ಭಾರತ vs ದ.ಆಫ್ರಿಕಾ: ಅಪರೂಪದ ವಿಶ್ವದಾಖಲೆಗಳ ಬರೆದ ರೋಹಿತ್ ಶರ್ಮಾ!

ಭಾರತದ 2ನೇ ಬ್ಯಾಟ್ಸ್‌ಮನ್

ಟೆಸ್ಟ್‌ ಸರಣಿಯೊಂದರಲ್ಲಿ 3 ಅಥವಾ ಹೆಚ್ಚು ಶತಕಗಳನ್ನು ಬಾರಿಸಿದ ಭಾರತದ 2ನೇ ಆರಂಭಿಕ ಆಟಗಾರನಾಗಿ ರೋಹಿತ್ ಶರ್ಮಾ ಗುರುತಿಸಿಕೊಂಡಿದ್ದಾರೆ. ಮೊದಲ ಸ್ಥಾನದಲ್ಲಿ ಭಾರತದ ಕ್ರಿಕೆಟ್ ದಿಗ್ಗಜ ಸುನಿಲ್ ಗವಾಸ್ಕರ್ ಇದ್ದಾರೆ. ಫಾರ್ಮ್‌ನಲ್ಲಿ ಇಲ್ಲದ ಕೆಎಲ್ ರಾಹುಲ್ ಬದಲಿಗೆ ಆರಂಭಿಕರಾಗಿ ಬಂದಿರುವ ರೋಹಿತ್ ಅವಕಾಶವನ್ನು ಚೆನ್ನಾಗೇ ಬಳಸಿಕೊಳ್ಳುತ್ತಿದ್ದಾರೆ.

ಸರಣಿಯಲ್ಲಿ 3ನೇ ಶತಕ

ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್‌ನಲ್ಲಿ ಆರಂಭಿಕರಾಗಿ ಚೊಚ್ಚಲ ಬಾರಿಗೆ ಆಡಿದ್ದ ರೋಹಿತ್, ಎರಡೂ ಇನ್ನಿಂಗ್ಸ್‌ಗಳಲ್ಲಿ ಶತಕ ಬಾರಿಸಿದ್ದರು. ತೃತೀಯ ಟೆಸ್ಟ್‌ನ ಮೊದಲ ಇನ್ನಿಂಗ್ಸ್‌ನಲ್ಲಿ ರೋಹಿತ್ 164 ಎಸೆತಗಳಿಗೆ ಅಜೇಯ 117 ರನ್ ಬಾರಿಸಿದ್ದಾರೆ. ಇದರಲ್ಲಿ 14 ಬೌಂಡರಿ, 4 ಸಿಕ್ಸ್‌ಗಳು ಸೇರಿವೆ.

ಗವಾಸ್ಕರ್ 3 ಬಾರಿ ದಾಖಲೆ

ಟೆಸ್ಟ್‌ನಲ್ಲಿ ಆರಂಭಿರಾಗಿ ಸರಣಿಯೊಂದರಲ್ಲಿ 3ಕ್ಕೂ ಹೆಚ್ಚು ಶತಕ ಬಾರಿಸಿದ ಸಾಧನೆ ಸಾಲಿನಲ್ಲಿ ಸುನಿಲ್ ಗವಾಸ್ಕರ್ ಮೊದಲ ಸ್ಥಾನದಲ್ಲಿದ್ದಾರೆ. ಗವಾಸ್ಕರ್ ಈ ಸಾಧನೆಗಾಗಿ 3 ಬಾರಿ ಗುರುತಿಸಿಕೊಂಡಿದ್ದಾರೆ. ಗವಾಸ್ಕರ್, 1970-71ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ 8 ಇನ್ನಿಂಗ್ಸ್‌ಗಳಲ್ಲಿ 4 ಶತಕ, 1978-79ರಲ್ಲಿ ವಿಂಡೀಸ್ ವಿರುದ್ಧ 9 ಇನ್ನಿಂಗ್ಸ್‌ಗಳಲ್ಲಿ 4 ಶತಕ, 1977-78ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ 9 ಇನ್ನಿಂಗ್ಸ್‌ಗಳಲ್ಲಿ 3 ಶತಕ ಬಾರಿಸಿದ್ದರು.

ಅತ್ಯಧಿಕ ಸಿಕ್ಸ್‌ ಮೈಲಿಗಲ್ಲು

ದಕ್ಷಿಣ ಆಫ್ರಿಕಾ ವಿರುದ್ಧದ ಇದೇ ಟೆಸ್ಟ್‌ ಸರಣಿಯಲ್ಲಿ ಅತ್ಯಧಿಕ ಸಿಕ್ಸ್‌ ಬಾರಿಸಿರುವ ಶರ್ಮಾ ಒಂದೇ ಟೆಸ್ಟ್‌ ಸರಣಿಯಲ್ಲಿ ಅತ್ಯಧಿಕ ಸಿಕ್ಸ್‌ ಬಾರಿಸಿದ (ಈವರೆಗೆ 16 ಸಿಕ್ಸ್‌ಗಳು) ಅಪರೂಪದ ದಾಖಲೆ ನಿರ್ಮಿಸಿದ್ದಾರೆ. ಅಲ್ಲದೆ ಶರ್ಮಾ ಟೆಸ್ಟ್‌ನಲ್ಲಿ 2000+ ರನ್ ಮೈಲಿಗಲ್ಲು ಕೂಡ ಸ್ಥಾಪಿಸಿದ್ದಾರೆ.

ಅತ್ಯಧಿಕ ಶತಕ ವಿಶ್ವದಾಖಲೆ

ಕ್ಯಾಲೆಂಡರ್ ವರ್ಷವೊಂದರಲ್ಲಿ ಅತ್ಯಧಿಕ ಶತಕ ಬಾರಿಸಿದ ಆರಂಭಿಕರಾಗಿ ರೋಹಿತ್ ಶರ್ಮಾ ವಿಶ್ವದಾಖಲೆಯೂ ನಿರ್ಮಿಸಿದ್ದಾರೆ. ಈ ಯಾದಿಯಲ್ಲಿ ಭಾರತದ ಸಚಿನ್ ತೆಂಡೂಲ್ಕರ್ (9 ಶತಕ-1998), ದಕ್ಷಿಣ ಆಫ್ರಿಕಾದ ಗ್ರೇಮ್ ಸ್ಮಿತ್ (9 ಶತಕ-2005), ಆಸ್ಟ್ರೇಲಿಯಾದ ಡೇವಿಡ್ ವಾರ್ನರ್ (9 ಶತಕ-2016), ಭಾರತದ ರೋಹಿತ್ ಶರ್ಮಾ (9 ಶತಕ-2019) ಇದ್ದಾರೆ.