ಐಪಿಎಲ್ ಹರಾಜಿನಲ್ಲಿ ವಿ ಐಯ್ಯರ್ ಬೆಲೆ ಊಹಿಸಿದ ಸಂಜಯ್ ಮಂಜ್ರೇಕರ್

ಅಬುಧಾಬಿ: ಇಂಡಿಯನ್ ಪ್ರೀಮಿಯರ್ ಲೀಗ್‌ (ಐಪಿಎಲ್) ದ್ವಿತೀಯ ಹಂತದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದಲ್ಲಿ ವೆಂಕಟೇಶ್ ಐಯ್ಯರ್ ಬಹಳ ಮಿಂಚುತ್ತಿದ್ದಾರೆ. ಯುವ ಓಪನರ್ ಆಗಿರುವ ವಿ ಅಯ್ಯರ್ ಆಲ್ ರೌಂಡರ್ ಪ್ರದರ್ಶನ ನೀಡುತ್ತಿದ್ದಾರೆ. ಆರಂಭಿಕರಾಗಿ ಬಂದು ಅಯ್ಯರ್ ಕಳೆದ 5 ಇನ್ನಿಂಗ್ಸ್‌ಗಳಲ್ಲಿ ಕ್ರಮವಾಗಿ 41, 53, 18, 14, 67 ರನ್ ಗಳಿಸಿದ್ದಾರೆ.

ದುಬೈ ಇಂಟರ್ ನ್ಯಾಷನಲ್ ಸ್ಟೇಡಿಯಂನಲ್ಲಿ ಶುಕ್ರವಾರ (ಅಕ್ಟೋಬರ್‌ 1) ನಡೆದ ಐಪಿಎಲ್ 45ನೇ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಪಂಜಾಬ್ ಕಿಂಗ್ಸ್ 5 ವಿಕೆಟ್‌ ಜಯ ಗಳಿಸಿತ್ತು. ಈ ಪಂದ್ಯದಲ್ಲೂ ವೆಂಕಟೇಶ್ ಐಯ್ಯರ್ ಉತ್ತಮ ಪ್ರದರ್ಶನ ನೀಡಿದ್ದರು. 67 ರನ್, 1 ವಿಕೆಟ್‌ ಕೂಡ ಪಡೆದಿದ್ದರು. ಹೀಗಾಗಿ ಐಪಿಎಲ್‌ನಲ್ಲಿ ವೆಂಕಟೇಶ್ ಈಗ ಹೆಚ್ಚು ಗಮನ ಸೆಳೆಯುತ್ತಿದ್ದಾರೆ.

ಮುಂದಿನ ವರ್ಷ ಐಪಿಎಲ್ 15ನೇ ಆವೃತ್ತಿಗೂ ಮುನ್ನ ಮೆಗಾ ಆಕ್ಷನ್ ನಡೆಯಲಿದೆ. ಆ ವೇಳೆ ಎಲ್ಲಾ ತಂಡಗಳಲ್ಲೂ ಪ್ರಮುಖ ಆಟಗಾರರು ಅದಲು ಬದಲಾಗಲಿದ್ದಾರೆ. ಈ ವೇಳೆ ಅಯ್ಯರ್ ಅವರು ಹರಾಜು ಕಣದಲ್ಲಿದ್ದರೆ ಎಷ್ಟು ಮೊತ್ತಕ್ಕೆ ಹರಾಜಾಗಬಹುದು ಅನ್ನೋದನ್ನು ಮಾಜಿ ಕ್ರಿಕೆಟರ್, ಈಗ ಕಾಮೆಂಟೇಟರ್ ಆಗಿರುವ ಸಂಜಯ್ ಮಂಜ್ರೇಕರ್ ಊಹಿಸಿದ್ದಾರೆ.

"ವೆಂಕಟೇಶ್ ಅಯ್ಯರ್ ಮುಂದಿನ ಹರಾಜಿನಲ್ಲಿ ಏನಿಲ್ಲವೆಂದರೂ 12-14 ಕೋಟಿ ರೂ.ಗೆ ಹೋಗುತ್ತಾರೆ ಎಂದು ನನಗನ್ನಿಸುತ್ತಿದೆ. ಯಾಕೆಂದರೆ ಅವರು ಅಂಥ ಪ್ರದರ್ಶನ ನೀಡುತ್ತಿದ್ದಾರೆ. ನಾನವರ ಪ್ರಥಮದರ್ಜೆ ಕ್ರಿಕೆಟ್ ಮತ್ತು ಲಿಸ್ಟ್‌ ಎ ದಾಖಲೆಗಳನ್ನು ನೋಡಿದೆ. ಅದು ಅಸಾಮಾನ್ಯವಾಗಿದೆ," ಎಂದು ಮಂಜ್ರೇಕರ್ ಇಎಸ್‌ಪಿಎನ್ ಕ್ರಿಕ್‌ ಇನ್ಫೋ ಜೊತೆ ಹೇಳಿಕೊಂಡಿದ್ದಾರೆ.