WPL 2025: ಗುಜರಾತ್‌ ಮಣಿಸಿದ MI, ಫೈನಲ್‌ನಲ್ಲಿ ಮುಂಬೈ, ಡೆಲ್ಲಿ ಫೈಟ್‌

ಮಹಿಳಾ ಪ್ರೀಮಿಯರ್‍‌ ಲೀಗ್‌ನ ಎಲಿಮಿನೇಟರ್‍‌ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್‌ ತಂಡ 47 ರನ್‌ಗಳಿಂದ ಗುಜರಾತ್‌ ಜೈಂಟ್ಸ್ ತಂಡವನ್ನು ಮಣಿಸಿ, ಎರಡನೇ ಬಾರಿಗೆ ಪ್ರಶಸ್ತಿ ಸುತ್ತು ಪ್ರವೇಶಿಸಿದೆ. ಮಹತ್ವದ ಪಂದ್ಯದಲ್ಲಿ ಮುಂಬೈ ಪರ ಅನುಭವಿ ಆಟಗಾರ್ತಿ ನ್ಯಾಟ್‌ ಸ್ಕಿವರ್ ಬ್ರಂಟ್‌ ಹಾಗೂ ಹ್ಯಾಲಿ ಮ್ಯಾಥ್ಯೂಸ್‌ ಭರ್ಜರಿ ಆಲ್‌ರೌಂಡರ್‌ ಆಟದ ಪ್ರದರ್ಶನ ನೀಡಿ ತಂಡದ ಗೆಲುವಿನಲ್ಲಿ ಮಿಂಚಿದರು. ಮುಂಬೈ ಪ್ರಶಸ್ತಿ ಸುತ್ತಿನ ಕಾದಾಟದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಸವಾಲು ಎದುರಿಸಲಿದೆ.

ಗುರುವಾರ ನಡೆದ ಪಂದ್ಯದಲ್ಲಿ ಟಾಸ್‌ ಸೋತರೂ ಮೊದಲು ಬ್ಯಾಟ್ ಮಾಡಿದ ಮುಂಬೈ ಇಂಡಿಯನ್ಸ್ 20 ಓವರ್‌ಗಳಲ್ಲಿ 4 ವಿಕೆಟ್‌ ನಷ್ಟಕ್ಕೆ 213 ರನ್‌ ಸೇರಿಸಿತು. ಇದಕ್ಕುತ್ತರವಾಗಿ ಬ್ಯಾಟ್ ಮಾಡಿದ ಗುಜರಾತ್‌ ಜೈಂಟ್ಸ್ ತಂಡ 19.2 ಓವರ್‌ಗಳಲ್ಲಿ 166 ರನ್‌ಗಳಿಗೆ ಸರ್ವಪತನ ಕಂಡಿತು.

ಮೊದಲು ಬ್ಯಾಟ್ ಮಾಡಿದ ಮುಂಬೈ ತಂಡದ ಆರಂಭ ಸಾಧಾರಣವಾಗಿತ್ತು. ಯಾಸ್ತಿಕಾ ಭಾಟಿಯಾ ಹಾಗೂ ಹ್ಯಾಲಿ ಮ್ಯಾಥ್ಯೂಸ್‌ ಜೋಡಿ ಮೊದಲ ವಿಕೆಟ್‌ಗೆ 26 ರನ್‌ಗಳ ಜೊತೆಯಾಟದ ಕಾಣಿಕೆ ನೀಡಿದರು. ಎರಡನೇ ವಿಕೆಟ್‌ಗೆ ಅನುಭವಿ ಆಟಗಾರ್ತಿಯರಾದ ಹ್ಯಾಲಿ ಮ್ಯಾಥ್ಯೂಸ್‌ ಹಾಗೂ ನ್ಯಾಟ್‌ ಸ್ಕಿವರ್ ಬ್ರಂಟ್ ಜೋಡಿ ಸೊಗಸಾದ ಬ್ಯಾಟಿಂಗ್ ನಡೆಸಿ ತಂಡಕ್ಕೆ ಆಧಾರವಾಯಿತು. ಈ ಜೋಡಿಯನ್ನು ಕಟ್ಟಿ ಹಾಕಲು ಗುಜರಾತ್ ಮಾಡಿಕೊಂಡ ಪ್ಲ್ಯಾನ್ ಎಲ್ಲ ಠುಸ್ ಆಯಿತು. ಈ ಜೋಡಿ 71 ಎಸೆತಗಳಲ್ಲಿ 133 ರನ್‌ ಸೇರಿಸಿ ಔಟ್ ಆಯಿತು. ಹ್ಯಾಲಿ ಮ್ಯಾಥ್ಯೂಸ್‌ 10 ಬೌಂಡರಿ, 3 ಸಿಕ್ಸರ್ ಸಹಾಯದಿಂದ 77 ರನ್‌ ಸೇರಿಸಿ ಔಟ್ ಆಯಿತು.

ನ್ಯಾಟ್‌ ಸ್ಕೀವರ್ ಬ್ರಂಟ್‌ ಸಹ ಅಮೋಘ ಬ್ಯಾಟಿಂಗ್ ನಡೆಸಿ ತಂಡದ ಜಯದಲ್ಲಿ ಮಿಂಚಿದರು. ಇವರು 41 ಎಸೆತಗಳಲ್ಲಿ 10 ಬೌಂಡರಿ, 2 ಸಿಕ್ಸರ್ ಸಹಾಯದಿಂದ 77 ರನ್‌ ಸೇರಿಸಿ ಇಲ್ಲದ ಹೊಡೆತಕ್ಕೆ ಮುಂದಾಗಿ ಪೆವಿಲಿಯನ್ ಸೇರಿದರು. ನಾಯಕಿ ಹರ್ಮನ್ ಪ್ರೀತ್ ಕೌರ್ 12 ಎಸೆತಗಳಲ್ಲಿ 36 ರನ್‌ ಸಿಡಿಸಿದರು. ಇದರಲ್ಲಿ 2 ಬೌಂಡರಿ, 4 ಸಿಕ್ಸರ್‌ ಸೇರಿವೆ.

ಗುಜರಾತ್‌ ಜೈಂಟ್ಸ್ ಪರ ಡೇನಿಯಲ್ ಗಿಬ್ಸನ್ 2, ಕಾಶ್ವಿ ಗೌತಮ್‌ 1 ವಿಕೆಟ್ ಪಡೆದರು.

ಕಳಪೆ ಆರಂಭ

ಸವಾಲಿನ ಮೊತ್ತವನ್ನು ಹಿಂಬಾಲಿಸಿದ ಗುಜರಾತ್ ಜೈಂಟ್ಸ್ ತಂಡದ ಆರಂಭ ಕಳಪೆಯಾಗಿತ್ತು. ಬೆತ್ ಮೂನಿ (6), ಹರ್ಲಿನ್‌ ಡಿಯೋಲ್‌ (8), ಆಶ್ಲೀ ಗಾರ್ಡ್ನರ್ (8) ಆರಂಭದಲ್ಲಿ ದೊಡ್ಡ ಹೊಡೆತಕ್ಕೆ ಮುಂದಾಗಿ ಔಟ್ ಆದರು. ಗುಜರಾತ್ ಪರ ಫೋಬೆ ಲಿಚ್‌ಫೀಲ್ಡ್ (31), ಡೇನಿಯಲ್‌ ಗಿಬ್ಸನ್‌ (34), ಭಾರ್ತಿ ಫುಲ್ಮಾಲಿ (30) ರನ್‌ ಬಾರಿಸಿ ಸೋಲಿನ ಅಂತರವನ್ನು ಕಡಿಮೆ ಮಾಡಿದರು.

ಅಮೇಲಿಯಾ ಕೆರ್ 2, ಹ್ಯಾಲಿ ಮ್ಯಾಥ್ಯೂಸ್ 3, ನ್ಯಾಟ್‌ ಸ್ಕಿವರ್ ಬ್ರಂಟ್‌ ಹಾಗೂ ಶಬ್ನಮಿ ಇಸ್ಲಾಯಿಲ್ ತಲಾ 1 ವಿಕೆಟ್ ಪಡೆದರು.