ಭಾರತೀಯರೇಕೆ ಚತುರ ಬ್ಯಾಟ್ಸ್‌ಮನ್‌ಗಳು?!: ಅಥರ್ಟನ್ ಸ್ವಾರಸ್ಯಕರ ವಿವರಣೆ

ಒಳ್ಳೆ ಬ್ಯಾಟ್ಸ್‌ಮನ್ ಆಗಿ ಕಾಣಿಸುತ್ತಾರೆ

'ರೋಹಿತ್ ಶರ್ಮಾ ಅವರ ಆಟ ನಾನು ನೋಡುತ್ತಿರುತ್ತೇನೆ. ನೋಡುತ್ತಿರುವಾಗ ನೀವೆಲ್ಲ ಯಾಕೆ ಟೆಸ್ಟ್‌ ಮಟ್ಟದಲ್ಲಿ ಯಶಸ್ವಿಯಾಗುತ್ತಿಲ್ಲ ಅಂತ ಯೋಚಿಸುತ್ತೇನೆ. ರೋಹಿತ್ ಅವರನ್ನು ನೋಡುವಾಗೆಲ್ಲ ಅವರು ಒಳ್ಳೆಯ ಬ್ಯಾಟ್ಸ್‌ಮನ್ ಆಗಿ ಕಾಣಿಸುತ್ತಾರೆ. ಇದೇ ಕಾರಣಕ್ಕೆ ಅವರು ಹೆಚ್ಚು ಯಶಸ್ವಿ ಆರಂಭಿಕ ಬ್ಯಾಟ್ಸ್‌ಮನ್ ಅನ್ನಿಸಿಕೊಳ್ಳುತ್ತಿದ್ದಾರೆ,' ಎಂದು ಅಥರ್ಟನ್ ಹೇಳಿದ್ದಾರೆ.

ಭಾರತೀಯರು ಸ್ವಾಭಾವಿಕ ಬ್ಯಾಟ್ಸ್‌ಮನ್‌ಗಳು

ಸೋನಿ ಟೆನ್‌ನ ಪಿಟ್‌ ಸ್ಟಾಪ್ ಶೋನಲ್ಲಿ ಮಾತನಾಡಿದ ಅಥರ್ಟನ್, 'ರೋಹಿತ್ ಬ್ಯಾಟಿಂಗ್ ನೋಡುವಾಗ ಒಂದು ವಿಚಾರವನ್ನು ನಾನು ಎಂಜಾಯ್ ಮಾಡುತ್ತೇನೆ. ಅದು ಸಾಮಾನ್ಯ ಅಂಶ ಕೂಡ, ಅದೇನೆಂದರೆ ಭಾರತೀಯ ಬ್ಯಾಟ್ಸ್‌ಮನ್‌ಗಳು ತುಂಬಾ ಕೋಚಿಂಗ್‌ನ ಅಗತ್ಯವಿಲ್ಲದ, ಒತ್ತಾಯಪೂರ್ವಕವಾಗಿ ಆಡುವ ಬ್ಯಾಟ್ಸ್‌ಮನ್‌ಗಳಾಗಿ ಕಾಣದೆ ಸ್ವಾಭಾವಿಕ ಬ್ಯಾಟ್ಸ್‌ಮನ್‌ಗಳಾಗಿ ಕಾಣಿಸುತ್ತಾರೆ,' ಎಂದರು.

ರಾಹುಲ್ ದ್ರಾವಿಡ್ ಜೊತೆ ಪ್ರಶ್ನೆ

ಭಾರತ 'ಎ' ತಂಡದ ಮತ್ತು ಅಂಡರ್ 19 ತಂಡದ ಕೋಚ್ ಆಗಿದ್ದ ರಾಹುಲ್ ದ್ರಾವಿಡ್ ಜೊತೆಗಿನ ಸಂವಾದನ್ನೂ ಅಥರ್ಟನ್ ನೆನಪಿಸಿಕೊಂಡರು. 'ಕೆಲ ವರ್ಷಗಳ ಹಿಂದೆ ನಾನೊಮ್ಮೆ ರಾಹುಲ್ ದ್ರಾವಿಡ್ ಜೊತೆ ಮಾತನಾಡುತ್ತಿದ್ದೆ. ಇಷ್ಟು ಸಣ್ಣ ವಯಸ್ಸಿನಲ್ಲೂ ಭಾರತೀಯ ಬ್ಯಾಟ್ಸ್‌ಮನ್‌ಗಳು ಇಂಗ್ಲೆಂಡ್ ಆಟಗಾರರಿಗಿಂತ ಹೆಚ್ಚು ಸ್ವಾಭಾವಿಕರಾಗಿ ಕಾಣುತ್ತಾರಲ್ಲ ಯಾಕೆ ಎಂದು ದ್ರಾವಿಡ್ ಜೊತೆ ಆವತ್ತು ಪ್ರಶ್ನಿಸಿದ್ದೆ,' ಎಂದು ಅಥರ್ಟನ್ ಗತಕಾಲ ಸ್ಮರಿಸಿಕೊಂಡರು.

ರಾಹುಲ್ ದ್ರಾವಿಡ್‌ರಿಂದ ಅರ್ಥಪೂರ್ಣ ಉತ್ತರ

'ನನ್ನ ಪ್ರಶ್ನೆಗೆ ಉತ್ತರಿಸಿದ ದ್ರಾವಿಡ್, ಭಾರತೀಯ ಆಟಗಾರರು ವರ್ಷದುದ್ದಕ್ಕೂ ಆಡುತ್ತಿರುತ್ತಾರೆ. ಆದರೆ ಇಂಗ್ಲೆಂಡ್‌ ಆಟಗಾರರು ಅಲ್ಲಿನ ಹವಾಮಾನದ ಕಾರಣ, 6 ತಿಂಗಳ ಕಾಲ ಇಂಡೋರ್‌ನಲ್ಲಿ ಬೌಲಿಂಗ್ ಮೆಷೀನ್‌ ಜೊತೆ ಆಡುತ್ತಾರೆ. ಬಹುಶಃ ಇದು ಇಂಗ್ಲೆಂಡ್ ಆಟಗಾರರಿಗೆ ಒತ್ತಾಯಪೂರ್ವಕ ಆಟ ಅಥವಾ ಅತಿಯಾಗಿ ಕೋಚಿಂಗ್ ಮಾಡಿದ ರೀತಿಯ ಆಟಕ್ಕೆ ಕಾರಣವಾಗಿರಬಹುದು ಎಂದರು,' ಎಂದು ಅಥರ್ಟನ್ ದ್ರಾವಿಡ್ ಕೊಟ್ಟಿದ್ದ ಅರ್ಥಪೂರ್ಣ ಉತ್ತರವನ್ನು ನೆನಪಿಸಿಕೊಂಡರು.