Ranji: ಆರಂಭಿಕ ಪಂದ್ಯಗಳಿಗೆ ಪೃಥ್ವಿ, ಸೂರ್ಯ, ಜೈಸ್ವಾಲ್ ಗೆ ಸ್ಥಾನವಿಲ್ಲ, ರಹಾನೆಗೆ ಪಟ್ಟ

ಮುಂಬರುವ ರಣಜಿ ಟ್ರೋಫಿಯ ಹೊಸ ಋತುವಿನ ಮೊದಲ ಎರಡು ಪಂದ್ಯಗಳಿಗೆ ಮುಂಬೈ 15 ಸದಸ್ಯರ ತಂಡವನ್ನು ಬಿಡುಗಡೆ ಮಾಡಿದೆ. ಇದರಲ್ಲಿ ಭಾರತದ ಯುವ ಬ್ಯಾಟ್ಸ್ ಮನ್ ಪೃಥ್ವಿ ಶಾ ಸ್ಥಾನ ಪಡೆದಿಲ್ಲ.

ಅಜಿಂಕ್ಯ ರಹಾನೆ ಸತತ ಎರಡನೇ ಋತುವಿನಲ್ಲಿ ತಂಡದ ನಾಯಕತ್ವ ವಹಿಸಲಿದ್ದಾರೆ. 2023 ರಲ್ಲಿ, ಮುಂಬೈ ತಂಡವು ಎಲೈಟ್ ಗುಂಪಿನಲ್ಲಿ ನಾಲ್ಕನೇ ಸ್ಥಾನ ಗಳಿಸಿತು ಮತ್ತು ನಾಕೌಟ್‌ಗೆ ಅರ್ಹತೆ ಪಡೆಯಲು ವಿಫಲವಾಗಿತ್ತು. ಮುಂಬೈ ಜನವರಿ 5 ರಂದು ಬಿಹಾರ ವಿರುದ್ಧ ತನ್ನ ಅಭಿಯಾನವನ್ನು ಪ್ರಾರಂಭಿಸಲಿದೆ, ನಂತರ ಜನವರಿ 12 ರಿಂದ 15 ರವರೆಗೆ ಆಂಧ್ರಪ್ರದೇಶದೊಂದಿಗೆ ಹೋರಾಟ ನಡೆಸಲಿದೆ.

ಕಳೆದ ವರ್ಷ ಪೃಥ್ವಿ ಶಾ ಅವರು ನಾರ್ಥಾಂಪ್ಟನ್‌ಶೈರ್ ಕೌಂಟಿ ಕ್ರಿಕೆಟ್ ತಂಡದ ಭಾಗವಾಗಿದ್ದರು. ಸೆಪ್ಟೆಂಬರ್‌ನಲ್ಲಿ ಡರ್ಹಾಮ್ ವಿರುದ್ಧದ ಪಂದ್ಯದಲ್ಲಿ ಅವರು ಮೊಣಕಾಲಿನ ಗಾಯಕ್ಕೆ ಒಳಗಾಗಿದ್ದರು. ನಂತರ ಅವರು 3 ತಿಂಗಳ ಚೇತರಿಕೆಯ ಹಿನ್ನೆಲೆ ವಿರಾಮ ಪಡೆದಿದ್ದರು. ಆದರೆ, ಶಾ ತಂಡದಲ್ಲಿ ಇಲ್ಲದಿರುವ ಬಗ್ಗೆ ಮುಂಬೈ ಕ್ರಿಕೆಟ್ ಸಂಸ್ಥೆ ಸ್ಪಷ್ಟನೇ ನೀಡಿಲ್ಲ. ಶಾ ಮುಂಬೈ ಪರ 44 ರಣಜಿ ಪಂದ್ಯಗಳಲ್ಲಿ 12 ಶತಕಗಳೊಂದಿಗೆ 3802 ರನ್ ಗಳಿಸಿದ್ದಾರೆ.

23 ವರ್ಷದ ಎಡಗೈ ಸ್ಪಿನ್ನರ್ ಅಥರ್ವ ಅಂಕೋಲೆಕರ್ ಮೊದಲ ಬಾರಿಗೆ ತಂಡವನ್ನು ಸೇರಿಕೊಂಡಿದ್ದಾರೆ. 2020 ರಲ್ಲಿ, ಅಥರ್ವ ಭಾರತೀಯ ಅಂಡರ್-19 ತಂಡದ ಭಾಗವಾಗಿದ್ದರು. ಡಿಸೆಂಬರ್ 31 ರ ಭಾನುವಾರದಂದು, ಪೊಲೀಸ್ ಜಿಮ್ಖಾನಾದಲ್ಲಿ ನಡೆದ ಪೊಲೀಸ್ ಶೀಲ್ಡ್ ಫೈನಲ್‌ನಲ್ಲಿ ನ್ಯೂ ಹಿಂದ್ ಸ್ಪೋರ್ಟಿಂಗ್ ಕ್ಲಬ್ ವಿರುದ್ಧ ವಿಕ್ಟರಿ ಕ್ರಿಕೆಟ್ ಕ್ಲಬ್‌ ಪರ ಆಡಿದ ಅಂಕೋಲೆಕರ್ 70 ರನ್ ಮತ್ತು 5 ವಿಕೆಟ್ ಪಡೆದರು.

ಶಾ ಹೊರತುಪಡಿಸಿ, ಯಶಸ್ವಿ ಜೈಸ್ವಾಲ್ ಮತ್ತು ಸೂರ್ಯಕುಮಾರ್ ಯಾದವ್ ಕೂಡ ಈ ಋತುವಿನ ಆರಂಭಿಕ ಪಂದ್ಯಗಳಲ್ಲಿ ತಂಡದ ಭಾಗವಾಗಿಲ್ಲ. ಆದಾಗ್ಯೂ, ಇಬ್ಬರೂ ಆಟಗಾರರು ರಾಷ್ಟ್ರೀಯ ತಂಡದ ಸಾಮಾನ್ಯ ಆಟಗಾರರಾಗಿದ್ದಾರೆ.

ಮುಂಬೈ ರಣಜಿ ಟ್ರೋಫಿ ಇತಿಹಾಸದಲ್ಲಿ ಅತ್ಯಂತ ಯಶಸ್ವಿ ತಂಡವಾಗಿದೆ. ಅವರು 88 ಋತುಗಳಲ್ಲಿ 39 ಬಾರಿ ಟ್ರೋಫಿಯನ್ನು ಗೆದ್ದಿದ್ದಾರೆ, ಅಂದರೆ 44.3 ಪ್ರತಿಶತ. ಇದಾದ ನಂತರ 8 ಬಾರಿ ಪ್ರಶಸ್ತಿ ಗೆದ್ದಿರುವ ಕರ್ನಾಟಕ ಎರಡನೇ ಯಶಸ್ವಿ ತಂಡವಾಗಿದೆ. ಆದರೆ, 2015-16ರ ಋತುವಿನಿಂದ ಮುಂಬೈ ಒಂದೂ ಪ್ರಶಸ್ತಿ ಗೆದ್ದಿಲ್ಲ. ಅಂದಿನಿಂದ ಮುಂಬೈ ಎರಡು ಬಾರಿ ಫೈನಲ್‌ ಆಡಿದ್ದು, ಅದರಲ್ಲಿ ಗೆಲುವು ಸಾಧಿಸಿರಲಿಲ್ಲ.

ಮೊದಲ ಎರಡು ರಣಜಿ ಪಂದ್ಯಗಳಿಗೆ ಮುಂಬೈ ತಂಡ - ಅಜಿಂಕ್ಯ ರಹಾನೆ (ನಾಯಕ), ಜೈ ಬಿಸ್ತಾ, ಭೂಪೇನ್ ಲಾಲ್ವಾನಿ, ಹಾರ್ದಿಕ್ ತಮೋರ್, ಸರ್ಫರಾಜ್ ಖಾನ್, ಶಿವಂ ದುಬೆ, ಸುವೇದ್ ಪಾರ್ಕರ್, ಪ್ರಸಾದ್ ಪವಾರ್, ಶಮ್ಸ್ ಮುಲಾನಿ, ತನುಷ್ ಕೋಟ್ಯಾನ್, ತುಷಾರ್ ದೇಶಪಾಂಡೆ, ಮೋಹಿತ್ ಅವಸ್ಥಿ. ಕುಲಕರ್ಣಿ, ರಾಯ್ಸ್ಟನ್ ಡಯಾಸ್ ಮತ್ತು ಅಥರ್ವ ಅಂಕೋಲೆಕರ್.