ಟಿ20 ವಿಶ್ವಕಪ್ ಮುಂದೂಡಿಕೆ: ಫುಡ್ ಡೆಲಿವರಿ ಬಾಯ್ ಆಗಿದ್ದಾರೆ ಮೀಕೆರೆನ್

ಹೆಚ್ಚುವರಿ 6 ರಾಷ್ಟ್ರಗಳು

ಈ ವರ್ಷ ನಡೆಯಬೇಕಿದ್ದ ಟಿ20 ವಿಶ್ವಕಪ್‌ನಲ್ಲಿ ಟಾಪ್ 10 ರಾಷ್ಟ್ರಗಳಲ್ಲದೆ ನೆದರ್‌ಲ್ಯಾಂಡ್ಸ್‌, ಪಪುವಾ ನ್ಯೂ ಗಿನಿಯಾ, ಐರ್ಲೆಂಡ್, ಸ್ಕಾಟ್ಲೆಂಡ್, ನಮೀಬಿಯಾ ಮತ್ತು ಓಮನ್ ದೇಶ ಕೂಡ ಸ್ಪರ್ಧಿಸುವುದರಲ್ಲಿತ್ತು. ಯಾಕೆಂದರೆ ಟಿ20 ವಿಶ್ವಕಪ್ 2020ಕ್ಕೆ ಈ ದೇಶಗಳು ಅರ್ಹತೆ ಗಿಟ್ಟಿಸಿಕೊಂಡಿದ್ದವು.

ಕನಸು ಮಣ್ಣುಪಾಲು

ನೆದರ್‌ಲ್ಯಾಂಡ್ಸ್‌, ಪಪುವಾ ನ್ಯೂ ಗಿನಿಯಾ, ಐರ್ಲೆಂಡ್, ಸ್ಕಾಟ್ಲೆಂಡ್, ನಮೀಬಿಯಾ ಮತ್ತು ಓಮನ್‌ನಂತ ದೇಶಗಳು ಆರಂಭಿಕ ಹಂತಗಳಲ್ಲಿ ಶ್ರೀಲಂಕಾ, ಬಾಂಗ್ಲಾದಂತ ದೇಶಗಳ ವಿರುದ್ಧ ಸೂಪರ್ 12 ಹಂತಕ್ಕೆ ಸ್ಪರ್ಧಿಸಲು ಸವಾಲು ಸ್ವೀಕರಿಸುತ್ತಿತ್ತು. ಆದರೆ ಟೂರ್ನಿ ಮುಂದೂಡಿರುವ ಕಾರಣ ಹೊನ್ನ ವೃತ್ತಿ ಬದುಕನ್ನು ಕನಸು ಕಾಣುತ್ತಿದ್ದ ಆಟಗಾರರ ಆಸೆ ಮಣ್ಣಾಗಿದೆ.

ಡೆಲಿವರಿ ಬಾಯ್ ಆದ ಕ್ರಿಕೆಟಿಗ

ಟಿ20 ವಿಶ್ವಕಪ್‌ ಮುಂದೂಡಲಾಗಿರುವುದರಿಂದ ಬದುಕು ನಿರ್ವಹಣೆಗಾಗಿ ನೆದರ್ಲ್ಯಾಂಡ್ ವೇಗಿ ಪೌಲ್ ವ್ಯಾನ್ ಮೀಕರೆನ್ ಅವರು ಸೈಕಲ್ ತುಳಿದುಕೊಂಡು ಉಬರ್ ಈಟ್ಸ್‌ನಲ್ಲಿ ಫುಡ್ ಡೆಲಿವರಿ ಬಾಯ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ವ್ಯಾನ್ ಮೀಕರೆನ್ ಅವರು ನೆದರ್ಲ್ಯಾಂಡ್ಸ್‌ ಪರ 5 ಏಕದಿನ ಪಂದ್ಯಗಳಲ್ಲಿ 4 ವಿಕೆಟ್, 41 ಟಿ20ಐ ಪಂದ್ಯಗಳಲ್ಲಿ 47 ವಿಕೆಟ್, 56 ಟಿ20 ಪಂದ್ಯಗಳಲ್ಲಿ 52 ವಿಕೆಟ್ ಪಡೆದುಕೊಂಡಿದ್ದಾರೆ.

ವ್ಯಾನ್ ಬರೆದ ಸ್ಫೂರ್ತಿಯ ಸಾಲು

27ರ ಹರೆಯದ ಪೌಲ್, ತನ್ನ ಬದುಕು ಇಂಥ ಅನಿವಾರ್ಯತೆಗೆ ಸಿಕ್ಕಿದ್ದಕ್ಕೆ ಬೇಸರ ವ್ಯಕ್ತಪಡಿಸಿ ಟ್ವೀಟ್ ಮಾಡಿದ್ದಾರೆ. 'ನಾನಿವತ್ತು ಕ್ರಿಕೆಟ್ ಆಡುತ್ತಿರಬೇಕಾಗಿತ್ತು. ಆದರೆ ಚಳಿಗಾಲವನ್ನು ಕಳೆಯುವುದಕ್ಕಾಗಿ ನಾನಿವತ್ತು ಉಬರ್ ಈಟ್ಸ್‌ನಲ್ಲಿ ಫುಡ್ ಡೆಲಿವರಿ ಮಾಡುತ್ತಿದ್ದೇನೆ. ಸಂಗತಿಗಳು ಹೇಗೆಲ್ಲಾ ಅಚಾನಕ್ ಆಗಿ ಬದಲಾಗುತ್ತವೆಯಲ್ವಾ? ಹಹ್ಹ ಯಾವಾಗಲು ನಗುತ್ತಿರಿ..,' ಎಂದು ಟ್ವೀಟ್‌ನಲ್ಲಿ ವ್ಯಾನ್ ಸ್ಫೂರ್ತಿಯ ಸಾಲು ಬರೆದುಕೊಂಡಿದ್ದಾರೆ.