ವಿಶ್ವಕಪ್‌ಗೆ 18 ಆಟಗಾರರ ಶಾರ್ಟ್‌ಲಿಸ್ಟ್ ಮಾಡಿದ್ದೇವೆ: ಎಂಎಸ್‌ಕೆ ಪ್ರಸಾದ್

ನವದೆಹಲಿ, ಫೆಬ್ರವರಿ 16: ವಿಶ್ವಕಪ್‌ ಕ್ರಿಕೆಟ್‌ಗೆ ಯೋಜನೆಗಳನ್ನು ಹಾಕಿಕೊಳ್ಳುತ್ತಿದ್ದೇವೆ. ತಂಡಕ್ಕೆ ಅರ್ಹರೆನಿಸುವ 18 ಆಟಗಾರರ ಶಾರ್ಟ್ ಲಿಸ್ಟ್ ನಮ್ಮ ಬಳಿಕ ಇದೆ ಎಂದು ಬಿಸಿಸಿಐ ಆಯ್ಕೆ ಸಮಿತಿಯ ಅಧ್ಯಕ್ಷ ಎಂಎಸ್‌ಕೆ ಪ್ರಸಾದ್ ಹೇಳಿದ್ದಾರೆ. ಇಂಡಿಯನ್ ಪ್ರೀಮಿಯರ್ ಲೀಗ್‌ (ಐಪಿಎಲ್) ವೇಳೆ ಕಾರ್ಯಭಾರ ನಿರ್ವಹಣೆಯ ಬಗ್ಗೆ ಮಾತನಾಡುತ್ತ ಅವರು ಈ ವಿಚಾರ ತಿಳಿಸಿದರು.

ಇಂಗ್ಲೆಂಡ್ ಮತ್ತು ವೇಲ್ಸ್‌ನಲ್ಲಿ ಮೇ 30ರಿಂದ ನಡೆಯುವ 2019ರ ವಿಶ್ವಕಪ್ ವೇಳೆ ಟೀಮ್ ಇಂಡಿಯಾ ಉಲ್ಲಾಸಿತವಾಗಿ ಇರೋದು ಮುಖ್ಯ. ಹೀಗಾಗಿ ಮಾರ್ಚ್ 23ರಿಂದ ಆರಂಭಗೊಳ್ಳುವ ಐಪಿಎಲ್ ವೇಳೆ ಕಾರ್ಯಭಾರದ ನಿರ್ವಹಣೆಗೆ ಫ್ರಾಂಚೈಸಿಗಳು ಒತ್ತು ನೀಡಬೇಕೆಂದು ಅವರು ವಿವರಿಸಿದರು.

'ವಿಶ್ವಕಪ್‌ಗೆ ಸಂಬಂಧಿಸಿ ನಾವು 18 ಆಟಗಾರರ ಶಾರ್ಟ್ ಲಿಸ್ಟ್ ಮಾಡಿದ್ದೇವೆ. ವಿಶ್ವಕಪ್‌ಗೆ ಅಂತಿಮ ತಂಡ ಆರಿಸುವ ಮುನ್ನ ಅದನ್ನು ಇನ್ನೊಮ್ಮೆ ಪರಿಶೀಲಿಸಲಿದ್ದೇವೆ. ಆದ್ದರಿಂದ ಆಟಗಾರರ ಮೇಲಿನ ಕಾರ್ಯಭಾರ ನಿರ್ವಹಣೆ ಗಮನ ಹರಿಸುವುದು ಅಗತ್ಯ' ಎಂದು ಎಂಎಸ್‌ಕೆ ಹೇಳಿದರು.

ಫೆಬ್ರವರಿ 24ರಿಂದ ಆರಂಭಗೊಳ್ಳುವ ಆಸ್ಟ್ರೇಲಿಯಾ vs ಭಾರತ ಸರಣಿಗೆ ಸಂಬಂಧಿಸಿ ತಂಡಗಳನ್ನು ಪ್ರಕಟಿಸಿದ ಬಳಿಕ ಮಾತನಾಡಿದ ಪ್ರಸಾದ್, 'ವಿಶ್ವಕಪ್ ವೇಳೆ ಕೆಲಸ ಹೊರೆ ನಿರ್ವಹಿಸಲು ಏನೆಲ್ಲ ಮಾಡಬಹುದು ಎನ್ನುವ ಬಗ್ಗೆ ಇನ್ನಷ್ಟು ಚರ್ಚೆಗಳಾಗಬೇಕಿವೆ. ಅನಂತರ ಅದನ್ನು ಕಾರ್ಯರೂಪಕ್ಕೆ ತರಬೇಕಿದೆ' ಎಂದರು.