ರಾಜ್‌ಕೋಟ್‌ ಟೆಸ್ಟ್‌: ನೂರನೇ ಪಂದ್ಯ ಆಡಲಿರುವ ಇಂಗ್ಲೆಂಡ್ ನಾಯಕ ಬೆನ್ ಸ್ಟೋಕ್ಸ್‌

ಭಾರತ ಮತ್ತು ಇಂಗ್ಲೆಂಡ್ ನಡುವೆ ಐದು ಪಂದ್ಯಗಳ ರೋಚಕ ಟೆಸ್ಟ್ ಸರಣಿ ನಡೆಯುತ್ತಿದೆ. ಈಗಾಗಲೇ ಇಂಗ್ಲೆಂಡ್‌ ಮೊದಲ ಟೆಸ್ಟ್‌ನಲ್ಲಿ ಜಯ ಸಾಧಿಸಿತ್ತು. ಎರಡನೇ ಟೆಸ್ಟ್‌ನಲ್ಲಿ ಟೀಮ್ ಇಂಡಿಯಾ ಗೆಲುವು ಸಾಧಿಸಿ, ಐದು ಪಂದ್ಯಗಳ ಸರಣಿಯಲ್ಲಿ ಸಮಬಲ ಸಾಧಿಸಿದೆ. ಹೀಗಾಗಿ ಮೂರನೇ ಟೆಸ್ಟ್‌ನತ್ತ ಎಲ್ಲರ ಚಿತ್ತ ಕದ್ದಿದೆ.

ಉಭಯ ತಂಡಗಳ ನಡುವಿನ ಸರಣಿಯ ಮೂರನೇ ಪಂದ್ಯ ಫೆಬ್ರವರಿ 15 ರಿಂದ ರಾಜ್‌ಕೋಟ್‌ನಲ್ಲಿ ನಡೆಯಲಿದೆ. ಇಂಗ್ಲೆಂಡ್ ನಾಯಕ ಬೆನ್ ಸ್ಟೋಕ್ಸ್‌ಗೆ ಈ ಪಂದ್ಯ ತುಂಬಾ ವಿಶೇಷ. ಸ್ಟೋಕ್ಸ್ ತಮ್ಮ ವೃತ್ತಿಜೀವನದ 100 ನೇ ಟೆಸ್ಟ್ ಅನ್ನು ರಾಜ್‌ಕೋಟ್‌ನಲ್ಲಿ ಆಡಲಿದ್ದಾರೆ. ಸ್ಟೋಕ್ಸ್ ತನ್ನ 100ನೇ ಟೆಸ್ಟ್ ಅನ್ನು ಸ್ಮರಣೀಯವಾಗಿಸಲು ಕಠಿಣ ತಯಾರಿ ನಡೆಸಿದ್ದಾರೆ. ಈ ಪಂದ್ಯದಲ್ಲಿ ಸ್ಟೋಕ್ಸ್ ಬೌಲಿಂಗ್ ಮಾಡುವುದನ್ನು ಕೂಡ ನೋಡಬಹುದು.

ಬೆನ್‌ ಸ್ಟೋಕ್ಸ್‌ ವೃತ್ತಿಜೀವನದ 100 ನೇ ಟೆಸ್ಟ್‌ಗೆ ಮೊದಲು, ಬೆನ್ ಸ್ಟೋಕ್ಸ್ ರಾಜ್‌ಕೋಟ್‌ನಲ್ಲಿ ಕಠಿಣ ತಯಾರಿ ನಡೆಸಿದರು. ಆದರೆ, ಮೊಣಕಾಲಿನ ಗಾಯದಿಂದಾಗಿ ಈ ಸ್ಟಾರ್ ಆಟಗಾರ ಇಂಗ್ಲೆಂಡ್ ಪರ ಬ್ಯಾಟ್ಸ್‌ಮನ್ ಆಗಿ ಮಾತ್ರ ಆಡುತ್ತಿರುವುದು ಕಂಡುಬಂದಿದೆ. ಆದರೆ ಸ್ಟೋಕ್ಸ್ ಅವರ ಗಾಯವು ಮೊದಲಿಗಿಂತ ಈಗ ಚೇತರಿಕೆ ಕಂಡಿದೆ ಎಂದು ತಿಳಿದು ಬಂದಿದೆ. ಬೌಲಿಂಗ್ ಅಭ್ಯಾಸ ಮಾಡುವ ಅವರ ಫೋಟೊ ಸಾಮಾಜಿಕ ಮಾಧ್ಯಮದಲ್ಲಿ ಕಾಣಿಸಿಕೊಂಡಿದೆ. ಈ ಚಿತ್ರವು ಕಾಣಿಸಿಕೊಂಡ ನಂತರ, ಸ್ಟೋಕ್ಸ್ ತನ್ನ ಸ್ಮರಣೀಯ ಪಂದ್ಯದಲ್ಲಿ ಬೌಲಿಂಗ್ ಮಾಡುವುದನ್ನು ಸಹ ಕಾಣಬಹುದಾಗಿದೆ.

ಸ್ಟೋಕ್ಸ್‌ಗೆ ಕಾಡಿದ ಮೊಣಕಾಲಿನ ಗಾಯ

ಇಂಗ್ಲೆಂಡ್ ತಂಡದ ಟೆಸ್ಟ್ ನಾಯಕ ಬೆನ್ ಸ್ಟೋಕ್ಸ್ ಅವರು ಮೊಣಕಾಲಿನ ಗಾಯದಿಂದ ಬಹಳ ಸಮಯದಿಂದ ಅವರನ್ನು ಕಾಡುತ್ತಿದೆ. ಕಳೆದ ವರ್ಷ ಸ್ಟೋಕ್ಸ್‌ಗೆ ಮೊಣಕಾಲು ಆಪರೇಷನ್ ಆಗಿತ್ತು. ಈ ಗಾಯದಿಂದಾಗಿ ಸ್ಟೋಕ್ಸ್ ಬೌಲಿಂಗ್‌ನಿಂದ ದೂರ ಉಳಿದಿದ್ದಾರೆ. ಅವರ ಗಾಯವು ಮೊದಲಿಗಿಂತ ಈಗ ಉತ್ತಮವಾಗಿದೆ ಮತ್ತು ಇದನ್ನು ನೋಡಿದ ಸ್ಟೋಕ್ಸ್ ನಿಧಾನವಾಗಿ ಬೌಲಿಂಗ್ ಮಾಡಲು ಪ್ರಾರಂಭಿಸಿದ್ದಾರೆ. ಸ್ಟೋಕ್ಸ್ 99 ಟೆಸ್ಟ್ ಪಂದ್ಯಗಳಲ್ಲಿ ಬೌಲಿಂಗ್ ನಲ್ಲಿ 197 ವಿಕೆಟ್ ಪಡೆದಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ಸ್ಟೋಕ್ಸ್ ಬೌಲಿಂಗ್ ಮಾಡಿದರೆ ಬ್ಯಾಟ್ ಮತ್ತು ಬಾಲ್ ಎರಡರಲ್ಲೂ ಭಾರತದ ಸಮಸ್ಯೆಗಳನ್ನು ಹೆಚ್ಚಿಸಬಹುದು.

ಹೇಗಿದೆ ಸ್ಟೋಕ್ಸ್‌ ಪ್ರದರ್ಶನ

ಭಾರತದ ವಿರುದ್ಧ ಇಂಗ್ಲೆಂಡ್ ನಾಯಕನ ಪ್ರದರ್ಶನ ಸ್ಥಿರವಾಗಿದೆ. ಇವರು ಭಾರತದ ವಿರುದ್ಧ ಆಡಿದ 18 ಪಂದ್ಯಗಳಲ್ಲಿ 47.28ರ ಸರಾಸರಿಯಲ್ಲಿ 907 ರನ್‌ ಸಿಡಿಸಿದ್ದಾರೆ. ಇನ್ನು ಭಾರತದಲ್ಲಿ ಇವರು ಆಡಿದ 11 ಪಂದ್ಯಗಳಲ್ಲಿ 682 ರನ್‌ ಬಾರಿಸಿದ್ದಾರೆ. ಭಾರತದ ಪರ 39 ವಿಕೆಟ್‌ ಪಡೆದು ಬೀಗಿದರೆ, ಭಾರತದಲ್ಲಿ 13 ವಿಕೆಟ್‌ ಕಬಳಿಸಿದ್ದಾರೆ. ಸ್ಟೋಕ್ಸ್‌ ಆಲ್‌ರೌಂಡರ್‌ ಆಟವನ್ನು ಪ್ರದರ್ಶಿಸುವ ವಿಶ್ವಾಸ ಹೊಂದಿದ್ದಾರೆ. ತವರಿನಲ್ಲಿ ಇವರು 98 ವಿಕೆಟ್‌ ಪಡೆದರೆ, ವಿದೇಶದಲ್ಲಿ 94 ವಿಕೆಟ್‌ ಕಬಿಳಿಸಿದ್ದಾರೆ.