ಶ್ರೀಲಂಕಾ ವಿರುದ್ಧ ಭಾರತ, ಮಳೆ ಬಿದ್ದರೆ ಅನಾಹುತ ಗ್ಯಾರಂಟಿ!

ಲಂಡನ್, ಜೂನ್ 08: ಐಸಿಸಿ ಚಾಂಪಿಯನ್ಸ್ ಟ್ರೋಫಿಯ ಎರಡನೇ ಲೀಗ್ ಪಂದ್ಯದಲ್ಲಿ ಶ್ರೀಲಂಕಾ ತಂಡವನ್ನು ಟೀಂ ಇಂಡಿಯಾ ಎದುರಿಸಲಿದೆ. ಭಾರತದ ನಾಯಕ ವಿರಾಟ್ ಕೊಹ್ಲಿಗೆ ತಂಡದ ಆಯ್ಕೆ ಸಮಸ್ಯೆ ಎದುರಾಗಿದ್ದರೆ, ಉಭಯ ತಂಡಕ್ಕೂ ಮಳೆರಾಯನ ಕೃಪೆ ಸಿಗಬೇಕಿದೆ.

ಸೆಮಿಫೈನಲ್ ಹಂತಕ್ಕೇರಲು ಭಾರತಕ್ಕೆ ಈ ಪಂದ್ಯದಲ್ಲಿ ಗೆಲುವು ಅನಿವಾರ್ಯ. ಒಂದು ವೇಳೆ ಮಳೆ ಬಿದ್ದು, ಪಂದ್ಯ ರದ್ದಾದರೆ, ಅಂಕಪಟ್ಟಿಯಲ್ಲಿ ರನ್ ಸರಾಸರಿ ಲೆಕ್ಕಕ್ಕೆ ಬರುತ್ತದೆ.

ಎರಡು ತಂಡಗಳಿಗೂ ಮಳೆಯದ್ದೇ ಚಿಂತೆ. ಲಂಡನ್ನಿನ ಹವಾಮಾನ ವರದಿಯಂತೆ ಗುರುವಾರ ಮಧ್ಯಾಹ್ನ ಹಾಗೂ ಸಂಜೆ ವೇಳೆಗೆ ಮಳೆಯಾಗುವ ಸಾಧ್ಯತೆ ಹೆಚ್ಚಿದೆ. ಶೇ 40-50 ಮಳೆ ಖಂಡಿತ ಎಂದು ವರದಿ ಹೇಳಿದೆ.

ಪಾಕಿಸ್ತಾನ ವಿರುದ್ಧ 124ರನ್ ಅಂತರದ ಗೆಲುವು ಸಾಧಿಸಿದ ಭಾರತ, ಈ ಪಂದ್ಯ ಗೆಲ್ಲುವ ಫೇವರೀಟ್. ದಕ್ಷಿಣ ಆಫ್ರಿಕಾ ವಿರುದ್ಧ 96ರನ್ ಗಳಿಂದ ಸೋತಿರುವ ಶ್ರೀಲಂಕಾಕ್ಕೆ ಗೆಲುವಿನ ಅಗತ್ಯವಿದೆ. ನಾಯಕ ಏಂಜೆಲೋ ಮ್ಯಾಥ್ಯೂಸ್ ಇನ್ನೂ ಸಂಪೂರ್ಣವಾಗಿ ಗುಣಮುಖರಾಗಿಲ್ಲ.