Ryan Parag: ಅಸ್ಸಾಂ ತಂಡಕ್ಕೆ ಮರಳಿದ ರಿಯಾನ್ ಪರಾಗ್‌ಗೆ ದೊಡ್ಡ ಜವಾಬ್ದಾರಿ

ಭಾರತ ತಂಡದ ಯುವ ಆಲ್‌ರೌಂಡರ್ ರಿಯಾನ್ ಪರಾಗ್ ಗಾಯದಿಂದ ಚೇತರಿಸಿಕೊಂಡು ಮೈದಾನಕ್ಕೆ ಮರಳಲು ಸಿದ್ಧರಾಗಿದ್ದಾರೆ. 23 ವರ್ಷದ ರಿಯಾನ್ ಪರಾಗ್ 2024-25 ರ ರಣಜಿ ಟ್ರೋಫಿಯ ಏಳನೇ ಸುತ್ತಿನಲ್ಲಿ ಅಸ್ಸಾಂ ತಂಡಕ್ಕೆ ಸೇರಿಕೊಂಡಿದ್ದಾರೆ. ಜನವರಿ 30 ರಿಂದ ಆರಂಭವಾಗಲಿರುವ ಸೌರಾಷ್ಟ್ರ ವಿರುದ್ಧದ ಪಂದ್ಯದಲ್ಲಿ ಅವರು ಅಸ್ಸಾಂ ತಂಡದ ನಾಯಕತ್ವ ವಹಿಸಲಿದ್ದಾರೆ. ರಿಯಾನ್ ಪರಾಗ್ 3 ತಿಂಗಳ ನಂತರ ಮತ್ತೆ ಮೈದಾನಕ್ಕೆ ಮರಳಲಿದ್ದು, ಅಬ್ಬರಿಸಲು ಸಜ್ಜಾಗಿದ್ದಾರೆ.

ಅಕ್ಟೋಬರ್ 2024 ರಲ್ಲಿ ರಿಯಾನ್ ಪರಾಗ್ ಮೈದಾನದಲ್ಲಿ ಕೊನೆಯದಾಗಿ ಕಾಣಿಸಿಕೊಂಡರು. ನಂತರ ಹೈದರಾಬಾದ್‌ನಲ್ಲಿ ಬಾಂಗ್ಲಾದೇಶ ವಿರುದ್ಧದ ಮೂರನೇ ಟಿ20ಯಲ್ಲಿ ಭಾರತ ಪರ ಆಡಿದ್ದರು.

ರಿಯಾನ್ ಪರಾಗ್ ಅವರು ಭುಜದ ಗಾಯದಿಂದ ಬಳಲುತ್ತಿದ್ದರು. ಹೀಗಾಗಿ ಅವರಿಗೆ ಶಸ್ತ್ರಚಿಕಿತ್ಸೆಯ ಅಗತ್ಯವಿತ್ತು. ಈ ಗಾಯದ ಕಾರಣ, ಅವರು ದಕ್ಷಿಣ ಆಫ್ರಿಕಾದಲ್ಲಿ ನಡೆದ ಟಿ20 ಸರಣಿ, ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ಸರಣಿ ಮತ್ತು ಚಾಂಪಿಯನ್ಸ್ ಟ್ರೋಫಿ ಭಾರತ ತಂಡದಿಂದ ಹೊರಗುಳಿದಿದ್ದರು. ಭಾರತಕ್ಕೆ ಮುಂದಿನ ದಿನಗಳಲ್ಲಿ ಅವರ ಅಗತ್ಯ ಬಿದ್ದರೆ, ಅವರು ಮೈದಾನಕ್ಕೆ ಮರಳುವುದರಿಂದ ಪಂದ್ಯದ ಫಿಟ್‌ನೆಸ್ ಅನ್ನು ಮರಳಿ ಪಡೆಯಲು ಸಹಾಯವಾಗುತ್ತದೆ.

ರಿಯಾನ್ ಪರಾಗ್ ಜುಲೈ 2024 ರಲ್ಲಿ ಜಿಂಬಾಬ್ವೆ ವಿರುದ್ಧ ಪಾದಾರ್ಪಣೆ ಮಾಡಿದ ನಂತರ ಟೀಮ್ ಇಂಡಿಯಾ ಪರ 10 ಟಿ20 ಪಂದ್ಯಗಳನ್ನು ಆಡಿದ್ದಾರೆ. ಅವರು ತಮ್ಮ ಸ್ಫೋಟಕ ಬ್ಯಾಟಿಂಗ್ ಮತ್ತು ಸ್ಪಿನ್ ಬೌಲಿಂಗ್‌ಗೆ ಹೆಸರುವಾಸಿಯಾಗಿದ್ದಾರೆ. ಗಾಯಗೊಳ್ಳುವ ಮೊದಲು, ಅವರ ಆಲ್‌ರೌಂಡರ್ ಸಾಮರ್ಥ್ಯವು ಟೀಮ್ ಇಂಡಿಯಾವನ್ನು ಬಲಿಷ್ಠಗೊಳಿಸಿತು. ಕಳೆದ ರಣಜಿ ಟ್ರೋಫಿ ಋತುವಿನಲ್ಲಿ ಪರಾಗ್ ಅಮೋಘ ಬ್ಯಾಟಿಂಗ್ ಪ್ರದರ್ಶನ ನೀಡಿದ್ದರು. ಅವರು ಆರು ಇನ್ನಿಂಗ್ಸ್‌ಗಳಲ್ಲಿ 75.60 ಸರಾಸರಿಯಲ್ಲಿ 378 ರನ್ ಗಳಿಸಿದ್ದರು. ಈ ಋತುವಿನಲ್ಲಿ ರಿಯಾನ್ ಪರಾಗ್ 20 ಸಿಕ್ಸರ್ ಬಾರಿಸಿದ್ದರು.

ಪ್ಲೇಆಫ್ ರೇಸ್‌ನಿಂದ ಔಟ್

ಅಸ್ಸಾಂ ತಂಡ ಆಡಿರುವ ಆರು ಪಂದ್ಯಗಳಲ್ಲಿ ಎರಡು ಸೋಲು ಮತ್ತು ನಾಲ್ಕು ಡ್ರಾ ಗಳೊಂದಿಗೆ ಎಲೈಟ್ ಗ್ರೂಪ್ ಡಿ ಟೇಬಲ್‌ನಲ್ಲಿ ಕೊನೆಯ ಸ್ಥಾನದಲ್ಲಿದೆ. ಪರಾಗ್ ಅವರ ಪುನರಾಗಮನದಿಂದ ಅಸ್ಸಾಂ ತಂಡಕ್ಕೆ ಬಲ ಬಂದಿದೆ. ಅಸ್ಸಾಂ ಪ್ಲೇಆಫ್ ರೇಸ್‌ನಿಂದ ಹೊರಗುಳಿದಿದ್ದರೂ, ಸೌರಾಷ್ಟ್ರ ಇನ್ನೂ ನಾಕೌಟ್ ರೇಸ್‌ನಲ್ಲಿದೆ. ಈ ಪಂದ್ಯ ಅವರಿಗೆ ಅತ್ಯಂತ ಮಹತ್ವದ್ದಾಗಿದೆ.

ಅಸ್ಸಾಂ ತಂಡ: ರಿಯಾನ್ ಪರಾಗ್ (ನಾಯಕ), ದಿನೇಶ್ ದಾಸ್ (ಉಪನಾಯಕ), ಮುಖ್ತಾರ್ ಹುಸೇನ್, ಮೃಣ್ಮಯ್ ದತ್ತಾ, ರಾಹುಲ್ ಸಿಂಗ್, ದೀಪಜ್ಯೋತಿ ಸೈಯದ್, ಪರ್ವೇಜ್ ಮುಸ್ರಫ್, ಸುಮಿತ್ ಘಡಿಗಾಂವ್ಕರ್ (ವಿಕೆಟ್ ಕೀಪರ್), ರಿಷಭ್ ದಾಸ್, ಅನುರಾಗ್ ತಾಲುಕ್ದಾರ್ (ವಿಕೆಟ್ ಕೀಪರ್), ಸಿಬ್ಶಂಕರ್ ರಾಯ್, ಆಕಾಶ್ ಸೇನ್‌ಗುಪ್ತಾ, ಪ್ರದ್ಯುಮಾನ್ ಸೈಕಿಯಾ, ಅಮಲನ್ಜ್ಯೋತಿ ದಾಸ್.