ಅಂಡರ್ 19 ವಿಶ್ವಕಪ್‌ಗಾಗಿ ದ.ಆಫ್ರಿಕಾ ತಲುಪಿದ ಭಾರತ ತಂಡ: ವೀಡಿಯೋ

ಕೇಪ್‌ಟೌನ್, ಡಿಸೆಂಬರ್ 21: ಮುಂದಿನ ವರ್ಷ ಜನವರಿಯಿಂದ ಆರಂಭಗೊಳ್ಳಲಿರುವ ಅಂಡರ್ 19 ವಿಶ್ವಕಪ್‌ ಟೂರ್ನಿಗಾಗಿ ಪ್ರಿಯಾಮ್ ಗರ್ಗ್ ನಾಯಕತ್ವದ ಟೀಮ್ ಇಂಡಿಯಾ ದಕ್ಷಿಣ ಆಫ್ರಿಕಾ ತಲುಪಿದೆ. ಈ ಟೂರ್ನಿ ಜನವರಿ 17ಯಿಂದ ಆರಂಭಗೊಳ್ಳಲಿದೆ. ಅಂಡರ್ 19 ವಿಶ್ವಕಪ್‌ನಲ್ಲಿ ಭಾರತವೇ ಹಾಲಿ ಚಾಂಪಿಯನ್.

'ಜನವರಿ 17ಯಿಂದ ಆರಂಭಗೊಳ್ಳಲಿರುವ ಅಂಡರ್ 19 ವಿಶ್ವಕಪ್‌ ತಯಾರಿಗಾಗಿ ನಮ್ಮ ಹುಡುಗರು ಈ ದಿನ ದಕ್ಷಿಣ ಆಫ್ರಿಕಾಕ್ಕೆ ಹೊರಟಿದ್ದಾರೆ,' ಎಂದು ಬಿಸಿಸಿಐ ಶುಭಕೋರಿ ಟ್ವೀಟ್ ಮಾಡಿದೆ. 13ನೇ ಆವೃತ್ತಿಯ ಅಂಡರ್ 19 ವಿಶ್ವಕಪ್‌ನಲ್ಲಿ ಒಟ್ಟ 16 ತಂಡಗಳು 4 ಗುಂಪುಗಳಲ್ಲಿ ಆಡಲಿವೆ.

ಹಾಲಿ ಚಾಂಪಿಯನ್ ಭಾರತ ತಂಡ ಗ್ರೂಪ್‌ 'ಎ'ಯಲ್ಲಿದೆ. ಇದೇ ಗ್ರೂಪ್‌ನಲ್ಲಿ ಮೊದಲ ಬಾರಿ ಅರ್ಹತೆ ಗಿಟ್ಟಿಸಿಕೊಂಡಿರುವ ಜಪಾನ್, ನ್ಯೂಜಿಲೆಂಡ್ ಮತ್ತು ಶ್ರೀಲಂಕಾ ತಂಡಗಳಿವೆ. ಟೂರ್ನಿಯಲ್ಲಿ ಟಾಪ್‌ 2ರಲ್ಲಿ ಉಳಿಯುವ ತಂಡಗಳು ಸೂಪರ್ ಲೀಗ್ ಹಂತಕ್ಕೆ ಅರ್ಹತೆ ಪಡೆದುಕೊಳ್ಳಲಿದೆ.

ವಿಶ್ವಕಪ್‌ ನಿಜವಾದ ಸ್ಪರ್ಧೆ ಆರಂಭಕ್ಕೂ ಮುನ್ನ ಭಾರತ ಯುವ ತಂಡ ದಕ್ಷಿಣ ಆಫ್ರಿಕಾ ಅಂಡರ್ 19 ತಂಡದ ವಿರುದ್ಧ 3 ಏಕದಿನ ಪಂದ್ಯಗಳನ್ನಾಡಲಿದೆ. ಅದಾಗಿ ದಕ್ಷಿಣ ಆಫ್ರಿಕಾ ಅಂಡರ್ 19, ಭಾರತ ಅಂಡರ್ 19, ಜಿಂಬಾಬ್ವೆ ಅಂಡರ್ 19, ನ್ಯೂಜಿಲೆಂಡ್ ಅಂಡರ್ 19 ತಂಡಗಳ ನಡುವೆ ಚತುರ್ಭುಜ ಸರಣಿ ನಡೆಯಲಿದೆ.

ಅಂಡರ್ -19 ವಿಶ್ವಕಪ್‌ಗಾಗಿ ಭಾರತೀಯ ತಂಡ: ಪ್ರಿಯಾಮ್ ಗರ್ಗ್ (ನಾಯಕ), ಯಶಸ್ವಿ ಜೈಸ್ವಾಲ್, ತಿಲಕ್ ವರ್ಮಾ, ದಿವ್ಯಾಂಶ್ ಸಕ್ಸೇನಾ, ಧ್ರುವ್ ಚಂದ್ ಜುರೆಲ್ (ಉಪನಾಯಕ & ವಿಕೆ), ಶಾಶ್ವತ್ ರಾವತ್, ದಿವ್ಯಾಂಶ್ ಜೋಶಿ, ಶುಭಾಂಗ್ ಹೆಗ್ಡೆ, ರವಿ ಬಿಷ್ನೋಯ್, ಆಕಾಶ್ ಸಿಂಗ್ , ಕಾರ್ತಿಕ್ ತ್ಯಾಗಿ, ಅಥರ್ವ ಅಂಕೋಲೆಕರ್, ಕುಮಾರ್ ಕುಶಾಗ್ರಾ (ವಿಕೆ), ಸುಶಾಂತ್ ಮಿಶ್ರಾ, ವಿದ್ಯಾಧರ್ ಪಾಟೀಲ್.