ಮೂರನೇ ಟೆಸ್ಟ್‌ನಲ್ಲಿ ಭಾರತಕ್ಕೆ ಹಿನ್ನಡೆ: ಈ ಸ್ಟಾರ್‌ ಪ್ಲೇಯರ್‌ ಬೌಲಿಂಗ್ ಮಾಡುವುದೇ ಇಲ್ಲ... ಇಲ್ಲಿದೆ ಕಾರಣ

ಭಾರತ ಮತ್ತು ಇಂಗ್ಲೆಂಡ್ ನಡುವೆ ಐದು ಪಂದ್ಯಗಳ ಟೆಸ್ಟ್ ಸರಣಿಯ ಮೂರನೇ ಪಂದ್ಯ ರಾಜ್‌ಕೋಟ್‌ನಲ್ಲಿ ನಡೆಯುತ್ತಿದೆ. ಈ ಪಂದ್ಯದಲ್ಲಿ ಟೀಂ ಇಂಡಿಯಾ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ 445 ರನ್ ಗಳಿಸಿತ್ತು. ಇದಕ್ಕೆ ಉತ್ತರವಾಗಿ ಎರಡನೇ ದಿನದಾಟದ ಅಂತ್ಯಕ್ಕೆ ಇಂಗ್ಲೆಂಡ್ ಕೇವಲ 35 ಓವರ್‌ಗಳಲ್ಲಿ 207 ರನ್ ಗಳಿಸಿತ್ತು. ಈ ನಡುವೆ ಟೀಂ ಇಂಡಿಯಾ ದೊಡ್ಡ ಹಿನ್ನಡೆ ಅನುಭವಿಸಿದೆ. ಪಂದ್ಯದ ಮಧ್ಯೆಯೇ ತಂಡದ ಪ್ರಮುಖ ಬೌಲರ್ ತವರಿಗೆ ತೆರಳಿದ್ದಾರೆ. ರವಿಚಂದ್ರನ್ ಅಶ್ವಿನ್ ಮೂರನೇ ಟೆಸ್ಟ್ ಬಿಟ್ಟು ಮನೆಗೆ ತೆರಳಿದ್ದಾರೆ. ಅವರು ಇನ್ನು ಮುಂದೆ ಈ ಪಂದ್ಯದ ಭಾಗವಾಗಿರುವುದಿಲ್ಲ.

ಕೌಟುಂಬಿಕ ಕಾರಣಗಳಿಂದ ರವಿಚಂದ್ರನ್ ಅಶ್ವಿನ್ ಮೂರನೇ ಟೆಸ್ಟ್ ಪಂದ್ಯದಿಂದ ಹೊರಗುಳಿದಿದ್ದಾರೆ. ಶುಕ್ರವಾರ ಅಶ್ವಿನ್ ನಿರ್ಗಮನವನ್ನು ಬಿಸಿಸಿಐ ಖಚಿತಪಡಿಸಿದೆ. ಅಶ್ವಿನ್ ಕೌಟುಂಬಿಕ ತುರ್ತುಪರಿಸ್ಥಿತಿಯಿಂದಾಗಿ ತಕ್ಷಣದಿಂದಲೇ ಜಾರಿಗೆ ಬರುವಂತೆ ಟೆಸ್ಟ್ ತಂಡದಿಂದ ಹೊರಗುಳಿದಿದ್ದಾರೆ ಎಂದು ಬಿಸಿಸಿಐ ತಿಳಿಸಿದೆ.

ಈ ಸಂಕಷ್ಟದ ಸಮಯದಲ್ಲಿ ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿ ಹಾಗೂ ತಂಡ ಅಶ್ವಿನ್‌ಗೆ ಸಂಪೂರ್ಣ ಬೆಂಬಲ ನೀಡುತ್ತಿದೆ. ಬಿಸಿಸಿಐ ಮತ್ತು ತಂಡವು ಅಶ್ವಿನ್‌ಗೆ ಸಾಧ್ಯವಿರುವ ಎಲ್ಲ ಸಹಾಯವನ್ನು ನೀಡುವುದನ್ನು ಮುಂದುವರಿಸುತ್ತದೆ ಮತ್ತು ಅಗತ್ಯವಿದ್ದರೆ ಬೆಂಬಲವನ್ನು ಒದಗಿಸಲು ಸಿದ್ಧರಿರುವುದಾಗಿ ತಿಳಿಸಿದೆ.

ಅಶ್ವಿನ್ ನಿರ್ಗಮನ ಟೀಂ ಇಂಡಿಯಾಕ್ಕೆ ದೊಡ್ಡ ಹೊಡೆತ ಎಂದು ಪರಿಗಣಿಸಲಾಗಿದೆ. ಅಶ್ವಿನ್ ನಿರ್ಗಮನದಿಂದ ರೋಹಿತ್ ದಳದ ಬಲ ಈಗ ಅರ್ಧಕ್ಕೆ ಕುಸಿದಿದೆ ಎಂದರೂ ತಪ್ಪಾಗದು. ಈಗ ಈ ಟೆಸ್ಟ್‌ನಲ್ಲಿ ಭಾರತಕ್ಕೆ ಕೇವಲ ನಾಲ್ವರು ಬೌಲರ್‌ಗಳು ಮಾತ್ರ ಬೌಲಿಂಗ್ ಮಾಡಲು ಸಾಧ್ಯವಾಗುತ್ತದೆ. ಟೀಂ ಇಂಡಿಯಾಕ್ಕೆ ಅಶ್ವಿನ್ ಬದಲಿ ಆಟಗಾರ ಸಿಗುವುದಿಲ್ಲ. ಐಸಿಸಿ ನಿಯಮಗಳ ಪ್ರಕಾರ, ಕನ್ಕ್ಯುಶನ್ ವೇಳೆಯಲ್ಲಿ ಮಾತ್ರ ತಂಡಕ್ಕೆ ಬದಲಿ ಆಟಗಾರ ಲಭ್ಯವಿದೆ. ಅಂದರೆ, ಆಟಗಾರನಿಗೆ ತಲೆಗೆ ಗಾಯವಾದಾಗ ಮಾತ್ರ ತಂಡದಲ್ಲಿ ಯಾರಾದರೂ ಪಂದ್ಯದ ಮಧ್ಯದಲ್ಲಿ ಅವನ ಸ್ಥಾನವನ್ನು ಪಡೆದುಕೊಳ್ಳಬಹುದು.

ಬೇಸ್‌ಬಾಲ್ ಪ್ರಾಬಲ್ಯ

ರಾಜ್‌ಕೋಟ್‌ ಟೆಸ್ಟ್‌ನಲ್ಲಿ ಮೊದಲು ಆಡಿದ ಟೀಂ ಇಂಡಿಯಾ 445 ರನ್‌ಗಳ ಬೃಹತ್ ಸ್ಕೋರ್ ಗಳಿಸಿತ್ತು. ಈಗ ಭಾರತ ತಂಡವು ಸುಲಭವಾಗಿ ದೊಡ್ಡ ಮುನ್ನಡೆ ಪಡೆಯುತ್ತದೆ ಎಂದು ತೋರುತ್ತಿದೆ, ಆದರೆ ಬೇಸ್‌ಬಾಲ್ ಟೀಮ್ ಇಂಡಿಯಾದ ನಿದ್ದೆಗೆಡಿಸಿದೆ. ಎರಡನೇ ದಿನದಾಟದ ಅಂತ್ಯಕ್ಕೆ ಇಂಗ್ಲೆಂಡ್ ಕೇವಲ 35 ಓವರ್‌ಗಳಲ್ಲಿ 2 ವಿಕೆಟ್‌ಗೆ 207 ರನ್ ಗಳಿಸಿದೆ.

ಇಂಗ್ಲೆಂಡ್‌ನ ಆರಂಭಿಕ ಆಟಗಾರ ಬೆನ್ ಡಕೆಟ್ ಕೇವಲ 118 ಎಸೆತಗಳಲ್ಲಿ 133 ರನ್ ಗಳಿಸಿ ಆಡುತ್ತಿದ್ದಾರೆ. ಇಲ್ಲಿಯವರೆಗೆ ಅವರು 21 ಬೌಂಡರಿ ಮತ್ತು 2 ಸಿಕ್ಸರ್‌ಗಳನ್ನು ಬಾರಿಸಿದ್ದಾರೆ. ಅವರೊಂದಿಗೆ ಜೋ ರೂಟ್ ಕ್ರೀಸ್‌ನಲ್ಲಿದ್ದಾರೆ. ಅವರು 13 ಎಸೆತಗಳಲ್ಲಿ 9 ರನ್ ಗಳಿಸಿದ್ದಾರೆ. ಆಂಗ್ಲರ ತಂಡ ಈಗ ಭಾರತದಿಂದ ಕೇವಲ 238 ರನ್‌ಗಳಷ್ಟು ಹಿಂದಿದೆ.