್ಲಿ ಅತ್ಯಂತ ಯಶಸ್ವಿ ತಂಡವಾಗಿದೆ. ಏಕೆಂದರೆ ಅವರು ಪಂದ್ಯಾವಳಿಯ ಮೊದಲ ಎರಡು ಆವೃತ್ತಿಗಳನ್ನು ಫೈನಲ್‌ನಲ್ಲಿ ಗಾಲೆ ಗ್ಲಾಡಿಯೇಟರ್‌ಗಳನ್ನು ಸೋಲಿಸುವ ಮೂಲಕ ಪ್ರಶಸ್ತಿ ಗೆದ್ದಿದ್ದಾರೆ.

"ಜಾಗತಿಕ ಟಿ20 ಲೀಗ್ ಸ್ಪರ್ಧೆಗಳಲ್ಲಿ ತನ್ನ ಪ್ರಯಾಣವನ್ನು ಉತ್ತಮವಾಗಿ ಪ್ರಾರಂಭಿಸಿರುವ ಲಂಕಾ ಪ್ರೀಮಿಯರ್ ಲೀಗ್‌ನ 3ನೇ ಆವೃತ್ತಿಯನ್ನು ಅಸಾಧಾರಣ ಪಂದ್ಯಾವಳಿಯಾಗಿ ಘೋಷಿಸಲು ನಾವು ತುಂಬಾ ಸಂತೋಷಪಡುತ್ತೇವೆ," ಎಂದು ಶ್ರೀಲಂಕಾ ಕ್ರಿಕೆಟ್ ಅಧ್ಯಕ್ಷ ಶಮ್ಮಿ ಸಿಲ್ವಾ ಹೇಳಿದ್ದಾರೆ.

ಆಟಗಾರರ ಡ್ರಾಫ್ಟ್‌ಗಾಗಿ ಅಂತಾರಾಷ್ಟ್ರೀಯ ಆಟಗಾರರ ನೋಂದಣಿ ಶೀಘ್ರದಲ್ಲೇ ಪ್ರಾರಂಭವಾಗಲಿದೆ ಎಂದು ಶ್ರೀಲಂಕಾ ಕ್ರಿಕೆಟ್ ದೃಢಪಡಿಸಿದೆ. ಈ ಬಾರಿಯ ಆವೃತ್ತಿಯಲ್ಲಿ ಒಟ್ಟು 24 ಪಂದ್ಯಗಳು ನಡೆಯಲಿವೆ. ಪಂದ್ಯಾವಳಿಯ ಸಂಪೂರ್ಣ ವೇಳಾಪಟ್ಟಿಯನ್ನು ಪ್ರಕಟಿಸಲಾಗಿಲ್ಲ ಆದರೆ ಪಂದ್ಯಗಳು ಆರಂಭದಲ್ಲಿ ಕೊಲಂಬೊದಲ್ಲಿ ನಡೆಯಲಿದ್ದು, ನಂತರ ಹಂಬಂಟೋಟಾಗೆ ಸ್ಥಳಾಂತರಗೊಳ್ಳಲಿದೆ.