ಅನಂತ್ ಅಂಬಾನಿ-ರಾಧಿಕಾ ಮರ್ಚೆಂಟ್ ದಂಪತಿಗೆ ಹೃದಯಸ್ಪರ್ಶಿ ಸಂದೇಶ ಬರೆದ ಎಂಎಸ್ ಧೋನಿ

ಭಾರತದ ಲೆಜೆಂಡರಿ ಕ್ರಿಕೆಟಿಗ ಎಂಎಸ್ ಧೋನಿ ಅವರು ಮುಂಬೈನಲ್ಲಿ ನಡೆದ ಅದ್ಧೂರಿ ವಿವಾಹ ಸಮಾರಂಭದಲ್ಲಿ ಭಾಗವಹಿಸಿದ ನಂತರ, ನವವಿವಾಹಿತ ದಂಪತಿಯಾದ ಅನಂತ್ ಅಂಬಾನಿ ಮತ್ತು ರಾಧಿಕಾ ಮರ್ಚೆಂಟ್ ಅವರಿಗೆ ಹೃತ್ಪೂರ್ವಕ ಸಂದೇಶ ಬರೆದಿದ್ದಾರೆ.

ಗಮನಾರ್ಹವಾಗಿ, ಮಾಜಿ ಕ್ರಿಕೆಟಿಗ ಎಂಎಸ್ ಧೋನಿ ತಮ್ಮ ಪತ್ನಿ ಸಾಕ್ಷಿ ಮತ್ತು ಮಗಳು ಝೀವಾ ಅವರೊಂದಿಗೆ ಅಂಬಾನಿ ಕುಟುಂಬದ ವಿವಾಹ ಸಂಭ್ರಮಾಚರಣೆಯ ಭಾಗವಾಗಿದ್ದರು.

ಒಂದು ವಾರದ ಅವಧಿಯ ವಿವಾಹ ಸಂಭ್ರಮಾಚರಣೆಯಲ್ಲಿ ಬಾಲಿವುಡ್, ರಾಜಕೀಯ ಮತ್ತು ಕ್ರೀಡಾ ಪ್ರಪಂಚದ ಹಲವು ತಾರೆಯರು ಭಾಗವಹಿಸಿದ್ದರು. ಕುಸ್ತಿಪಟು ಜಾನ್ ಸೆನಾ, ಗಾಯಕ ಜಸ್ಟಿನ್ ಬೈಬರ್, ಅಡೆಲೆ ಮುಂತಾದ ವಿದೇಶಿ ಸೆಲೆಬ್ರಿಟಿಗಳು ಸಂಭ್ರಮಾಚರಣೆಯ ದೊಡ್ಡ ಅತಿಥಿ ಪಟ್ಟಿಯ ಭಾಗವಾಗಿದ್ದರು.

ವಿಶೇಷ ಪೋಸ್ಟ್‌ನಲ್ಲಿ ನವವಿವಾಹಿತ ಅನಂತ್ ಅಂಬಾನಿ ಮತ್ತು ರಾಧಿಕಾ ಮರ್ಚೆಂಟ್ ಅವರಿಗೆ ತಮ್ಮ ಶುಭಾಶಯಗಳನ್ನು ವ್ಯಕ್ತಪಡಿಸಿದ ಎಂಎಸ್ ಧೋನಿ, ಅವರ ಜೀವನವು ಸಂತೋಷ, ನಗು ಮತ್ತು ಸಾಹಸದಿಂದ ತುಂಬಿರಲಿ ಎಂದು ಹಾರೈಸಿದ್ದಾರೆ.

ಎಂಎಸ್ ಧೋನಿ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಫೋಟೋ ಪೋಸ್ಟ್ ಮಾಡಿದರು. ಅಲ್ಲಿ ರಾಧಿಕಾ ಮರ್ಚೆಂಟ್ ಅವರು ಮಾಜಿ ಭಾರತ ನಾಯಕನನ್ನು ತಬ್ಬಿಕೊಂಡಿರುವುದನ್ನು ಕಾಣಬಹುದು.

"ರಾಧಿಕಾ, ನಿನ್ನ ತೇಜಸ್ವಿ ನಗು ಎಂದಿಗೂ ಮರೆಯಾಗದಿರಲಿ! ಅನಂತ್, ದಯವಿಟ್ಟು ನಿಮ್ಮ ಸುತ್ತಲಿನ ಎಲ್ಲರಿಗೂ ನೀವು ತೋರಿಸುವ ಅದೇ ಪ್ರೀತಿ ಮತ್ತು ದಯೆಯಿಂದ ರಾಧಿಕಾ ಅವರನ್ನು ಪ್ರೀತಿಸುವುದನ್ನು ಮತ್ತು ಕಾಳಜಿ ವಹಿಸುವುದನ್ನು ಮುಂದುವರಿಸಿ".

"ನಿಮ್ಮ ವೈವಾಹಿಕ ಜೀವನವು ಸಂತೋಷ, ನಗು ಮತ್ತು ಸಾಹಸದಿಂದ ತುಂಬಿರಲಿ. ಅಭಿನಂದನೆಗಳು ಮತ್ತು ಶೀಘ್ರದಲ್ಲೇ ನಿಮ್ಮನ್ನು ನೋಡುತ್ತೇನೆ! ವೀರೇನ್ ಅಂಕಲ್‌ಗಾಗಿ ಈ ಹಾಡು," ಎಂದು ಎಂಎಸ್ ಧೋನಿ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.

ಎಂಎಸ್ ಧೋನಿ ಪತ್ನಿ ಸಾಕ್ಷಿ ಕೂಡ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯ ವಿಶೇಷ ಪೋಸ್ಟ್‌ನಲ್ಲಿ ಅನಂತ್ ಮತ್ತು ರಾಧಿಕಾಗೆ ಶುಭ ಹಾರೈಸಿದ್ದಾರೆ.

"ರಾಧಿಕಾ ಮತ್ತು ಅನಂತ್, ನಿಮ್ಮ ವಿವಾಹಕ್ಕೆ ಶುಭ ಹಾರೈಕೆಗಳು! ರಾಧಿಕಾ ಅವರ ನಗು ಮತ್ತು ಅನಂತ್ ಅವರ ಹೃದಯದಂತೆಯೇ ನಿಮ್ಮ ಪ್ರೀತಿಯು ಪ್ರಕಾಶಮಾನವಾಗಿ ಹೊಳೆಯುತ್ತಿರಲಿ. ನೀವು ಜೀವಿತಾವಧಿಯಲ್ಲಿ ಸಂತೋಷ, ನಗು ಮತ್ತು ಸಾಹಸವನ್ನು ಒಟ್ಟಿಗೆ ಹೊಂದಿರಲಿ," ಎಂದು ಸಾಕ್ಷಿ ಬರೆದಿದ್ದಾರೆ.

ಅಂಬಾನಿ ವಿವಾಹ ಸಮಾರಂಭದಲ್ಲಿ ಹಲವು ಕ್ರಿಕೆಟಿಗರು ಭಾಗಿ

ಇದೇ ವೇಳೆ, ಎಂಎಸ್ ಧೋನಿ ಹೊರತಾಗಿ, ಭಾರತ ತಂಡದ ಕ್ರಿಕೆಟಿಗರಾದ ಹಾರ್ದಿಕ್ ಪಾಂಡ್ಯ, ಸೂರ್ಯಕುಮಾರ್ ಯಾದವ್, ಜಸ್ಪ್ರೀತ್ ಬುಮ್ರಾ, ಯುಜ್ವೇಂದ್ರ ಚಹಾಲ್, ಶ್ರೇಯಸ್ ಅಯ್ಯರ್ ಕೂಡ ಸಂಭ್ರಮಾಚರಣೆಯ ಭಾಗವಾಗಿದ್ದರು.

ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ಶನಿವಾರ, ಜುಲೈ 13ರಂದು ಅನಂತ್ ಮತ್ತು ರಾಧಿಕಾ ದಂಪತಿಯನ್ನು ಆಶೀರ್ವದಿಸಲು ತಮ್ಮ ಉಪಸ್ಥಿತಿಯೊಂದಿಗೆ ಕಾರ್ಯಕ್ರಮವನ್ನು ಅಲಂಕರಿಸಿದರು. ಅಲ್ಲದೆ, ಮುಂಬರುವ ದಿನಗಳಲ್ಲಿ ಅಂಬಾನಿ ಕುಟುಂಬಕ್ಕೆ ಸಂಭ್ರಮಾಚರಣೆಗಳು ಮುಂದುವರಿಯುವ ಸಾಧ್ಯತೆಯಿದೆ.