ಆರ್‌ಸಿಬಿ ಬಗ್ಗೆ ಭಾವನಾತ್ಮಕ ಮಾತುಗಳನ್ನಾಡಿದ ನಾಯಕ ವಿರಾಟ್ ಕೊಹ್ಲಿ!

ಕೊಹ್ಲಿ ಆರ್‌ಸಿಬಿ ಬಿಡಬೇಕಾ?

ಆರ್‌ಸಿಬಿ ಒಮ್ಮೆಯೂ ಚಾಂಪಿಯನ್ ಆಗಿ ಹೊರಹೊಮ್ಮದಿರುವುದರಿಂದ ಸಹಜವಾಗಿಯೇ ತಂಡದ ನಾಯಕ ಕೊಹ್ಲಿಯ ಬಗ್ಗೆ ಟೀಕೆಗಳು ಕೇಳಿಬರುತ್ತವೆ. ಹೀಗಾಗಿ ಕೊಹ್ಲಿ, ಆರ್‌ಸಿಬಿ ತಂಡವನ್ನು ತೊರೆದು ಬೇರೆ ತಂಡಕ್ಕೆ ಬಂದರೆ ಒಳ್ಳೆಯದು ಎಂದು ಬಹಳಷ್ಟು ಮಂದಿ ಕ್ರಿಕೆಟ್ ಪ್ರೇಮಿಗಳು ಹೇಳುತ್ತಿರುತ್ತಾರೆ. ಕೊಹ್ಲಿ ಆರ್‌ಸಿಬಿ ತೊರೆಯೋದು ಸರಿಯಾ?

ಕಿಂಗ್ ಕೊಹ್ಲಿ ಏನಂತಾರೆ?

ಕೊಹ್ಲಿ ಅವರು ಆರ್‌ಸಿಬಿ ತೊರೆದರೆ ಚೆನ್ನ ಎಂಬ ಮಾತನ್ನು ಕೊಹ್ಲಿ ನಿರಾಕರಿಸಿದ್ದಾರೆ. ಯಾವುದೇ ಕಾರಣಕ್ಕೂ ನಾನು ಬೆಂಗಳೂರು ತಂಡವನ್ನು ತ್ಯಜಿಸಲಾರೆ ಎಂದು ಕೊಹ್ಲಿ ಹೇಳಿದ್ದಾರೆ. ಇಂಡಿಯನ್ ಪ್ರೀಮಿಯರ್ ಲೀಗ್ ಆರಂಭವಾದಾಗಿನಿಂದಲೂ ಕೊಹ್ಲಿ ಆರ್‌ಸಿಬಿ ತಂಡದಲ್ಲೇ ಆಡುತ್ತಿದ್ದಾರೆ.

ಆರ್‌ಸಿಬಿಯೊಂದಿಗೆ ಅದ್ಭುತ ಪ್ರಯಾಣ

ಆರ್‌ಸಿಬಿ ಸಹ ಆಟಗಾರ ಎಬಿಡಿ ಜೊತೆ ಇನ್‌ಸ್ಟಾಗ್ರಾಮ್‌ ವೀಡಿಯೋದಲ್ಲಿ ಮಾತನಾಡಿರುವ ಕೊಹ್ಲಿ, 'ಆರ್‌ಸಿಬಿ ಜೊತೆಗಿನ ಪಯಣ ಅದ್ಭುತವಾದ್ದು. ಐಪಿಎಲ್ ಟ್ರೋಫಿಯನ್ನ ನಾವೆಲ್ಲರೂ ಸೇರಿ ಗೆಲ್ಲಬೇಕನ್ನೋದು ನಮ್ಮ ಕನಸು. ಆದರೆ ಯಾವುದೇ ಸಂದರ್ಭದಲ್ಲೂ ನಾನು ತಂಡ ಬಿಟ್ಟು ಹೋಗುವ ಬಗ್ಗೆ ಯೋಚಿಸಲಾರೆ,' ಎಂದು ಹೇಳಿದ್ದಾರೆ.

'ನಾನಿನ್ನ ಬಿಡಲಾರೆ' ಎಂದ ಕೊಹ್ಲಿ

'ಈವರೆಗೂ ಸೀಸನ್‌ನಲ್ಲಿ ಚೆನ್ನಾಗಿ ಆಡಲಾಗಿಲ್ಲ, ಟ್ರೋಫಿ ಗೆಲ್ಲಲಾಗುತ್ತಿಲ್ಲ ಎಂದಾಗ ಬೇಸರವಾಗುತ್ತದೆ. ಆದರೆ ನಾನು ಎಲ್ಲೀವರೆಗೂ ಐಪಿಎಲ್‌ ಆಡುತ್ತೇನೋ, ಅಲ್ಲೀವರೆಗೂ ಆರ್‌ಸಿಬಿ ಬಿಡಲಾರೆ. ತಂಡದ ಬಗ್ಗೆ ಅಭಿಮಾನಿಗಳಿಗಿರುವ ಪ್ರೀತಿ, ಪ್ರಾಮಾಣಿಕತೆ ಕೂಡ ಬೆಲೆಕಟ್ಟಲಾರದ್ದು,' ಎಂದು 31ರ ಹರೆಯದ ಕೊಹ್ಲಿ ವಿವರಿಸಿದರು.

ಐಪಿಎಲ್ ಟ್ರೋಫಿ ಗೆಲ್ಲದ ತಂಡಗಳು

ಐಪಿಎಲ್‌ನಲ್ಲಿ ಈವರೆಗೂ ಟ್ರೋಫಿಯೇ ಗೆಲ್ಲದ ತಂಡಗಳೆಂದರೆ ಕಿಂಗ್ಸ್ ಇಲೆವೆನ್ ಪಂಜಾಬ್, ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು. ಆರ್‌ಸಿಬಿ ತಂಡ 2016ರಲ್ಲಿ, 2011ರಲ್ಲಿ, 2009ರಲ್ಲಿ ಫೈನಲ್‌ಗೆ ಪ್ರವೇಶಿಸಿತ್ತು, ಆದರೆ ಪ್ರಶಸ್ತಿ ಸುತ್ತಿನಲ್ಲಿ ಸೋತಿತ್ತು.