MLC 2023: ಟೆಕ್ಸಾಸ್ ಸೂಪರ್ ಕಿಂಗ್ಸ್ ನಾಯಕನಾಗಿ ಆರ್‌ಸಿಬಿಯ ಈ ಆಟಗಾರ ನೇಮಕ

ಮುಂಬರುವ ಮೇಜರ್ ಕ್ರಿಕೆಟ್ ಲೀಗ್ (ಎಂಎಲ್‌ಸಿ) 2023ರ ಉದ್ಘಾಟನಾ ಆವೃತ್ತಿಯಲ್ಲಿ ಟೆಕ್ಸಾಸ್ ಸೂಪರ್ ಕಿಂಗ್ಸ್ ತಂಡದ ನಾಯಕನಾಗಿ ಫಾಫ್ ಡು ಪ್ಲೆಸಿಸ್ ಮುನ್ನಡೆಸಲಿದ್ದಾರೆ ಎಂದು ಫ್ರಾಂಚೈಸಿ ಪ್ರಕಟಿಸಿದೆ.

ಟೆಕ್ಸಾಸ್ ಸೂಪರ್ ಕಿಂಗ್ಸ್ (ಟಿಎಸ್‌ಕೆ) ಫ್ರಾಂಚೈಸ್ ಈ ಕುರಿತು ಪ್ರಕಟಣೆ ಮಾಡಿದ್ದು, ಮೇಜರ್ ಲೀಗ್ ಕ್ರಿಕೆಟ್ (ಎಂಎಲ್‌ಸಿ) 2023ರ ಚೊಚ್ಚಲ ಆವೃತ್ತಿಗೆ ಐಪಿಎಲ್‌ನಲ್ಲಿ ಆರ್‌ಸಿಬಿ ತಂಡದ ನಾಯಕನಾಗಿರುವ ಫಾಫ್ ಡು ಪ್ಲೆಸಿಸ್ ನಾಯಕನಾಗಿರುತ್ತಾರೆ ಎಂದು ಕೋಚ್ ಸ್ಟೀಫನ್ ಫ್ಲೇಮಿಂಗ್ ಬಹಿರಂಗಪಡಿಸಿದರು.

ಗಮನಾರ್ಹವಾಗಿ, ಎಂಎಲ್‌ಸಿ 2023ರಲ್ಲಿ ಟೆಕ್ಸಾಸ್ ಸೂಪರ್ ಕಿಂಗ್ಸ್ ತಂಡ ಚೆನ್ನೈ ಸೂಪರ್ ಕಿಂಗ್ಸ್ ಫ್ರಾಂಚೈಸಿಯದ್ದಾಗಿದೆ. ಅಲ್ಲದೆ, ಫಾಫ್ ಡು ಪ್ಲೆಸಿಸ್ ಈ ಹಿಂದೆ ಸಿಎಸ್‌ಕೆ ತಂಡದ ಪರ ಆಡಿದ್ದಾರೆ.

ಸ್ಟೀಫನ್ ಫ್ಲೆಮಿಂಗ್ ಮುಖ್ಯ ಕೋಚ್ ಆಗಿರುವ ಟಿಎಸ್‌ಕೆ ತಂಡದ ನಾಯಕನಾಗಿ ದಕ್ಷಿಣ ಆಫ್ರಿಕಾ ಮಾಜಿ ಕ್ರಿಕೆಟಿಗನ ನೇಮಕವನ್ನು ಫ್ರಾಂಚೈಸಿ ಟ್ವೀಟ್ ಮಾಡಿದೆ. ನ್ಯೂಜಿಲೆಂಡ್ ಮಾಜಿ ನಾಯಕ ಸ್ಟೀಫನ್ ಫ್ಲೆಮಿಂಗ್ ಐಪಿಎಲ್ ಫ್ರಾಂಚೈಸಿ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಎಸ್‌ಎ 20 ಮುಖ್ಯ ಕೋಚ್ ಸಹ ಆಗಿದ್ದಾರೆ.

ಡೆವೊನ್ ಕಾನ್ವೇ, ಮಿಚೆಲ್ ಸ್ಯಾಂಟ್ನರ್, ಅಂಬಟಿ ರಾಯುಡು ಮತ್ತು ಡೇವಿಡ್ ಮಿಲ್ಲರ್ ಅವರಂತಹ ಅಂತಾರಾಷ್ಟ್ರೀಯ ಆಟಗಾರರು ಟೆಕ್ಸಾಸ್ ಸೂಪರ್ ಕಿಂಗ್ಸ್ ತಂಡದ ಭಾಗವಾಗಿದ್ದಾರೆ. ಇದೀಗ ಫಾಫ್ ಡು ಪ್ಲೆಸಿಸ್ ಅವರ ನಾಯಕನಾಗಿ ತಂಡಕ್ಕೆ ಸೇರಿದ್ದಾರೆ.

ಐಪಿಎಲ್ 2023ರ ಪ್ರಶಸ್ತಿ ಗೆದ್ದ ಎಂಎಸ್ ಧೋನಿ ನಾಯಕತ್ವದ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅಂಬಟಿ ರಾಯುಡು, ಮಿಚೆಲ್ ಸ್ಯಾಂಟ್ನರ್ ಮತ್ತು ಡೆವೊನ್ ಕಾನ್ವೇ ಮತ್ತೆ ಒಂದೇ ತಂಡದಲ್ಲಿ ಆಡಲಿದ್ದಾರೆ.

ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಬೌಲಿಂಗ್ ಕೋಚ್ ಆಗಿರುವ ವೆಸ್ಟ್ ಇಂಡೀಸ್‌ನ ಡ್ವೇನ್ ಬ್ರಾವೋ ಅವರನ್ನು ಎಂಎಲ್‌ಸಿಯಲ್ಲಿ ಆಟಗಾರನಾಗಿ ಒಳಗೊಂಡಿರುತ್ತದೆ. ಹೀಗಾಗಿ ಕೋಚಿಂಗ್ ವಿಭಾಗದಲ್ಲಿ ಸ್ಟೀಫನ್ ಫ್ಲೆಮಿಂಗ್‌ಗೆ ಎರಿಕ್ ಸಿಮ್ಮನ್ಸ್ ಮತ್ತು ಅಲ್ಬಿ ಮೊರ್ಕೆಲ್ ಸಹಾಯಕ ಕೋಚ್ ಆಗಿರಲಿದ್ದಾರೆ.

ಇನ್ನು ಎಂಎಲ್‌ಸಿಯಲ್ಲಿ ಪ್ರತಿ ತಂಡಕ್ಕೆ ಗರಿಷ್ಠ 19 ಆಟಗಾರರ ತಂಡವನ್ನು ಅನುಮತಿಸಲಾಗಿದ್ದು, ಅವರಲ್ಲಿ ಒಂಬತ್ತು ಮಂದಿ ವಿದೇಶಿ ಆಟಗಾರರಾಗಲು ಅರ್ಹರಾಗಿರುತ್ತಾರೆ.

ಆಡುವ 11ರ ಬಳಗದಲ್ಲಿ ಗರಿಷ್ಠ ಆರು ಅಂತಾರಾಷ್ಟ್ರೀಯ ಆಟಗಾರರನ್ನು ಸೇರಿಸಿಕೊಳ್ಳಬಹುದು, ಆದರೆ ಕನಿಷ್ಠ ಐದು ದೇಶೀಯ ಆಟಗಾರರು ಯಾವಾಗಲೂ ತಂಡದ ಭಾಗವಾಗಿರಬೇಕು. ಸಮತೋಲನ ಮತ್ತು ಸ್ಥಳೀಯ ಪ್ರಾತಿನಿಧ್ಯವನ್ನು ಖಚಿತಪಡಿಸಿಕೊಳ್ಳಲು ಪ್ರತಿ ತಂಡ ಕನಿಷ್ಠ ಹತ್ತು ದೇಶೀಯ ಆಟಗಾರರನ್ನು ಹೊಂದಿರಬೇಕು.

ಆರು ತಂಡಗಳ ಪಂದ್ಯಾವಳಿಯಾಗಿರುವ 2023ರ ಮೇಜರ್ ಕ್ರಿಕೆಟ್ ಲೀಗ್ ಜುಲೈ 14ರಿಂದ 31ರವರೆಗೆ ಟೆಕ್ಸಾಸ್ ಮತ್ತು ಡಲ್ಲಾಸ್‌ನಲ್ಲಿ ನಡೆಸಲು ಯೋಜಿಸಲಾಗಿದೆ.

ಟೆಕ್ಸಾಸ್ ಸೂಪರ್ ಕಿಂಗ್ಸ್ ಜೊತೆಗೆ ಲಾಸ್ ಏಂಜಲೀಸ್ ನೈಟ್ ರೈಡರ್ಸ್, MI ನ್ಯೂಯಾರ್ಕ್, ವಾಷಿಂಗ್ಟನ್ ಫ್ರೀಡಮ್, ಸ್ಯಾನ್ ಫ್ರಾನ್ಸಿಸ್ಕೋ ಯುನಿಕಾರ್ನ್ಸ್ ಮತ್ತು ಸಿಯಾಟಲ್ ಓರ್ಕಾಸ್ ಇತರ ಭಾಗವಹಿಸುವ ತಂಡಗಳಾಗಿವೆ.