ಟೀಮ್ ಇಂಡಿಯಾ ಪರ ಸುರೇಶ್ ರೈನಾ ಇತಿಹಾಸ ನಿರ್ಮಿಸಿದ ದಿನವಿದು

10 ವರ್ಷಗಳ ಹಿಂದಿನ ದಾಖಲೆ

ಸುರೇಶ್ ರೈನಾ ಇತಿಹಾಸ ನಿರ್ಮಿಸಿದ್ದು 2 ಮೇ 2010ರ ಇದೇ ದಿನ. ಆವತ್ತು ಭಾರತ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳು ಐಸಿಸಿ ಟಿ20 ವಿಶ್ವಕಪ್ ಟೂರ್ನಿಯ 5ನೇ ಪಂದ್ಯದಲ್ಲಿ ಮುಖಾಮುಖಿಯಾಗಿದ್ದವು. ಸೇಂಟ್ ಲೂಸಿಯಾದ ಗ್ರಾಸ್ ಐಲೆಟ್‌ನಲ್ಲಿರುವ ಡ್ಯಾರೆನ್ ಸ್ಯಮಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಪಂದ್ಯ ನಡೆದಿತ್ತು.

ಚೊಚ್ಚಲ ಭಾರತೀಯ ಆಟಗಾರ

ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ಶತಕ ಬಾರಿಸಿದ ಮೊದಲ ಭಾರತೀಯನಾಗಿ ಸುರೇಶ್ ರೈನಾ ಆವತ್ತು ದಾಖಲೆ ಬರೆದಿದ್ದರು. ಅದೂ ಕೇವಲ 60 ಎಸೆಗಳಲ್ಲಿ ರೈನಾ 101 ರನ್ ಸಿಡಿಸಿದ್ದರು. ಈ ವೇಳೆ 9 ಬೌಂಡರಿ, 5 ಸಿಕ್ಸರ್‌ಗಳು ಸುರೇಶ್ ಬ್ಯಾಟಿಂದ ಸಿಡಿದಿತ್ತು.

ರೈನಾ ಒಬ್ಬರೇ ಆಡಿದ್ದು

ಟಾಸ್ ಸೋತು ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಭಾರತ ಪರ ಆವತ್ತು ದಿಟ್ಟ ಬ್ಯಾಟಿಂಗ್ ಮಾಡಿದ್ದು ರೈನಾ ಮಾತ್ರ. ಇನ್ನು ದಿನೇಶ್ ಕಾರ್ತಿಕ್ 16, ರೈನಾ 101, ಯುವರಾಜ್ ಸಿಂಗ್ 37, ಯೂಸುಫ್ ಪಠಾಣ್ 11, ಎಂಎಸ್ ಧೋನಿ 16 ರನ್ ಸೇರಿಸಿದ್ದರು. ಭಾರತ 20 ಓವರ್‌ಗೆ 5 ವಿಕೆಟ್ ನಷ್ಟದಲ್ಲಿ 186 ರನ್ ಮಾಡಿತ್ತು.

ಗೆದ್ದು ಬೀಗಿದ್ದ ಭಾರತ

ರೈನಾ ಬ್ಯಾಟಿಂಗ್ ಬಲದಿಂದಾಗಿ ಆವತ್ತು ಧೋನಿ ನಾಯಕತ್ವದ ಭಾರತ ತಂಡ ಗೆದ್ದು ಬೀಗಿತ್ತು. ಗುರಿ ಬೆನ್ನಟ್ಟಿದ ದಕ್ಷಿಣ ಆಪ್ರಿಕಾ ತಂಡ, ಜಾಕ್ ಕ್ಯಾಲೀಸ್ 73, ಗ್ರೇಮ್ ಸ್ಮಿತ್ 36, ಎಬಿ ಡಿ ವಿಲಿಯರ್ಸ್ 36 ರನ್ ಕೊಡುಗೆಯೊಂದಿಗೆ 20 ಓವರ್‌ ಮುಕ್ತಾಯಕ್ಕೆ 5 ವಿಕೆಟ್ ಕಳೆದು 172 ರನ್ ಬಾರಿಸಿ 14ರನ್‌ನಿಂದ ಸೋತಿತ್ತು. ಸುರೇಶ್ ರೈನಾ ಪಂದ್ಯಶ್ರೇಷ್ಠರೆನಿಸಿದ್ದರು.