ಐಪಿಎಲ್ 2020 ನಡೆಸಲು ನ್ಯೂಜಿಲೆಂಡ್, ಶ್ರೀಲಂಕಾ, ಯುಎಇ ಮಧ್ಯೆ ಪೈಪೋಟಿ!

ಭಾರತದಲ್ಲಿ ಐಪಿಎಲ್ ನಡೆಯೋದು ಕಷ್ಟ

2020ರ ಮಾರ್ಚ್ 29ರಂದೇ ಐಪಿಎಲ್ ಆರಂಭವಾಗುವುದರಲ್ಲಿತ್ತು. ಆದರೆ ಕೊರೊನಾದಿಂದಾಗಿ ಶ್ರೀಮಂತ ಕ್ರಿಕೆಟ್ ಟೂರ್ನಿಯನ್ನು ಮುಂದೂಡಲಾಗಿದೆ. ಸದ್ಯಕ್ಕೆ ಐಪಿಎಲ್ ಅನ್ನು ಅಕ್ಟೋಬರ್‌-ನವೆಂಬರ್‌ನಲ್ಲಿ ನಡೆಸಲು ಯೋಚಿಸಲಾಗಿದೆ. ಆದರೆ ಸದ್ಯದ ಕೊರೊನಾ ಆತಂಕದ ಮಧ್ಯೆ ಭಾರತದಲ್ಲಿ ಐಪಿಎಲ್ ನಡೆಸೋದು ಕಷ್ಟವೆನಿಸಿದೆ.

ನ್ಯೂಜಿಲೆಂಡ್‌ನಿಂದ ಆಫರ್

'ಭಾರತದಲ್ಲೇ ಐಪಿಎಲ್ ನಡೆಸೋದು ನಮ್ಮ ಮೊದಲ ಆದ್ಯತೆಯಾಗಿದೆ. ಆದರೆ ಇಲ್ಲಿ ಟೂರ್ನಿ ನಡೆಸೋದು ಸುರಕ್ಷಿತವಲ್ಲ ಅನ್ನಿಸಿದರೆ ವಿದೇಶದಲ್ಲಿ ಟೂರ್ನಿ ನಡೆಸುವ ಆಯ್ಕೆಯತ್ತ ಹೋಗಲಿದ್ದೇವೆ. ಯುಎಇ, ಶ್ರೀಲಂಕಾ ಬಳಿಕ ಈಗ ನ್ಯೂಜಿಲೆಂಡ್ ಕೂಡ ಐಪಿಎಲ್‌ಗೆ ಆತಿಥ್ಯ ವಹಿಸುವ ಆಫರ್ ನೀಡಿದೆ,' ಎಂದು ಬಿಸಿಸಿಐ ಅಧಿಕಾರಿಯೊಬ್ಬರು ಪಿಟಿಐ ಜೊತೆ ಹೇಳಿಕೊಂಡಿದ್ದಾರೆ.

ಐಪಿಎಲ್ ವಿದೇಶದಲ್ಲಿ ನಡೆದಿತ್ತು

ಭಾರತದಲ್ಲಿ ಇದೇ ರೀತಿ ಕೊರೊನಾ ಸೋಂಕಿತರ ಸಂಖ್ಯೆ ಏರುತ್ತಲೇ ಸಾಗಿದರೆ, ವಿದೇಶದಲ್ಲೇ ಐಪಿಎಲ್ ನಡೆಯುವ ಸಾಧ್ಯತೆ ಹೆಚ್ಚಾಗಲಿದೆ. ಈ ಹಿಂದೆಯೂ ಎರಡು ಸೀಸನ್‌ಗಳು ವಿದೇಶದಲ್ಲಿ ನಡೆದಿದ್ದವು. 2009ರ ಐಪಿಎಲ್ ದಕ್ಷಿಣ ಆಫ್ರಿಕಾದಲ್ಲಿ ನಡೆದಿದ್ದರೆ, 2014ರ ಸೀಸನ್‌ನ ಒಂದಿಷ್ಟು ಪಂದ್ಯಗಳು ಯುಎಇಯಲ್ಲಿ ನಡೆದಿತ್ತು.

ಎಲ್ಲಿ ನಡೆಯೋ ಸಾಧ್ಯತೆ ಹೆಚ್ಚು?

ಐಪಿಎಲ್ ಆತಿಥ್ಯದ ಆಫರ್ ನೀಡಿರುವ ದೇಶಗಳಲ್ಲಿ ಯುಎಇ ಮುಂಚೂಣಿಯಲ್ಲಿದೆ. ಈ ಹಿಂದೆ ಯಶಸ್ವಿಯಾಗಿ ಟೂರ್ನಿ ಆಯೋಜಿಸಿದ ಹಿರಿಮೆಯೂ ಯುಎಇಗಿದೆ. ಶ್ರೀಲಂಕಾ ದೇಶದಲ್ಲಿ ನಡೆದರೆ ನೆರೆಯ ದೇಶವಾದ್ದರಿಂದ ಖರ್ಚು ಉಳಿತಾಯದ ದೃಷ್ಟಿಯಲ್ಲಿ ಅನುಕೂಲವಾಗಲಿದೆ. ಇನ್ನು ನ್ಯೂಜಿಲೆಂಡ್‌ನಲ್ಲಿ ಕೊರೊನಾ ಪ್ರಕರಣಗಳು ತೀರಾ ಕಮ್ಮಿಯಿರುವುದರಿಂದ ಆ ಭೀತಿ ಕಡಿಮೆ. ಹೀಗಾಗಿ ವಿದೇಶದಲ್ಲಿ ಐಪಿಎಲ್ ನಡೆಯುವುದಾದರೆ ಮೂರು ತಾಣಗಳಲ್ಲಿ ಎಲ್ಲಾದರೂ ನಡೆಯಬಹುದು. ಇಲ್ಲೇ ನಡೆಯಬಹುದು ಎಂದು ಈಗಲೇ ಹೇಳುವಂತಿಲ್ಲ.