ಕಬಡ್ಡಿ: ಹರಿಯಾಣ ಸ್ಟೀಲರ್ಸ್ ಕಟ್ಟಿಹಾಕಿದ ಗುಜರಾತ್ ಫಾರ್ಚೂನ್ ಜೈಂಟ್ಸ್

ಅಹ್ಮದಾಬಾದ್, ನವೆಂಬರ್ 22: ಗುಜರಾತ್‌ನ ಅಹ್ಮದಾಬಾದ್‌ನಲ್ಲಿರುವ ಟ್ರಾನ್ಸ್‌ಸ್ಟೇಡಿಯಾ ಇಂಡೋರ್ ಅರೆನಾದಲ್ಲಿ ಗುರುವಾರ (ನವೆಂಬರ್ 22) ನಡೆದ ಪ್ರೊ ಕಬಡ್ಡಿ ಲೀಗ್ ಪಂದ್ಯದಲ್ಲಿ ಹರ್ಯಾಣ ಸ್ಟೀಲರ್ಸ್ ಎದುರು ಆತಿಥೇಯ ಗುಜರಾತ್‌ ಫಾರ್ಚೂನ್‌ ಜೈಂಟ್ಸ್‌ 40-31ರ ಜಯ ಸಾಧಿಸಿತು.

ಸಚಿನ್ ಚತುರ ಆಟ ಗುಜರಾತ್‌ಗೆ ತವರು ನೆಲದಲ್ಲಿನ ಕೊನೆಯ ಪಂದ್ಯದಲ್ಲಿ ಗೆಲುವನ್ನಾಚರಿಸಲು ನೆರವು ನೀಡಿತು. ಸಚಿನ್ 10 ಪಾಯಿಂಟ್‌ಗಳನ್ನು ತಂಡಕ್ಕೆ ಸೇರಿಸಿದರು. ಜೊತೆಗೆ ಪರ್ವೇಶ್ 6, ಮಹೇಂದರ್ ಗಣೇಶ್ 4 ಪಾಯಿಂಟ್ ಬೆಂಬಲವೂ ತಂಡವನ್ನು ಗೆಲುವಿನ ಹೊಸ್ತಿಲಿಗೆ ಎಳೆದು ತಂದಿತು.

ಹರ್ಯಾಣ ಸ್ಟೀಲರ್ಸ್ ಪರ ಮೋನು ಗೋಯಟ್ 10 ಅಂಕಗಳನ್ನು ಸೇರಿಸಿ ಹೋರಾಟ ನಡೆಸಿದರಾದರೂ ಅಂತಿಮವಾಗಿ ಗುಜರಾತ್ ಮೇಲುಗೈ ಸಾಧಿಸಿತು. ಎ ಝೋನ್‌ನಲ್ಲಿರುವ ಗುಜರಾತ್ ಫಾರ್ಚೂನ್ ಜೈಂಟ್ಸ್‌ ಈಗ ಮುಂಬೈ ತಂಡವನ್ನು ಹಿಂದಿಕ್ಕಿ ಅಗ್ರ ಸ್ಥಾನಕ್ಕೇರಿದೆ. ಮುಂದಿನ ನವೆಂಬರ್ 23ರಿಂದ ಪಂದ್ಯಗಳು ಪುಣೆಯಲ್ಲಿ ನಡೆಯಲಿವೆ.